Biblia/Nove Testamento/Tito/Tito 2

Epistola a Tito

Capitulo 2

Un conducta consequente al san doctrina

¹Pro lo que te concerne, doce lo que es in accordo con le san doctrina. ²Homines plus ancian debe esser disciplinate^[1], honorabile, sensibile, integre^[2] in fide, amor, e patientia. ³Similemente, le feminas le plus ancian debe comportar se conformemente al sanctitate, non esser maledicente, non biber troppo de vino. ⁴Illas debe docer lo que es bon. In iste maniera illas potera educar^[3] le feminas plus juvene a amar lor maritos e lor filios, ⁵a esser disciplinate, pur, exequente lor deberes domestic^[4], gentil, submittite a lor maritos, a que le parola de Deo non sia discreditate^[5]. ⁶In le mesme maniera, exhorta le homines plus juvene a esser disciplinate, ⁷offerente te ipse como exemplo de bon obras in omne cosa. In tu inseniamento demonstra integritate e dignitate ⁸con un parola san e irreprochabile al fin que le adversario se avergonia^[6], habente nihil de mal a dicer super nos. ⁹Servitores^[7] debe submitter se a lor dominos in omne cosa e facer lo que es requirite sin contradicer les. ¹⁰Illes non debe fraudar lor dominos, ma semper demonstrar bon fide, pro monstrar quanto es agradabile le doctrina de Deo nostre Salvator in omne cosa.

¹¹Pois que le gratia de Deo appareva e portava salvation a omne sorta de personas, ¹²illo educa nos a refusar le impietate e le desiros mundan, e a viver in le presente etate^[8] in maniera sobrie, juste, e pie, ¹³durante que nos attende le felice completion de nostre sperantia in le gloriose apparition de nostre grande Deo e Salvator Jesus Christo. ¹⁴Ille dava se ipse pro nos ut liberar nos de omne sorta de anomia^[9] e purificar pro se ipse un populo qui le pertine, zelante in obras bon. ¹⁵Ergo doce iste cosas, exhorta e reprimenda con plen autoritate. Non permitte a alicuno de dispreciar te.

Notas

1. O “prudente”.
2. O “san”.
3. O “instruer”.
4. O “essente bon menageras”.
5. O “blasphemate”.
6. O “sia confundite”.
7. O "sclavos".
8. O “in iste mundo”.
9. O “iniquitate”.