Biblia/Vetule Testamento/Cantico/Cantico 3

Le Cantico del canticos

3

Le amante perdite es retrovate

[Le amata in re su amatoː] ¹Un nocte, durante que io jaceva in mi lecto de amor, io desirava ardentemente mi amante. Io le quereva, ma io non le videva^[1]. ²Alora io diceva a me ipse: “Io va surger e percurrer le citate, perquirente vias e placias; io va cercar mi amato”. Assi io inquireva ubique ma non le trovava. ³Le vigilatores me trovava durante que illes patruliava, e io les ha petite: “Esque vos videva mi amato?”. ⁴Poco postea que io les quitava io trovava mi amato. Io le ha imbraciate e tenite stricte a mi pecto. Inde io le portava in le domo de mi matre, in le lecto ipse de mi matre, ubi io esseva concipite.

Refren de adjuration

[Le amato al juvenettasː] ⁵“Io vos adjura, juvenettas de Jerusalem, per le gazellas e le cervos salvage, de non eveliar le amor donec illa ipse lo vole!”. Le procession regal de nuptias

[Le juvenettas de Jerusalemː] ⁶Qui es ille qui monta per le deserto sicut un nebula de fumo? Qui es ille que pare un fragrante flucto de myrrha, pur incenso e omne sorta de specie? ⁷Ecce! Il es le lectiera de Salomon! Illo es ambite per sexanta guerreros, alicun del guerreros le plus forte de israel. ⁸Omnes es ben trainate in le arte del guerra. Cata uno de illes ha un gladio a su flancos, preste a defender le rege contra le terrores del nocte. ⁹Rege Salomon se faceva facer un lectiera de ligno del Libano. ¹⁰Su columnas es de argento, le reclinatorio de auro, su sede es tapissate con lana purpuree, su interior esseva incrustate de corio per le juvenettas de Jerusalem.

¹¹Sorti fora, oh juvenettas de Jerusalem, e contempla Rege Salomon! Ille porta le diadema per le qual su matre le coronava pro su nuptias, le die le plus gaudiose de su vita!

Notas

1. O “trovava”.