Biblia/Vetule Testamento/Chronicas/2 Chronicas 2

2 Chronicas

2

Preparationes pro le edification del templo

¹(1:18) Salomon decideva facer edificar un Templo pro honorar le nomine del Senior, e alsi un palatio regal pro se. ²(2:1) Pro isto, ille inrolava un fortia de septanta milles travaliatores, octanta milles homines pro taliar lapides in le montes, e tres milles prepositos^[1]. ³Salomon alsi mandava un message a Rege Hiram de Tyro que diceva: “Adjuva me sicut tu faceva con mi patre David, quando tu le mandava blocos de cedro pro le construction de su palatio. ⁴Ecce, il es mi intention de edificar un Templo pro honorar le nomine del Senior mi Deo. Illo essera un placia consecrate pro comburer coram ille incenso aromatic, pro exponer le special pan sacrifical, e pro offerer holocaustos mane e vespere, in le dies de Sabbato, in le celebrationes del novilunio e in altere festas instituite per le Senior nostre Deo. Ille mesme commandava a Israel de facer tote isto sempiternemente. ⁵Illo debera esser un Templo magnific, quia nostre Deo es magne super omne deos. ⁶Qui, tamen, poterea unquam edificar un domo digne de ille? Non mesmo le celos le plus alte poterea continer le! Assi, qui es io, mesmo a considerar edificar le un Templo, excepte como un placia pro comburer sacrificios a ille? ⁷Assi, manda me un maestro experte qui sape operar con auro, argento, bronzo, e ferro, tanto como con drappos purpuree, carmesin, e blau. Ille debe esser un habile sculptor qui pote laborar con le maestros de Juda e Jerusalem que esseva seligite per mi patre David. ⁸Manda me de Libano, alsi, ligno de cedro, cypresso e santal, quia io sape que tu homines es multo habile in taliar ligno in Libano. Io mandera mi homines^[2] pro adjutar les. ⁹Il essera necessari un grande amonta de ligno, quia le templo que io es sur le puncto de edificar essera multo grande e magnificente. ¹⁰Pro pagamento de tu taliatores de ligno io les mandara vinti milles choros de frumento fullate, vinti milles choros de hordeo, cento vinti milles batos^[3] de vino e cento vinti milles batos de oleo de oliva”.

¹¹Rege Hiram replicava a Salomon con iste littera: “Il es quia le Senior ama su populo, que ille te faceva lor rege! ¹²Sia laudate le Senior, le Deo de Israel, qui faceva le celos e le Terra! Ille dava a David un filio sapiente, erudite, sensate e prudente, qui facera edificar un Templo pro le Senior e un palatio regal pro se. ¹³Ora io te manda un maestro cuje nomine es Huram-abi, un artifice extrememente talentose. ¹⁴Su matre es del tribo de Dan in Israel, e su patre de Tyro. Ille sape operar con auro e argento, bronzo, ferro, lapides, e ligno. Ille pote operar alsi con drappos purpuree, blau e carmesin e lino fin. Ille es anque un gravator e pote realisar qualcunque designo que le es date. Ille laborara con tu maestros e con illes que tu patre David appunctava. ¹⁵Ora, que mi senior manda a su servitores le frumento, le hordeo, le oleo de oliva e le vino que ille promitteva. ¹⁶Nos taliara qualcunque ligno que vos necessita ab le montes del Libano e facera flottar le blocos sur rates per le mar longe le litore usque a Joppa. De ibi vos potera transportar le blocos a in Jerusalem”.

¹⁷Salomon faceva un censimento de omne estranieros qui viveva in le terra de Israel, simile al censimento que habeva facite su pate, e ille resultava esser cento cinquanta tres milles. ¹⁸Ille appunctava septanta milles de illes qua obreros commun, octanta milles qua ardesieros in le collinas, e tres milles sex centos qua prepositos.

Notas

1. O “supervisores”.
2. O “servitores”.
3. O “gallones”.