Biblia/Vetule Testamento/Ezechiel/Ezechiel 34

Ezechiel

34

Le pastor de Israel

¹Deinde, le sequente message me proveniva ab le Senior: ²“Filio de homine, prophetisa contra le pastores de Israel, le capites de Israel. Da les iste message de Deo, le Senior: Guai a vos, pastores de Israel, qui pasce vos mesme! Nonne le pastores deberea pascer le grege? ³Vos bibe le lacte^[1], veste vos de lana, e macella le animales melior, ma non pasce le grege! ⁴Vos non consolidava le oves extenuate, non resanava le malades, non bandava le vulnerates, non reportava a domo le dispergites, non quereva le perdites, ma vos imperava super illes con fortia e violentia. ⁵Illos se dispergeva quia illos non habeva ulle pastor, e illos deveniva predas de omne bestias salvage del agros. ⁶Mi oves errava per le montes e per omne alte collinas. Mi oves se dispergeva super tote le facie del terra e nemo los quereva, nemo los cercava.

⁷Propter isto, pastores, audi le parola del Senior: ⁸Tan certemente como io vive, declara Deo, le Senior, vos derelinqueva mi grege e lo lassava attaccar per omne bestia selvage del agros. E quanquam vos esseva mi pastores, vos non quereva mi oves quando illos se perdeva, ma pasceva vos mesme e lassava mi oves morir de fame. ⁹Propter isto, vos pastores, audi le parola del Senior. ¹⁰Isto es lo que dice Deo, le Senior: Ecce, io considera nunc iste pastores sicut mi inimicos^[2] e require que illes me da conto de lo que eveniva a mi oves. Io les levara le derecto de pascer le grege, e io les facera cessar de pascer se mesme. Io salvara mi oves de lor bucca; le oves non essera plus in ultra lor preda.

Le bon pastor

¹¹“Quia ecce lo que le Senior Deo dice: ‘Ecce, io ipse querera e trovara mi oves. ¹²Io essera sicut un pastor qui quere su grege dispergite. Io trovara mi oves e los salvara de omne locos in le quales illos se dispergeva in ille die nebulose e obscur. ¹³Io los reportara a casa in lor proprie pais, le terra de Israel, ab inter le populos, e los colligera ab nationes estranie. Io los pascera super le montes de Israel, juxta le torrentes e tote le placias habitate de ille terra. ¹⁴Si, io les dara bon terras de pastura super le alte collinas de Israel. Ibi illos jacera sur herbas placente e los pascera in le verdeante pasturas del collinas. ¹⁵Io ipse curara mi oves, io ipse los facera jacer. Isto declara Deo, le Senior. ¹⁶Io querera qui se perdeva e vagava frustra, io los reportara a casa in securitate. Io bandara lor vulneres e consolidara le debiles. Tamen, los que es adipose e forte io custodiara e pascera con mi judicamento!”.

¹⁷“Pro lo que concerne vos, grege mie, isto es lo que dice Deo, le Senior: Ecce, io es sur le puncto de judicar inter ove e ove, inter arietes e capros. ¹⁸Esque il non es satis retener pro vos le melior pasturas? Debe vos alsi calcar le resto de vostre pasturas con vostre pedes? Quando vos bibe aqua munde, debe vos alsi render turbide le resto del aquas, fullante lo con vostre pedes? ¹⁹Quare mi grege deberea mangiar lo que vostre pedes calcava e biber le aqua que vostre pedes rendeva turbide?”.

²⁰“Ergo, isto es lo que les dice Deo, le Senior: Ecce, io ipse judicara inter le ove adipose e le ove extenuate^[3]. ²¹Quia vos, oves adipose, repulsava tote le oves infirme con vostre humeros e los colpava con vostre cornos, donec illos se dispergeva foras, ²²io salvara mi grege; illos non plus devenira predas. Io judicara inter ove e ove.

²³Io suscitara super illos un pastor, e ille los pascera - id es mi servitor David. Ille los pascera e essera lor pastor. ²⁴Io, le Senior, essera lor Deo, e mi servitor David essera principe in lor medio. Io, le Senior, ha parlate!”.

Le pacto de pace del Senior

²⁵Io concludera con mi populo un pacto de pace e disfacera le pais del bestias feroce. Illes potera campar se securmente in le locos le plus salvage e dormir in le silvas sin timor. ²⁶o benedicera mi populo e lor domos circum mi sancte colle. E in le saisones appropriate io mandera le pluvias que illes necessa. Il habera pluvias de benediction. ²⁷Le verdieros e agros de mi populo producera lor fructos e le terra dara su messe. Illes vivera securmente in lor terra; illes cognoscera que io es le Senior, quando io frangera le barras de lor jugo e les salvara ab le mano de illes qui les dominava. ²⁸Illes non plus in ultra essera preda del nationes, ni le bestias salvage les devorara. Illes vivera securmente, e nemo les injectara plus terror.

²⁹Io rendera famose lor pais propter su messes, tanto que mi populo nunquam plus suffrera de fames o del injurias de nationes estranie. ³⁰Ita illes cognoscera que io, le Senior lor Deo, es con illes. E illes cognoscera que illes, le populo de Israel, es mi populo, dice Deo, le Senior. ³¹Vos es mi grege, le oves de mi pastura. Vos es mi populo, e io es vostre Deo. Io, Deo, le Senior, ha parlate.

Notas

1. O “mangia le grassia”.
2. O “Io es contra le pastores”.
3. O “emaciate”.