Biblia/Vetule Testamento/Ezechiel/Ezechiel 37

Ezekiel

37

Un vallea de ossos sic

¹Le Senior me prendeva^[1] e, per le Spirito del Senior, me transportava in le medio de un vallea que esseva plen de ossos human. ²Ille me faceva ambular in gyro inter illos. E ecce, io videva que ille vallea esseva disbordate de ossos e que illos esseva multo sic. ³Ille me diceva: “Filio de homine: poterea iste ossos devenir de novo personas vivente^[2]?”. Io respondeva: “Solmente tu, soveran Senior, poterea responder a un tal question”. ⁴Inde ille me diceva: “Proclama a iste ossos un message prophetic dicente: ‘Ossos aride, audi le parola del Senior! ⁵Isto es lo que le Senior Deo dice a iste ossos: Ecce, io es super le puncto de infunder in vos le sufflo del spirito e render vos vivente de novo. ⁶Io va poner nervos e musculos super vos e recoperir vos de pelle; io va poner in vos le spirito e vos va viver. Tunc vos sapera que io es vermente le Senior’”.

⁷Assi io proclamava iste message, sicut ille me commandava facer. Durante que io parlava io audiva un strepito trans tote ille vallea, e le ossos se reconjungeva, osso a osso. ⁸Alora, sub mi oculos, io videva formar se super ille ossos musculos e carne. Le pelle se extendeva pro coperir ille ossos, ma ancora in illo il non habeva le spirito.

⁹Ille me diceva: “Proclama un message prophetic al ventos, oh filio del homine! Proclama un message prophetic e dice: ‘Isto es lo que le Senior Deo dice: Veni, oh spirito, ab le quatro ventos, e insuffla super iste cadaveres, ut illos va reviviscer!’”. ¹⁰Alora io proclamava iste message, sicut ille me commandava facer, e le spirito entrava in ille corpores; illes incipeva viver e stava sur lor pedes; illes esseva sicut un armea multo grande.

¹¹Deinde Deo me diceva: “Filio de homine, iste ossos representa le populo de Israel. Illes dice: ‘Nos deveniva ossos vetule e sic - nostre sperantia periva, e nostre nation se abscindeva’. ¹²Ergo proclama a illes iste prophetia: Isto es lo que le soveran Senior dice: Oh mi populo, io va aperir vostre tumbas e conducer vos foras de vostre sepulcros! Tunc io vos reportara a in le terra de Israel. ¹³Quando isto evenira, oh mi populo, vos sapera que io es vermente le Senior. ⁴Io ponera in vos mi Spirito e vos reviviscera e retornara a in vostre terra. Tunc vos sapera que io, le Senior, ha parlate e faceva exactemente lo que io diceva. Si, le Senior ha parlate.’”.

Reunification de Israel e Juda

¹⁵De novo me perveniva un message del Senior: ¹⁶“Filio de homine, prende un pecia de ligno e incide^[3] super illo iste parolas: ‘Isto representa Juda e su tribos alliate’. Pois prende un altere pecia de ligno e incide super illo iste parolas: ‘Ephraim e le tribus del nord de Israel’. ¹⁷Ora tene los insimul in tu mano como si illos es un sol pecia de ligno. ¹⁸Quando tu populo te petera: ‘Nonne tu va explicar nos quid iste action significa?’, ¹⁹tu les dicera: ‘Isto es lo que dice le soveran Senior: Io prendera Israel e le tribus del nord e los conjungera a Juda. In mi mano illos devenira un sol pecia de ligno’. ²⁰Deinde tu levara in tu manos ille pecias de ligno tanto que omnes los pote vider, ²¹e va communica les iste message del soveran Senior: ‘Isto es lo que le Senior Deo dice: Io recongregara le populo de Israel ab inter le nationes. Io les reportara a casa in lor proprie terra ab le locos ubi illos esseva dispergite. ²²Io los unificara como un sol nation super le montes de Israel. Un sol rege regnara super illos; nunquam plus illos essera dividite in duo nationes o in duo regnos. ²³Nunquam plus illos se pulluera con lor idolos e imagines abominabile e rebellion, quia io les salvara de lor peccaminose apostasia. Io les mundara, e illes essera vermente mi populo, e io essera lor Deo.

^{{{2}}}Mi servitor David essera lor rege, e illes habera un sol pastor. Illes obedira^[4] a mi judicios e custodiara mi commandamentos e los ponera in practica. ²⁵Illes habitara in le pais que io dava a mi servitor Jacob, le terra ubi lor ancestres viveva. Illes, lor filios e granfilios post illes vivera ibi in eterno, e mi servitor David essera pro semper lor prince. ²⁶Con illes io establira un alliantia de pace, un pacto eterne. Io dara a illes lor terra e multiplicara lor numeros, e io ponera inter illes mi Templo^[5]. ²⁷Io habitara inter illes. Io essera lor Deo e illes essera mi populo. ²⁸E quando mi Templo es inter illes pro semper, le nationes del mundo sapera que io es vermente le Senior, ille qui sanctifica Israel”.

Notas

1. O “Le mano del Senior esseva super me”.
2. O “poterea iste ossos viver?”.
3. O “scribe”.
4. O “ambulara in”.
5. O “sanctuario”.