Biblia/Vetule Testamento/Genesis/Genesis 12

Genesis

12

Le obedientia de Abram

¹Ora le Senior diceva a Abram: “Quita tu native pais, tu parentes e le familia de tu patre e vade a in le terra que io va monstrar te. ²Io te facera devenir un grande nation. Io te benedicera e magnificara tu nomine ^[1], e pro alteres tu essera un fonte de benediction^[2]. ³Io benedicera illes que te benedice e maledicera illes que te maledice. Tote le familias del terra essera benedicite per tu medio”.

⁴Itaque Abram quitava su pais, sicut le le Senior le habeva prescribite, e Lot vadeva con ille. Abram habeva septanta-cinque annos quando ille quitava Charran. ⁵Abram prendeva con se su uxor Sarai, su nepote Lot, e tote su substantias - su bestial e tote le gente acquisite de su familia a Charran - e se dirigeva verso le terra de Chanaan. Quando illes perveniva in Chanaan, ⁶Abram percurreva ille terra e perveniva al loco appellate Sichem, usque le Querco de Moreh. In ille tempores ille terra esseva habitate per le Chananitas. ⁷Le Senior appareva a Abram e le diceva: “Io dara iste terra a tu descendentes”. Assi Abram erigeva ibi un altar e lo dedicava al Senior, que le habeva apparite.

⁸Inde, Abram viagiava verso sud e se campava in le region collinose, con Bethel a west, e Hai a est. Ibi ille erigeva un altere altar, lo dedicava al Senior e invocava^[3] le nomine del Senior. ⁹Abram viagiava per grados verso sud usque al Negev.

Abram e Sarai in Egypto

¹⁰In ille tempore un fame colpava le terra de Chanaan; assi Abram descendeva in Egypto pro sojornar ibi per un certe tempore, durante que le fame esseva sever. ¹¹Approximante al Egypto pro entrar in illo, Abram diceva a Sarai, su uxor: “Ecce, io sape que tu es un femina multo belle. ¹²Quando le Egyptianos te videra, illes poterea dicer: ‘Ista es su uxor’ e illes poterea occider me e servar te vive pro illes. ¹³Dice les, ergo, io te obsecra, que tu es mi soror, ut propter te me vade ben, e mi vita essera sparniate gratias a te”.

¹⁴Itaque, quando Abram entrava in Egypto, le egyptianos ben videva que Sarai esseva multo belle. ¹⁵De facto, quando le officieros del palatio la videva, illes la laudava coram le Pharaon, lor rege, e Sarai esseva portate in le palatio del Pharaon. ¹⁶Propter illa, Pharaon dava a Abram multe donos - oves, boves, servitores e servientes, asinos e camelos.

¹⁷Ma le Senior flagellava Pharaon e su familia con terribile plagas propter Sarai, le uxor de Abram. ¹⁸Assi Pharon mandava vocar Abram e le diceva: “Quid es lo que tu me faceva? Quare tu non me diceva que illa es tu uxor? ¹⁹Proque tu diceva que illa es tu soror e me permitteva de prender la como mi uxor? Ora, ecce hic tu conjuge: prende la e porta la via de hic!”. ²⁰Pharaon assi ordinava a alicun de su homines de escortar les, e illes duceva Abram foras del pais, insimul a su uxor e toto lo que ille habeva.

Notas

1. O “te rendera famose”.
2. O anque: “tu essera un exemplo vivente del benediction divin”.
3. O “adorava”.