Biblia/Vetule Testamento/Isaia/Isaia 54

Isaia

54

Gloria futur de Jerusalem

¹“Exulta, oh sterile, tu qui nunquam generava infantes! Allegra te, gaude, tu qui nunquam parturiva, quia multes essera le filios del femina desolate, magis quam le filios del femina maritate”, dice le Senior. ²“Dilata tu tenta, extende su pannellos! Non sparnia ulle effortio! Prolonga le funes de tu tentas e consolida lor cavilias. ³Quia tu te extendera a dextera e a leve; tu filios conquirera nationes e habitara in citates que habeva essite relinquite^[1]. ⁴Non time, tu non essera avergoniate. Non erubesce plus de pudor, nam tu oblidara le vergogna que tu habeva durante tu adolescentia; tu non rememorara plus le disgratia de tu abandonamento^[2]. ⁵Quia tu Creator essera tu marito; su nomine es le Deo del universo. Ille es tu Redemptor, le Sancte de Israel. Ille essera vocate “Deo del Terra integre”. ⁶Le Senior te vocara e te facera retornar sicut un uxor derelicte e amarisate, sicut un juvene sposa que habeva essite repudiate de su marito, dice tu Deo. ⁷Per breve tempore io te derelinqueva, ma con grande compassion io te reprendera. ⁸In un momento de grande indignation io abscondeva per curte tempore mi facie ab te, ma con misericordia sempiterne io te commiserara, dice le Senior, tu Redemptor”.

⁹Justo sicut io jurava in le dies de Noah, que nunquam plus aquas haberea coperite le facie del Terra, assi io nunc jura que io nunquam plus irascera contra te e te punira^[3]. ¹⁰Mesmo si le montes recederea e le colles se moverea, mi misericordia non recedera ab te ni mi pacto de pace non se movera, dice le Senior, qui te compati”.

¹¹“Oh povretta, urbe convulse e sin ulle consolation! Ecce, io es sur le puncto de reconstruer te con lapides pretiose e facer tu fundationes de lapislazuli. ¹²Io facera tu pinnaculos de rubinos scintillante, tu portas de lapides pretiose e tu muralias de belle petras. ¹³Omne tu filios essera discipulos del Senior e magne essera le pace de tu filios. ¹⁴Tu essera secur sub un ordinamento juste e eque. Tu inimicos remanera lontan ab te. Tu vivera in pace, e le terror non te approximara plus. ¹⁵Ecce, si un attacco occurrera, illo non venira de me. Quicunque essayara defiar te essera battite”.

¹⁶“Io creava le ferrero qui suffla super le carbones sub le forgia e produce armas de destruction, e io mesme creava le armeas que devasta. ¹⁷Nulle armas que sia forgiate a emplear contra te succedera^[4]. Tu silentiara omne voces que se leva pro accusar te. Iste beneficios^[5] es gaudite per le servitores del Senior; lor vindicantia venira ab me. Io, le Senior, ha parlate!”.

Notas

1. O “desolate”.
2. O “viduage”.
3. O “levara mi voce contra te”.
4. O “essera frustrate”.
5. O “hereditate”.