Biblia/Vetule Testamento/Isaia/Isaia 58

←Isaia 57

Le Biblia in Interlingua Isaia

Isaia 59→

Isaia

58

Ver e false culto

¹Clama in alte voce e sin pavor! Crita con voce stentoree simile al sono forte de un trompetta. Denuncia le actos scelerate de mi populo! Confronta le familia^[1] de Jacob con lor peccatos!

²De die in die illes me quere^[2]; illes vole cognoscer mi voluntate^[3] como un nation que face lo que es juste e que nunquam derelinquerea le leges de lor Deo. Illes me roga judicios de justitia e vole approximar se a Deo. ³Illes, tamen, lamenta: “Quare tu non remarcava que nos jejuna? Quare non presta tu attention quando nos humilia nos ipse?”. Io non presta attention a vos proque in le mesme tempore que vos jejuna, vos indulge in placeres egoista^[4] e vos exploita^[5] vostre obreros! ⁴Vero, vos jejuna, ma in le mesme tempore vos litiga e contende, vos disputa e impiemente colpa con pugnos le unes le alteres. Il esserea melio que vos non jejuna sicut hodie e que vos non mesmo essaya de facer audir in celo vostre voce.

⁵Esque illo es vermente le sorta de jejuno que io vole? Esque io vole un die in le qual simplemente le gente se humilia^[6], inclinante lor capite como un canna e extendente se super tela de sacco e cineres? Esque isto es vermente lo que vos appella un jejuno, un die acceptabile del Senior? ⁶No, isto es le sorta de jejuno que me place: Io vole que vos libera illes que esseva injustemente imprisionate, que vos allevia le oneres de illes qui labora pro vos, que vos lassa libere le opprimites e infringe omne jugo. ⁷Io vole que vos participa vostre pan con le famelicos, da vestimentos a illes que lo necessita e que vos non occulta vos ab parentes^[7] que necessita vostre adjuta.

⁸Tunc vostre lumine resplendera como le aurora, e vostre feritas essera tosto resanate. Vostre justitia^[8] vos precedera e le splendor del Senior essera le retroguarda que protegera vos. ⁹Tunc, quando vos invocara le Senior, ille respondera vos. Vos clamara e ille tosto respondera vos: “Ecce, io es hic”. Ergo remove le gravose jugo del oppression. Cessa indicar con vostre digito e diffunder rumores vitiose. ¹⁰Vos debe sustentar le famelicos e adjutar illes que es travaliate. Tunc vostre lumine dispersara le tenebras, e obscuritate circum vos devenira tanto lucente quanto le mediedie. ¹¹Le Senior conducera vos semper e dara vos a biber in locos aride. Ille dara vos renovate fortias, e vos essera como un horto ben irrigate, como un fonte que nunquam cessa de emitter aqua. ¹²Vostre gente reedificara le vetule ruinas de vostre citates, vos restabilira antique fundamentos. Vos essera appellate: “Le edificatores de muros e illes que rende le stratas de novo habitabile”.

¹³Vos debe observar le Sabbato, plus totsto que facer toto lo que vos place in mi die sancte. Tu debe considerar le Sabbato un delicia e le die sacre al Senior qualcosa de gloriose. Vos debe tractar lo con respecto abstenente te de vostre activitates costumari, de vostre activitates egoista e transactiones commercial. ¹⁴Tunc vos trovara gaudio in vostre relation con le Senior, io dara vos grande prosperitate e facera crescer le messes sur le terra que io dava a vostre ancestre Jacob”. Sia certe que le Senior ha parlate assi.

Notas

1. O “domo”.
2. Illes veni in mi Templo.
3. O “mi vias”, “lo que io require”.
4. O “vos satisface a vostre desiros egoista”.
5. O “opprime”.
6. O “se afflige”.
7. Litt. “de vostre carne e sanguine”.
8. O “pietate”.