Biblia/Vetule Testamento/Jeremia/Jeremia 21

Jeremia

21

Le Senior ipse consignara Jerusalem al inimico

¹Le Senior parlava a Jeremia quando le Rege Zedekia le habeva inviatee Pashhur, filio de Malkija e le sacerdote Zephania, filio de Maasela. Zedechia les inviava a Jeremia pro peter le: ²“Pete al Senior de venir adjutar nos, quia Rege Nebuchadnezzar attacca nos. Forsan le Senior executara un de su miraculos sicut ille faceva in le tempores passate e facera cessar iste attaccos e receder ab nos nostre inimicos”.

³Jeremia les respondeva: “Dice a Zedekia ⁴que le Senior, le Deo de Israel, dice: ‘Le fortias a vostre disposition se trova nunc extra le muros e combatte contra Rege Nebuchadnezzar de Babylonia e le Babyloneses que tene vos sub assedio. Io facera retraher e congregar ille fortias intra le citate. ⁵Con furor, indignation e grande ira, io ipse combattera contra vos con mi mano forte e potente brachio. ⁶Io percutera le habitantes de iste citate, homines e bestias, e illes morira de un grande pestilentia. ⁷Post illo, dice le Senior, io consignara al fame e al peste, Zedekia, rege de Juda, su officieros, e qualcunque altere persona qui supervivera al guerra. Io les consignara al rege de Babylonia e a lor inimicos, qui vole uccider les. Ille les macellara con le gladio. Ille non habera de illes alcun misericordia, compassion o pietate’”.

⁸Dice alsi al populo de Jerusalem que le Senior dice: ‘Io pone ante vos duo vias: le via del vita e le via del morte. ⁹Illes qui remane in iste citate morira per le gladio, per le fame o per le peste. Illes qui quita le citate e se rende al Babyloneses que assedia le citate, supervivera. Le vita essera lor recompensa. ¹⁰Quia io, le Senior, dice que io ha le determination non de liberar iste citate, ma de causar su disastro. Illo essera consignate al rege de Babylonia e ille lo destruera con le foco”.

Admonitiones al familia regal

¹¹Dice al familia regal de Juda: “Audi le message del Senior: ¹²Oh familia regal descendite de David. Le Senior dice: ‘Rende justitia cata matino al gente que vos judica! Adjuta illes que ha essite robate; libera les ab lor oppressores. Alteremente mi ira se accendera sicut un foco inextinguibile propter tote vostre peccatos. ¹³Audi, vos omnes qui sede inthronate super le vallea sur un plateau roccose: io es adverso vos’, dice le Senior, ‘Vos vangloria vos dicente que nemo poterea piccar super vos; que nemo poterea penetrar in le locos ubi vos ha refugiate vos’. ¹⁴Ma io punira vos juxta le fructo de vostre operas’, dice le Senior, ‘io incendiara vostre palatio; le foco devorara toto lo que es circa illo’”.