Biblia/Vetule Testamento/Job/Job 10

←Job 9

Le Biblia in Interlingua Job

Job 11→

Job

10

Un appello pro revelation

¹Io es fatigate de viver assi. Io nunc va planger liberemente sin continer me. Io va parlar in le amaritude de mi anima. ²Io va dicer a mi Deo: “Non condemna me solmente! Indica me pro qual culpa tu me judica! ³Tu opprime me, io que es le obra de tu manos e, quanquam tu vide lo que le impios face, il pare que tu les surride!

⁴Esque tu oculos es simile al nostre^[1]? Esque tu vide in le mesme maniera que nos vide? ⁵Es le longor de tu vita simile al nostre e tu annos sicut le tempore del vita human ⁶tanto que tu debe rapidemente querer de mi culpa e scrutar mi peccatos? ⁷Benque tu sape que io faceva nihil de impie^[2], nemo pote salvar me de tu manos.

⁸Tu manos mesme me formava e plasmava tote mi membros, ma nunc tu vole completemente destruer me! ⁹Memora que tu me faceva del pulvere del terra e nunc proque vole tu que io sia reducite de novo in pulvere? ¹⁰Sicut lacte tu me emulgeva e sicut caseo tu me faceva coagular. ¹¹Tu me vestiva de carne e de pelle; tu jungeva^[3] tote mi osteos e nervos. ¹²Tu me accordava vita e misericordia e tu intervention custodiva mi spirito. ¹³Totevia, io sape lo que tu celava in tu corde^[4], lo que tu te proponeva in tu animo: ¹⁴il esseva de observar me, e si io haberea peccate, tu haberea nullemente pardonate mi culpa.

¹⁵Si io es culpabile, guai a me! E si io es innocente^[5] io non pote mesmo levar mi capite, quia io es saturate de affliction e de miseria. ¹⁶E si io levarea mi capite, tu me chassarea como un leon e exhiberea de novo tu admirabile potentia. ¹⁷Tu semper porta nove testes contra me. Tu multiplica contra me tu ira e porta nove armeas contra me.

¹⁸Quare tu me faceva sortir del sino de mi matre? Si io ibi moriva, nemo me haberea plus vidite^[6]. ¹⁹Si solmente io nunquam haberea vidite le lumine e tosto translate del utero al tumba! ²⁰Nunc non me remane que poc dies a viver: ergo lassa me in pace! Que mi dolor pote haber al minus un poco de alleviation, ²¹ante que io vade al terra del tenebras e del umbra del morte, e non plus retorna. ²²Illo es un terra obscur e de tenebras, ubi regna le umbra del morte e disordine, le terra ubi habita le horror sempiterne.

Notas

1. Litt. “Ha tu oculos de carne?”.
2. ...ergo io non es culpabile”.
3. O “tricotava”.
4. Tu ver motivation, intention.
5. O “juste”.
6. “Proque tu non me faceva morir in le sino de mi matre?”.