Biblia/Vetule Testamento/Nehemia/Nehemia 2

Nehemia

2

Nehemia es autorisate vader a Jerusalem

¹Inde, in le mense de Nisan, durante le vintesime anno del rege Antaxerxe, io serviva al rege su vino. Io nunquam antea habeva parite triste coram ille. ²Assi le rege me diceva: “Quare tu facie es tanto triste? Tu non pare esser malade. Il debe solmente esser un profunde tristessa de corde”. Isto me rendeva valde timorose^[1], ³e io diceva al rege: “Rege! Que tu vive longemente! Como poterea io non esser triste? Quia le citate ubi il ha le sepulcros de mi ancestres es in ruinas e su portas esseva comburite per le foco”. ⁴E le rege me diceva: “Como poterea io adjuvar te in re isto?”. Alora, con un precaria al Deo del celo, ⁵io replicava: “Si le rege lo reputa bon, e si tu te complace de tu servitor ante te, manda me in Judea al citate ubi il ha le sepulcros de mi ancestres, e io reconstruera le citate”.

⁶Le rege, con le regina qui sedeva juxta ille, me quereva: “Quanto longemente tu vole absentar te? E quando tu intende retornar?”. Depost que io le diceva quanto longemente io intendeva absentar me, le rege se complaceva de acceptar mi requesta e me permitteva partir.

⁷Io alsi diceva al rege: “Si le rege lo reputa bon, que io sia portator de litteras adressate al governatores del provincia a west del Fluvio Euphrate, ut illes me permitte transir, donec io attinge le Judea. ⁸Io necessitarea alsi un littera adressate a Asaph, custode del foresta del rege, ut ille me da bastante ligno. Io lo necessitara pro refacer le portas del fortalessa del Templo, pro le muralias del citate e pro un domo qua mi habitation”. Le rege me accordava iste requestas quia le misericordiose mano de Deo esseva super me.

⁹Quando io perveniva ad le governatores del provincia a west del Fluvio Jordan, io les dava le litteras del rege. Io debe alsi adder que le rege me faceva accompaniar, pro proteger me, de officieros del armea e de equites. ¹⁰Quando, tamen, Sanballat le Horonita e Tobia le officiero ammonita audiva in re mi arrivata, illes habeva multo displacer in apprender que alicuno habeva arrivate pro adjuvar^[2] le populo de Israel.

Nehemia inspecta le muralias de Jerusalem

¹¹Assi, io arrivava in Jerusalem. Tres dies plus tarde, ¹²io me levava durante le nocte e portava alicun homines con me. Io non habeva dicite a alicuno in re le planos que Deo habeva ponite in mi corde pro Jerusalem. Nos non portava con nos alicun animal de transporto, nisi le asinos que nos cavalcava. ¹³De nocte nos sortiva per le Vallea del Porta, ultra le Puteo del Chacal e le Porta del Stercore pro inspectar le muralias ruinate e le portas consumite per le foco. ¹⁴Deinde io vadeva al Porta del Fonte e al Stagno del Rege, ma le asino que io cavalcava non poteva transir a causa del grande fragmentos de lapides que ibi jaceva. ¹⁵Assi, semper de nocte, io ascendeva in vice per le Vallea de Kidron pro inspectar le muros ante que io retornava e entrava de novo per le Porta del Vallea.

¹⁶Le officieros del citate non sapeva que io habeva vadite ibi o lo que io faceva, quia io non ancora habeva dicite a alicuno quales esseva mi planos. Io ancora non habeva parlate al capites del hebreos - le sacerdotes, le nobiles, le officieros, o a alicuno altere in le administration. ¹⁷Ma nunc io les diceva: “Vos sape multo ben in qual situation de affliction nos trova tote nos. Jerusalem jace in ruinas, e le portas esseva consumite per le foco. Vamos reconstruer le muros de Jerusalem e facer cessar iste disgratia!”. ¹⁸Inde io les diceva in re quanto le misericordiose mano de Deo habeva essite super me, e in re mi conversation con le rege. Illes mox replicava: “Si! Vamos reconstruer le muro!”. Assi illes comenciava le bon obra.

¹⁹Quando, tamen, Sanballat le Horonita e Tobia, le officiero ammonita, e Geshem le Arabe, audiva in re nostre planos, illes nos derideva contemptuosemente, e diceva: “Que volerea vos facer? Forsan organisar un rebellion contra le rege?”. ²⁰Io les dava iste responsa: “Le Deo ipse del celo adjuvara nos succeder. Nos es su servitores e nos va comenciar a reconstruer le muros. Vos non ha ulle parte, derecto legal o pretention super Jerusalem”.

Notas

1. O “terrificate”.
2. O “quereva le prosperitate”.