Biblia/Vetule Testamento/Nehemia/Nehemia 6

Nehemia

6

Continua le opposition al reconstruction

¹Sanballat, Tobia, Geshem l’Arabe, e le cetero de nostre inimicos, audiva que io habeva terminate reconstruer le muralia e que nulle fissura residue remaneva - quanquam nos non habeva ancora placiate le valvas del portas. ²Assi Sanballat e Gosem inviava un message petente me de incontrar les in un del villages in le plana de Ono. Io comprendeva, tamen, que illes cogitava damnificar me. ³Ergo, io replicava inviante les iste message: “Io es ingagiate in facer un grande obra e io non pote descender. Il non es opportun que io cessa mi labores pro venir a incontrar vos”. ⁴Quatro vices illes me inviava le mesme message, e cata vice io les dava le mesme responsa. ⁵Le quinte vice, le servitor de Sanballat veniva con un littera aperte in su mano, in le qual esseva scribite:

⁶“Il ha un ruito inter le gentes circumstante, e Geshem me dice que illo es ver, que vos e le Judeos cogita de rebellar vos, e que illo es le ration propter vos reconstrue le muralia. Secundo su reporto, tu vole devenir rege super illes. ⁷Ille reporta alsi que tu appunctava prophetas in Jerusalem pro proclamar a tu reguardo: ‘Ecce, il ha un rege in Judea!’. Tu pote esser certissime que iste reporto va pervenir al rege, assi io suggere que tu veni e parla con me super isto”.

⁸Io replicava: “Il ha nulle veritate in iste ruitos. Tote isto es solmente un chimera de tu imagination”. ⁹Illes simplemente essayava de intimidar nos, cogitante: “Vamos discoragiar les e facer les cessar lor obra”. Assi io continuava le obra, con mesmo plus grande determination^[1].

¹⁰Plus tarde io vadeva visitar Shemaia, filio de Delaia e granfilio de Mehetabel, que esseva detenite in su proprie domo. Ille diceva: “Vamos incontrar nos intra le Templo de Deo, e vamos clauder le portas retro de nos. Iste proxime nocte tu inimicos plana venir occider te”.

¹¹Ma io replicava: “Deberea forsan alicuno in mi position fugir? Deberea alicuno in mi position occultar me in le Templo pro salvar su vita? No, io non lo facera”. ¹²Io comprendeva que il non habeva essite Deo a parlar le, ma que ille habeva pronunciate iste prophetia contra me, quia Tobia e Sanballat le habeva pagate pro dicer isto”. ¹³Illes sperava intimidar me e facer me peccar. Alora illes haberea essite in condition de accusar me e discreditar me.

¹⁴Memora, oh Deo mie, tote le mal cosas que Tobia e Sanballat ha facite. E memora Noadia le propheta e le cetere prophetas como illa que essayava de intimidar me.

Le reconstruction del muralia es finalmente terminate

¹⁵Assi, le muralia esseva terminate le vinti-quinte die del mense de Elul^[2], solmente cinquanta duo dies post que nos habeva comenciate. ¹⁶Quando nostre inimicos e le gentes circumstante audiva in re isto, illes se espaventava e se sentiva humiliate. Illes comprendeva que iste obra habeva essite realisate con le adjuta de nostre Deo.

¹⁷Durante ille cinquanta-duo dies, multe litteras esseva excambiate inter Tobia e le nobiles del Judeos. ¹⁸Quia multes in Juda habeva jurate fidelitate a ille, proque su patre affin Shecania, filio de Ara, e su filio Jehoanan esseva maritate al filia de Meshullam, filio de Berekia. ¹⁹Sed illes le laudava coram me e pois illes le reportava tote lo que io diceva. Ma Tobia continuava inviar me litteras de menacias pro intimidar me.

Notas

1. Litt. “Nostre manos deveniva plus forte”.
2. Le duo de Octobre.