Biblia/Vetule Testamento/Proverbios/Proverbios 30

Le Proverbios

Capitulo 30

Le parolas de Agur

¹Parolas de Agur, filio de Jakeh; le message prophetic que iste homine proclamava a Ithiel, a Ithiel e Ukal.

²“Si, io es un homine stultissime e non ha le sapientia del qual le homines se vanta. ³Io non apprehendeva le sapientia e non ha le cognoscentia del Sancte. ⁴Qui tamen, ascendeva in celo e qui descendeva de illo? Qui contineva le vento in su manos? Qui contineva le aquas in su vestimento? Qui establiva le confinios del Terra? Qual es su nomine e le nomine de su filio - esque tu lo sape? ⁵Omne parolas de Deo es pur e se proba ver. Ille es un scuto pro quicunque se refugia retro ille. ⁶Non adde alco a su parolas, de pavor que tu sia exponite qua un mentitor. ⁷Oh Deo, io te rogava duo cosas. Non denegar me los ante que io mori: ⁸Adjuta me nunquam dicer mendacios e da me ni paupertate ni ricchessas! Da me lo que es justo necessari pro satisfacer a mi necessitates. ⁹Quia si io deveni ric io poterea denegar te e dicer: ‘Qui es le Senior?’. E si io es troppo paupere, io poterea robar e profanar in tal maniera le sancte nomine de Deo”.

¹⁰Nunquam calumnia un servo ante su domino, a que ille non te maledice e tu sia punite.

¹¹Il ha un categoria de personas qui maledice su patre e non benedice su matre. ¹²il ha un categoria de personas qui se reputa pur, ma illes non es nettate ab lor impuritates. ¹³Il ha un categoria de personas cuje oculos es multo superbe e lor palpebras es arrogante. ¹⁴Il ha un categoria de personas cuje dentes es como gladios e cuje molares es como cultellos pro devorar le pauperes ab le facie del Terra e le necessitose ex inter le humanitate.

¹⁵Le sanguisuga ha duo filias, qui dice: “Da me! Da me!”. Il ha tres cosas que nunquam satia, no, quatro, que nunquam dice: “Il suffice!”: ¹⁶le tumba^[1], le ventre sterile, le deserto assetate, le foco flagrante. Illos nunquam dice: “il suffice!”.

¹⁷Le oculo que se burla del patre e disprecia le istructiones del matre essera cavate per le corvos del vallea e mangiate per vultures.

¹⁸Il ha tres cosas que me stupeface - no, quatro cosas que io non comprende: ¹⁹quomodo le aquilas plana trans le celo, quomodo un serpente repta super un rocca, quomodo un nave naviga le oceanos, e quomodo un homine ama un femina^[2].

²⁰Isto es le conducta de un femina adultere: illa mangia, se netta le bucca e pois illa dice: “Io non faceva alco de mal”.

²¹Pro tres cosas le Terra es turbate, no, quatro que illo non pote tolerar: ²²un sclavo qui deveni rege, un persona stulte quando ille es stipate de alimentos, ²³un femina odiose qui trova marito e un serva qui prende le placia de su domina.

²⁴Il ha quatro parve animales sur le terra que es extrememente sage: ²⁵le formicas, que es un populo sin fortia, ma se procura lor alimentos durante le estate; ²⁶le taxones del roccas, que es un populo debile, ma que establi lor habitation inter le roccas; ²⁷le locustas, que ha nulle rege, ma omnes procede in formation; ²⁸le lacertas, que on pote prender los in mano, ma se trova in le palatios del rege.

²⁹Il ha tres esseres que ha un belle positura - no, quatro, que se parada: ³⁰le leon, le plus forte inter le animales, que non recula ante alicuno, ³¹le gallo, un capro, e un rege con su armea circum se.

³²Si tu ageva qua un persona stulte in exaltar te ipse, o si tu pensava mal, pone te le mano sur le bucca, ³³quia verberante le lacte se produce butyro, dante un colpo de pugno al naso se produce sanguine e excitante le ira se produce discordias.

Notas

1. Litt. “le Sheol”, o “Inferno”.
2. O “le via de un homine con un femina”.