Biblia/Vetule Testamento/Psalmos/Psalmos 1

Le Psalmos

1. Beate es le homine que non seque le consilio del impios

In iste psalmo sapiential le autor consilia a su auditorio de repeller le stilo de vita del impios e de esser fedel a Deo. Le psalmista contrasta le destino del impios con illo del justos, accentuante que le destino del impios essera finalmente le perdition durante que le pios prospera sub le cura providente de Deo.

¹Beate^[1] es le homine que non seque le consilio del impios^[2] ni sta in le vias del peccatores, ni se sede con le irrisores^[3]. ²Al contrario, ille trova placer in obedir al voluntate del Senior e medita super illos jorno e nocte. ³Ille es como un arbore plantate apud cursos de aqua fluente, que da su fructo a su tempore e su folios nunquam se sicca. Ille prospera in toto lo que ille face.

⁴Non assi es le impios! Al contrario, illes es como vannatura sufflate per le vento. ⁵Pro iste ration, le impio non potera evitar un judicio de condemnation, ni le peccatores potera seder se con le justos. ⁶Certemente le Senior protege^[4] le justos in lor vias, ma le vias del impios termina in le perdition.

Notas

1. O “Quanto benedicite”, o "felice".
2. Illo es: personas que vive sin considerar in alicun maniera Deo e su leges, que denega su existentia o interesse in lo que illes dice o face e que ergo non ha alicun scrupulo a dicer mentitas, calumniar e deciper alteres.
3. Illo es: personas arrogante que ama le conflicto e rejecta vociferantemente le sapientia e le correction. “Seder in le assemblea” de tal personas significa identificar se completemente con illes in lor projectos e comportamento peccaminose.
4. O “cognosce”.