Biblia/Vetule Testamento/Psalmos/Psalmos 105

Psalmos

105. Va regratias le Senior. Invoca su nomine

Le Psalmista voca Israel a laudar Deo quia ille lo liberava ex Egypto e compliva assi le promissa que Ille les faceva in le Pacto con Abraham. Un version parallel de iste Psalmo se trova in 1 Chronicas 16:8-22.

¹Alleluia! Va regratiar le Senior. Invoca su nomine. Face cognoscer al nationes lo que ille accompliva. ²Canta a ille, canta su laudes. Conta a omnes in re su actiones meraviliose. ³Exulta in su nomine sancte; va allegrar vos, vos qui adora le Senior! ⁴Quere le Senior e su potentia. Quere su facie semper! ⁵Va rememorar le meravilias que ille faceva, su prodigios e le judicios de su bucca, ⁶vos, filios de su servitor Abraham, vos, descendentes de Jacob, su electe.

⁷Ille es le Senior, nostre Deo. Su justicia es visibile per tote le terra. ⁸Ille semper es fidel a su pacto - le ingagiamento que ille prendeva per mille generationes. ⁹Isto es le pacto que ille establiva con Abraham, e le promissas que ille faceva per juramento a Isaac. ¹⁰Ille lo confirmava a Jacob como un decreto, e al populo de Israel como un pacto perenne: ¹¹“Io te dara le terra de Canaan como tu special hereditate”.

¹²Ille lo diceva quando illes esseva pauc de numero, un parve gruppo de peregrinos in Canaan. ¹³Illes vagava ab nation a nation, ab regno a regno. ¹⁴Etsi ille non permitteva que nemo les noceva. Ille preveniva reges in lor nomine: ¹⁵“Non tange mi populo electe, e non face mal a mi prophetas”.

¹⁶Ille vocava un fame super le terra de Canaan; ille accurtava omne provisiones de nutrimento^[1]. ¹⁷Ille mandava un homine avante de illes - Joseph, qui habeva essite vendite qua sclavo. ¹⁸Pedicas affligeva^[2] su pedes e poneva a su collo un collar de ferro, ¹⁹usque al tempore que su predictiones se realisava. Le Senior poneva a proba su character. ²⁰Le rege authorisava postea su emancipation; le dominator de nationes le liberava. ²¹Ille lo incargava de administrar su palatio; ille deveniva le gerente de su proprietates. ²²Le esseva date autoritate de obligar su officieros a su volontate e de docer a su consilieros.

²³Israel se transfereva a in Egypto; Jacob viveva per un certe tempore in le terra de Ham. ²⁴Le Senior rendeva su populo multo fructuose, mesmo plus numerose que su inimicos. ²⁵Deinde ille converteva le cordes del Egyptianos ut illes odiava le Israelitas, e maltractava le servitores del Senior.

²⁶Le Senior, tamen, mandava su servitor Moses, insimul con Aaron, qui ille habeva eligite. ²⁷Illes executava su signos miraculose inter le Egyptianos e prodigios in le terra de Ham. ²⁸Le Senior mandava le tenebras e obscurava le Egypto, quia illes defiava su commando de lassar partir su populo. ²⁹Ille converteva lor aqua in sanguine invenenante lor pisces. ³⁰Lor terra esseva infestate de ranas, e mesmo invadeva le cameras de lecto del rege. ³¹Quando le Senior lo commandava, muscas descendeva super le Egyptianos, e culices essamava trans Egypto. ³²Ille les mandava grandine in vice de pluvia, e fulmines fulgurava super le pais. ³³Ille ruinava lor vineas e fichieros, e fracassava tote le arbores. ³⁴Ille lo commandava e hordas de locustas superveniva - innumerabile juvene locustas. ³⁵Illos devorava tote le verdura del pais, e destrueva tote le messes in le agros. ³⁶Deinde ille occideva le primogenitos in cata un familia de Egypto, le primitias de lor fortias.

³⁷Le Senior conduceva su populo foras de Egypto, cargate de argento e auro, e necuno de su tribus impingeva. ³⁸Egypto esseva felice quando illes partiva, quia illes habeva pavor del Israelitas. ³⁹Le Senior expandeva un nebula pro proteger les e un grande igne pro illuminar les durante le nocte. ⁴⁰illes peteva carne a mangiar, e qualias veniva; ille satisfaceva lor fame con manna - le pan del celo. ⁴¹Ille divelleva un rocca, e aqua sortiva de illo e formava un fluvio trans ille deserto. ⁴² Tote isto eveniva quia ille se rememorava de su sacre promissa que ille habeva facite a su servitor Abraham. ⁴³Quando ille portava su populo foras de Egypto con gaudio, su electos con exultation. ⁴⁴ille dava a su populo le terras de nationes pagan, e illes recoltava messes que alteres habeva plantate.

⁴⁵Tote isto eveniva ut illes observava su commandamentos e obediva a su leges. Alleluia, lauda Deo!

Notas

1. Isto se refere al fame que eveniva durante le tempore de Joseph (v, vers. 17 e Genesis 41:53-57).
2. O “lacerava”.