Biblia/Vetule Testamento/Psalmos/Psalmos 115

Psalmos

115. Non a nos, Senior, non a nos, sed a tu nomine da gloria

Le psalmista affirma que le Deo de Israel es superior a idolos pagan e exhorta Israel a confider in ille.

¹Non a nos, Senior, non a nos, sed a tu nomine da gloria, propter tu misericordia e tu veritate. ²Quare le gentes dice: “Ubi es lor Deo?”? ³Nostre Deo es in le celos e ille face quecunque ille vole. ⁴Le simulacros^[1] del gentes es simplemente argento e auro, le obra de manos human. ⁵Illos ha buccas, ma non pote parlar; illos ha oculos, ma non pote vider. ⁶Illos ha aures, ma non pote audir; illos ha nares, ma non pote olfacer. ⁷Illos ha manos, ma non pote palpar; illos ha pedes, ma non pote ambular; e guttures, ma non pote emitter sonos. ⁸E illes qui los face o se confide in illos es justo simile a tal idolos.

⁹Oh Israel, confide^[2] in le Senior! Ille es tu adjutor e protector^[3]. ¹⁰Oh sacerdotes, descendentes de Aaron, confide in le Senior! Ille es vostre adjutor e protector. ¹¹Vos omnes qui time le Senior, confide in ille! Ille es vostre adjutor e protector.

¹²Le Senior se rememora de nos e benedicera nos. Ille benedicera le populo de Israel e benedicera le sacerdotes, descendentes de Aaron. ¹³Ille benedicera les qui time le Senior, ab le minores al majores^[4].

¹⁴Que le Senior benedice generosemente vos e vostre filios. ¹⁵Que vos sia benedicite per le Senior, qui faceva Celo e Terra. ¹⁶Le celos pertine al Senior, ma le Terra esseva date al humanitate integre^[5]. ¹⁷Le mortos non pote cantar laudes al Senior, quia illes vadeva a in le silentio del tumba. ¹⁸Nos tamen, pote laudar le Senior, nunc e semper! Que le Senior sia laudate!

Notas

1. O “idolos”.
2. O “spera”.
3. O “scuto”.
4. O “sia juvenes sia veteres”.
5. Litt. “al filios del homines”.