Biblia/Vetule Testamento/Psalmos/Psalmos 22

←Psalmos 21

Le Biblia in Interlingua Psalmos

Psalmos 23→

Psalmos

22. Deo, Deo mie, quare tu me derelinqueva?

Le psalmista clama a Deo ut ille le libera ab su periculose inimicos, qui le ha circumferite e menacia su vita. Ille confide que le Senior intervenira e le adjuvara, deide ille promitte de regratiar publicamente le Senior propter su adjuta e pensa al tempore quando tote le populo recognoscera le grandor del Senior e le adorara.

¹Pro le magistro del choro. Un psalmo de David a cantar secundo le tono de “Cerva del Aurora. Deo, Deo mie, quare tu me derelinqueva? Quare tu es assi longe de me e de mi gemitos? ²Deo mie, io clama omne dies, e tu non me ascolta. Cata nocte io leva mi voce, ma io non trova ulle relevamento. ³Tamen, tu es sancte, inthronate in le laudes de Israel. ⁴Nostre ancestres sperava in te e tu les liberava. ⁵¹Illes clamava a te, e tu les salvava. Illes confideva in te e illes esseva nunquam deludite. ⁶Ma io es un verme e non un homine; pro le plebe io deveniva un objecto de reproches e de abjection! ⁷Omnes qui me vide me irride. Illes surride sarcasticamente e succute lor capites, dicente: ⁸“Ille sperava in le Senior: que ille le salva nunc! Si le Senior tanto le ama, que ille veni a su auxilio!”. ⁹Quia tu es le qui me extraheva del ventre de mi matre, e me duceva a confider in te quando mi matre me atettava. ¹⁰Io esseva projectate in tu bracios a mi nascentia. Tu esseva mi Deo desde le tempore quando io esseva in le ventre de mi matre. ¹¹Non remane assi longe de me, quia mi tribulation es proxime e il ha necun altere qui pote adjuvar me! ¹²Mi inimicos me circumfere sicut un grege de tauros; fer tauros de Bashan me assediava. ¹³Sicut leones, illes aperi lor mandibulas contra me, rugiente e preste a facer de me lor preda. ¹⁴Sicut aqua io es effundite e tote mi ossos es dislocate. Mi corde es como cera que se liqueface intra me. ¹⁵Mi fortias se siccava como argilla cocite sub le Sol. Mi lingua adhere al palato. Tu me faceva jacer in le pulvere como si io jam haberea essite morte. ¹⁶Mi inimicos me circumfere sicut un muta de canes; un banda de homines malefic me assedia. Illes perciava mi manos e mi pedes. ¹⁷Io pote numerar tote mi ossos. Mi inimicos me contempla con satisfaction. ¹⁸Illes divideva inter se mi vestimentos e los jocava a datos. ¹⁹Oh Senior, non remane longe de me. Tu es mi fortitude; veni tosto a mi adjuta! ²⁰Salva me del gladio; sparnia mi vita preciose ab iste canes. ²¹Abucca me ex le mandibulas del leon e ab le cornos de iste boves salvage.

²²Io proclamara tu nomine inter mi fratres e sorores. Io te laudara in le medio de tu populo congregate. ²³Lauda le Senior, oh vos omnes qui le time! Glorifica le, tote vos descendentes de Jacob! Monstra le reverentia, vos omnes descendentes de Israel! ²⁴Quia ille non ignorava ni dispreciava le affliction del pauperes, ni ille se averteva^[1] ab illes, e quando illes clamava ad ille, ille les exaudiva. ²⁵Io te laudara in le grande assemblea. Io complira mi votos al presentia de tote les qui te adora^[2]. ²⁶Le pauperes mangiara e essera satisfacite. Tote illes qui quere le Senior le laudara. Lor cordes exultara con gaudio eterne. ²⁷Le terra integre recognoscera le Senior e retornara a ille. Tote le familias del nationes se prosternera coram ille. ²⁸Quia le poter regal pertine al Senior. Ille domina super le gentes. ²⁹Tote le populos prospere del terra se unira al celebration e te adorara; tote illes qui descende in le tumbas se prosternera coram ille, includite illes cuje vita terminara in pulvere. ³⁰Nostre filios alsi le servira. Generationes futur audira re le meravilias del senior. ³¹Su actos de justitia essera contate a illes qui ancora non ha nascite. Illes audira re tote lo que ille faceva.

Notas

1. O “verteva su dorso”.
2. O “qui te time”.