Biblia/Vetule Testamento/Psalmos/Psalmos 32

Psalmos

32. Beate es illes, cuje iniquitates esseva remittite

Le psalmista memora le experientia de angustia que ille habeva ante confessar su peccatos, e ille affirma que le ver felicitate veni quando nostre peccatos es remittite. Ille, pois, exhorta alteres a non esser restive ma reverter se a Deo durante que le pardono es disponibile, quia Deo extende su misericordia a illes que se repente. Le impies, tamen, habera nulle altere experientia que le dolo.

¹Un psalmo de David. Contemplation^[1]. Beate^[2] es illes, cuje iniquitates^[3] esseva remittite e cuje peccatos esseva interrate^[4]! ²Beate es illes al quales le Senior non imputa le peccato, e in cuje spirito il ha nulle hypocrisia^[5]! ³Quando io refusava confessar mi peccato, mi integre corpore deperiva^[6] durante que io gemeva de dolor per tote le die. ⁴Quia die e nocte tu mano gravava super me; in le ardor del estate mi vigor evaporava. Interludio.

⁵Finalmente io confessava a te mi peccato; io non occultava mi malfactos. Io diceva: “Io confessara al Senior mi actos de rebellion, e tu remitteva le impietate de mi peccatos. Interludio.

⁶Propter isto, que cata un de tu fideles^[7] eleva verso te su orationes durante que il ha ancora tempore, ut illes non va necar in le multe aquas del diluvio de tu adveniente^[8] judicio.

⁷Tu es mi refugio; tu me protege ab le tribulation. Tu me circumfere con le critos de gaudio de illes que celebra le salvation. Interludio.

⁸Le Senior dice: “Io va instruer e docer te in re le vias que tu debe percurrer. Io firmara super te mi oculos. ⁹Non sia sicut cavallos e mulos, in le quales il non ha intellecto. Illos non te obedi si non illos es constringite per bridas e morso.

¹⁰Multe dolores adveni al impios, ma le misericordia del Senior circumfere illes que se confide in te. ¹¹Allegra vos in le Senior e exulta, oh justos! Va critar de gaudio, oh vos omnes qui es recte de corde^[9]!

Notas

1. Hebr. מַ֫שְׂכִּ֥יל (maskil).
2. O “benedicte”. Le sentimento communicate con le termino “benedicte, significa beate, felice. Iste sentimento resulta del communion con Deo. Il es alsi le gaudio que resulta del pardono consequente le sincere confession de peccato.
3. O “actos de rebellion”.
4. O “pardonate”, litt. “coperite”. Passive (construct) כְּסוּי חֲטָאָה coperite reguardo al peccato (per Deo, que assi los occulta, non los face plus vider) ("" נְשׂוּימֶּֿשַׁע).
5. O “dolo”. Illo es, le persona que honestemente recognosce ante a se mesme e a Deo de haber committite lo que Deo considera un peccato e de meritar condemnation pro illo.
6. O “inveterava”, “se consumeva”.
7. O “sanctos”.
8. O “que se approxima”.
9. O “pur de corde”, moralmente recte.