Biblia/Vetule Testamento/Psalmos/Psalmos 40

Psalmos

40. Io me remitteva completemente al Senior

Le psalmista conjunge un cantico de rendimento de gratias pro un recente acto de liberation con un fiduciose petition pro un nove intervention de Deo.

¹Pro le maestro del choro. Un psalmo de David. Io me remitteva completemente^[1] al Senior e ille se verteva verso me e audiva mi crito de adjuta. ²Ille me levava foras del puteo^[2] in le qual io cadeva, foras del fango viscose. Ille me poneva con le pedes firmemente sur le rocca e me forniva assi de un solide fundamento.

³Ille me dava un ration pro cantar un nove cantico^[3], un hymno de laude a nostre Deo. Que multes vide lo que Deo ha facite, tanto que illes va confider in le Senior e respectar le^[4]. ⁴Beate es le homine que pone su sperantia in le Senior e nulle fiducia in le superbes e in le mentitores de iste mundo.

⁵Oh Senior, mi Deo, tu accompliva multe meravilias; tu cogitava e faceva pro nos cosas stupefaciente. Nemo es simile a te. Io volerea contar e describer a omnes tu meraviliose actos, ma illos es troppo numerose pro facer lo satis ben. ⁶Reciper sacrificios e offertas non es tu interesse primari: isto tu me lo acclarava ben. Tu non require plus holocaustos e offertas pro le peccatos.

⁷Alora io diceva: “Ecce, io veni! In le volumine de tu libro il es scribite de me. ⁸Io vole accomplir tu voluntate; tu leges es scribite in mi corde”. ⁹Io contava ante le assemblea de tu populo in re tu justitia. Io non sparniava mi parolas. Oh Deo, tu sape que isto es ver. ¹⁰Io non reteneva celate in mi corde le bon nova de tu justitia. Io diceva a omnes in le grande assemblea in re tu amor fidel e tu potentia de salvation.

¹¹Oh Senior, tu non retene ab me tu compassion. Que tu amor loyal e fidelitate me protege continuemente! ¹²Quia innumerabile periculos me circumfere; illos es troppo numerose ut enumerar los! Mi peccatos se accumula tanto alte que io non pote vider un via pro exir de illos. Illos es plus numerose que le capillos de mi capite e io me perdeva de corage! ¹³Per favor, oh Senior, que te complace de liberar me! Oh Senior, hasta te a adjutar me! ¹⁴Que tote illes qui essaya de destruer me sia humiliate e avergoniate. Que tote illes que se allegra de mi afflictiones se reverte e dispare con disgratia. ¹⁵Que illes sia horrificate de vergonia, quia illes diceva: “Aha! Aha! Nunc nos le va caper!”. ¹⁶Ma omne illes qui te quere exulta e se allegra, e semper va exclamar: “Le Senior es eminente!”.

¹⁷Io es opprimite e necessitose. Que le Senior presta attention a me. Tu es mi adjuta e mi liberator. Oh Deo, non tarda tu intervention!

Notas

1. O “io expectava patientemente”.
2. O “del puteo aquose”, “laco del miseria”, metaphora pro le demora del mortos, le Sheol.
3. Litt. “Ille poneva in mi bucca un cantico nove”.
4. O “haber timor de ille”.