Biblia/Vetule Testamento/Psalmos/Psalmos 94

Psalmos

94. Oh Senior, Deo del vindicantia!

Le psalmista pete a Deo de condemnar le malfactores e affirma su fiducia in le justitia de Deo.

¹Oh Senior, Deo del vindicantia! Oh Deo del vindicantia, revela tu splendor! ²Surge, oh judice del Terra. Da al superbe lo que illes merita. ³Usque a quando, oh Senior, usque a quando al peccatores essera permittite de exultar^[1]? ⁴Illes lancea menacias e parla con attitude defiante; omne illes se gloria de lor iniquitates. ⁵Oh Senior, illes fulla tu populo; illes opprime le nation que te pertine. ⁶Illes occide le viduas e le estranieros, e illes assassina le orphanos. ⁷Illes dice alsi: “Le Senior non vide lo que nos face; de facto, al Deo de Jacob isto non importa!”.

⁸Prende nota de isto, vos populo insipiente. E vos stultos, quando vos comprendera? ⁹Esque ille qui faceva le aures human non pote audir? Esque ille qui formava le oculos non pote vider? ¹⁰Esque ille qui disciplina le nationes non inflige punitiones? Qui doce le scientia^[2] al homines, si non Deo? ¹¹Le Senior sape que le cogitationes human es sin valor^[3]!

¹²Beate es le homine, quem tu erudi, oh Senior, le persona al qual tu doce tu leges. ¹³Solmente isto pote mitigar le tempores de affliction usque le momento in le qual le peccatores essera destruite. ¹⁴Quia le Senior certemente non repelle su populo; ille non derelinquera le nation que le pertine. ¹⁵Le justitia prevalera e qui es moralmente recte essera vindicate.

¹⁶Qui surgera pro proteger me contra le malfactores? Qui stara pro me adverso le malfactores? ¹⁷Si le Senior non habeva adjuvate, io tosto haberea habitate in le silentio del tumba. ¹⁸Io clamava: “Mi pedes glissa!”, ma tu misericordia, Senior, me susteneva. ¹⁹In le multitude del sollicitudes de mi corde, tu consolationes allegrava mi anima.

²⁰Poterea rectores cruel pretender que Deo es de lor latere - rectores cuje decretos permitte injustitias? ²¹Illes conspira contra le vita del justos e condemna a morte le innocente. ²²Ma le Senior es le fortalessa que me protege; mi Deo es le rocca solide sur le qual io me refugia. ²³Ille les repagara pro lor iniquitates. Ille les destruera propter lor peccatos. ²⁴Le Senior nostre Deo les destruera.

Notas

1. O “triumphar”.
2. “cognoscentia”.
3. O “in bancarupta moral”; o “le Senior sape que le presumption human es futile”.