Biblia/Vetule Testamento/Reges/1Reges 10

1 Reges

10

Incontro con le regina de Saba

¹Quando le Regina de Saba audiva in re le fama de Salomon, que faceva honor al nomine del Senior, illa veniva pro poner le a proba con difficile questiones^[1]. ²Illa entrava in Jerusalem con un grande exhibition de pompa, portante con se camelos cargate de species e un grandissime quantitate de auro e de gemmas preciose. Quando illa incontrava Salomon, illa le submitteva omne sorta de questiones, tote lo que la veniva in mente^[2]. ³Salomon habeva responsas pro tote su questiones; nulle question esseva troppo complexe pro le rege^[3]. ⁴Quando le regina de Saba constatava quanto grande esseva le sapientia de Salomon e videva le palatio que ille habeva edificate, ⁵le vivandas in su sala de banchettos, su servitores e attendentes, lor robas, le cupperos, e le holocaustos que ille presentava in le templo del Senior, illa restava plen de stupefaction. ⁶Illa diceva al rege: “Tote lo que io audiva in mi pais in re tu complimentos e sapientia es ver! ⁷Io non credeva a lo que on me diceva donec io ipse veniva e lo constatava con mi proprie oculos! De facto, ancora non me esseva contate le medietate de lo que on me reportava! Tu sapientia e prosperitate multo superpassa lo que io audiva! ⁸Vermente beate es tu attendentes qui sta coram te semper e audi tu sapientia! ⁹Que le Senior tu Deo sia laudate quia ille te concedeva su favor e poneva te super le throno de Israel! A causa de su eterne amor pro Israel Deo te constitueva rege ut tu governa con judicio e justitia”. ¹⁰Inde illa donava al rege cento vinti talentos de auro, un grande quantitate de species e gemmas preciose. Le quantitate de species que le regina de Saba donava a Rege Salomon nunquam esseva superate de alicun altere.

¹¹Jam le flotta de Hiram, que portava auro de Ophir, habeva alsi portate de Ophir un grande quantitate de fin ligno^[4] e gemmas preciose. ¹²Con le ligno le rege faceva balustradas pro le templo del Senior e pro le palatio regal e instrumentos a corda pro le musicantes. Usque al presente die, nemo plus ha vidite tanto de iste ligno fin.

¹³Rege Salomon donava al regina de Saba quecunque illa voleva, in ultra a lo que ille jam le habeva generosemente offerite. Deinde illa partiva e retornava a in su terra con le attendentes que habeva portate con se.

Le ricchessa e splendor de Salomon

¹⁴Salomon recipeva per omne singule anno, sex centos sexanta sex talentos de auro, ¹⁵in ultra al receptas que proveniva del tributos de su subjectos, mercantes, reges arabe e governatores del pais.

¹⁶Rege Salomon faceva alsi duo centos scutos de auro pur, sex centos mensuras de auro esseva empleate pro cata scuto. ¹⁷Ille faceva alsi tres centos parve scutos de auro martellate; pro cata un de iste scutos esseva empleate tres minas de auro. Le rege los placiava in le Palatio del Foresta del Libano.

¹⁸Rege Salomon etiam faceva un grande throno decorate con ebore e laminate con auro pur. ¹⁹Il habeva sex grados que montava al throno e le summitate del throno esseva rotunde in su parte posterior. Le throno habeva duo appoiabrachios e le statua de un leon que stava a ambe latere del del throno. ²⁰Il habeva alsi dece duo altere leones al extremitate del sex grados. In nulle altere regno il habeva un throno comparabile a illo!

²¹Tote le cuppas pro biber de Salomon esseva facite de auro, como lo esseva alsi tote le utensiles in le Palatio del Foresta del Libano. Illos non esseva facite de argento, proque in le dies de Salomon le argento esseva reputate sin valor!

²²Le rege habeva un flotta de grande naves mercantil que navigava con le flotta de Hiram. Un vice cata tres annos le naves retornava, cargate de auro, argento, ebore, simias e pavones.

²³Salomon esseva plus opulente e sapiente que un qualcunque altere rege del terra. ²⁴Gente de omne nation veniva visitar Salomon pro consultar le e pro audir le sapientia que Deo le habeva date. ²⁵Anno post annos le visitatores portava lor donos, que includeva objectos de argento, objectos de auro, vestes, armas bellic, species, cavallos e mulos.

²⁶Salomon constitueva un large fortias de carros de guerra e de cavallos. Ille habeva mille quatro centos carros e dece duo milles cavallos. Ille los disponeva alicunes in le citates pro isto assignate e alicunes apud ille in Jerusalem. ²⁷Le rege rendeva le argento in Jerusalem tanto abundante quanto le petras. Le ligno de preciose cedro esseva tanto commun quanto le fichieros de sycomoro que cresce al pedes del collinas de Juda. ²⁸Le cavallos de Salomon esseva importate del Egypto e del Cilicia; le negotiatores los acquireva del Cilicia al precio standard. ²⁹In ille tempores le carros de Egypto poteva esser emite al precio de sex centos pecias de argento, e le cavallos pro cento cinquanta pecias de argento. Illes alsi vendeva carros de guerra e cavallos a omne le reges del Hittitas e al reges de Syria.

Notas

1. O “enigmas”.
2. O “in su corde”.
3. O “Salomon la explicava tote le enigmas que illa le submitteva: nulle enigma esseva troppo complexe pro le rege”.
4. O “ligno de sandalo”, o “santal”.