Biblia/Vetule Testamento/Reges/1Reges 9

1 Reges

9

Secunde apparition de Deo a Salomon

¹Postquam Salomon completava le construction del Templo del Senior e del palatio regal, insimul a tote le altere projectos de construction que ille habeva se proponite realisar, ²le Senior le ha apparite pro le secunde vice, in le mesme maniera que ille le habeva apparite a Gabaon.

³Le Senior le ha dicite: “Io satisfaceva a tu prece e a tu requesta de adjuta que tu me faceva. Io sanctificava iste templo que tu edificava: in illo mi nomine essera pro sempre honorate. Io essera ibi constantemente presente^[1]. ⁴Si tu te comportara coram me sicut se comportava David, tu padre, in semplicitate de corde e in equitate, e tu facera tote lo que io te prescribeva, observante mi leges e mi judicios, ⁵alora io establira pro semper le throno de tu dynastia super Israel, quia io faceva iste promissa a tu patre David: “Un del tu descendentes semper sedera sur le throno de Israel”.

⁶Ma si tu o tu filios va averter se de me, e non seque ni observa le mandatos e le decretos, que io proponeva vos, e decide de servir e adorar altere deos, ⁷alora io removera Israel del terra que io dava les; io quitara iste templo que io sanctificava con mi presentia, e Israel devenira un objecto de derision e de observationes sarcastic inter le nationes. ⁸Iste templo ipse devenira un cumulo de ruinas. Omnes qui transitara per iste loco essera stupefacite e sibilara lor disdigno, dicente: “Quare le Senior ha facite isto a iste terra e iste templo?”. ⁹Alteres les respondera: “Quia illes derelinqueva le Senior lor Deo, le qual faceva sortir lor ancestres de Egypto. Illes imbraciava altere deos, que illes adorava e coleva. Isto es le ration que induceva le Senior a facer cader super illes tote iste disgratias”.

Excambios con le rege de Tyro

¹⁰Post vinti annos, durante le quales Salomon edificava le templo del Senior e le palatio regal, rege Salomon dava a rege Hiram de Tyro vinti citates in le region del Galilea, ¹¹quia Hiram habeva supplite Salomon de tote le ligno de cedro e de cypresso e tote le auro que Salomon requireva. ¹²Quando Hiram, tamen, sortiva de Tyro pro inspicer le citates que Salomon le habeva date, illos non esseva agradabile a su oculos. ¹³Hiram le diceva: “Qual sorta de citates es istos, fratre mie?”. Assi, Hiram appellava ille area Chabul (que significa “sin valor”), justo como illo es cognoscite usque nunc. ¹⁴Totevia, Hiram habeva date al rege 120 talentos^[2] de auro.

Le multe complimentos de Salomon

¹⁵Pro edificar le templo del Senior, le palatio regal, le structuras de supporto^[3], le muralias de Jerusalem e le citates de Hazor, Megiddo e Gezer, le rege Salomon empleava gruppos de laboratores conscribite^[4]. ¹⁶Pharaon, le rege de Egypto, habeva attaccate, captivate e comburite Gezer, occidente le population cananita que habitava in le citate. Ille dava le citate in dote a su filia quando illa maritava Salomon. ¹⁷Salomon, ergo, reconstrueva Gezer. Ille edificava alsi le citates de Bethoron inferior, ¹⁸Baalath e Thamar in le deserto intra su territorio. ¹⁹Ille edificava citates como centros de approvisionamento e citates ubi su carros de guerra e cavallos poteva esser postate. In Jerusalem, in Libano e per su integre dominio Salomon edificava quecunque ille desirava.

²⁰Plure populationes non-israelita esseva lassate in le territorio depost le conquista de Josue, includite le Amoritas, le Hittitas, le Perizzitas, le Hivitas e le Jebusitas. ²¹Lor descendentes habeva remanite in le pais (le Israelitas non les habeva potite exterminar). Salomon les conscribeva pro le labores fortiate, e illes ha continuate servir in ille rolo usque a iste dies. ²²Pro iste labores fortiate Salomon non conscribeva ulle israelita. Le israelitas serviva como su soldatos, attendentes, officieros, carreros, e commandantes de su fortias de carreros e equites. ²³Iste homines esseva alsi appunctate como supervisores del projectos de labores de Salomon; il habeva un total de 550 homines que superintendeva le laboratores. ²⁴Salomon transfereva su sposa, le filia de Pharaon, ab le Citate de David al nove palatio que pro illa esseva edificate. Deinde ille edificava le structuras de supporto.

²⁵Tres vices pro anno Salomon presentava holocaustos e offertas de pace super le altar que ille habeva edificate pro le Senior. Ille alsi combureva incenso coram le Senior. Assi ille completava le obra de construction del Templo.

²⁶Rege Salomon alsi faceva un flotta de naves in Ezion-Geber, un porto apud Elath in le pais de Edom, in le litore del Mar Rubie.²⁷Hiram mandava equipages experte de su marineros pro navigar con le homines de Salomon. ²⁸Illes navigava usque a Ophir e portava a Salomon 420 talentos^[5] de auro.

Notas

1. Litt. “Mi corde e mi oculos essera ibi tote le dies”.
2. Quatro milles kilos de auro.
3. Hebr. Mello (המלוא) structura de petras a grados empleate pro supportar o defender le edificios de jerusalem, vallo.
4. Labores fortiate.
5. Plus de 14.000 kilos.