Biblia/Vetule Testamento/Reges/1Reges 14

1 Reges

14

¹In ille tempore le filio de Jeroboam cadeva multo malade. ²Assi Jeroboam diceva a su uxor: “Leva te e disguisa te ut nemo va recognoscer que tu es le uxor de Jeroboam, e vade a Shilo, ubi es le propheta Ahija, le homine que me diceva que io haberea regnate super iste populo. ³Porta le un dono de dece panes, alicun tortelettas e un vaso de melle. e pete le que evenira al puero”.

⁴Le uxor de Jeroboam faceva como la habeva dicite. Illa vadeva a Shilo a facer visita a Ahija. Ora Ahija non poteva vider, quia ille habeva perdite su vista a causa de su senectute. ⁵Le Senior, tamen, habeva dicite a Ahija: “Ecce, le uxor de Jeroboam va venir pro consultar te super su filio, que cadeva multo malade. Responde la con le parolas que io te da. Quando illa venira, illa simulara esser alicun altere”. ⁶Quando Ahija audiva le sono del passos de ille femina que entrava per le porta, ille diceva:

“Entra, uxor de Jeroboam, quare simula tu esser un altere persona? Io esseva commissionate dar te mal novas. ⁷Vade a dicer a Jeroboam: ‘Isto dice le Senior, Deo de Israel: Io te exaltava ex inter mi populo Israel e te rendeva duce super mi populo Israel. ⁸Io divelleva le regno del manos del dinastia davidic e lo dava a te. Tu non es, tamen, sicut mi servitor David, qui obediva a mi commandamentos e me sequeva con tote su corde faciente solmente lo que io approba. ⁹Tu faceva lo que es mal multo plus que omne alteres qui esseva ante te. Tu me faceva inragiar faciente pro te deos alien fabricate de metallo; tu completemente faceva abstraction de me. ¹⁰Assi io es preste a inducer disastros super le dinastia de Jeroboam. Io percutera cata un de tu descendentes masculin in Israel, includite le debiles e le incapaces. Io ardera le dinastia de Jeroboam, justo como se arde le composto donec illo es completemente consumite. ¹¹Le membros del familia de Jeroboam qui mori in le citate essera devorate de canes, e illes qui mori in le campos essera devorate de vultures. Io, le Senior, ha parlate’. ¹²Tu, igitur, leva te e vade a tu domo, e in le exacte momento que tu pedes entrara in le urbe, le puero va morir. ¹³Tote Israel le lugera e convenira pro su inhumation. Ille essera le sol membro de tu familia qui habera un proprie inhumation, quia iste puero es le sol in le integre familia de Jeroboam, in le qual le Senior, Deo de Israel, trovava alco de bon. ¹⁴Le Senior constituera pro ille un rege super Israel, qui destruera le familia de Jeroboam. Isto es preste a evenir! ¹⁵Deinde le Senior succutera Israel sicut un canna verberate del aqua de un torrente. Ille evellera Israel de iste bon terra que ille dava a lor ancestres e les dispergera usque trans le Fluvio Euphrate, quia illes irritava le Senior erigente idolos^[1] pro adorar Asherah. ¹⁶Ille derelinquera Israel a su inimicos propter le peccatos committite de Jeroboam, qui peccava e faceva peccar Israel”.

¹⁷Assi, le uxor de Jeroboam se levava e retornava a Tirzah. Justo quando illa entrava per le limine del domo, le puero moriva. ¹⁸Omne Israel conveniva pro su inhumation e lugeva pro ille, como le Senior habeva dicite per le medio del propheta Ahijah.

Le fin del regno de Jeroboam

¹⁹Le resto del evenimentos del regno de Jeroboam, includite le detalios de su guerras e como ille habeva regnate, es scripte in le rolos de pergamena appellate le Annales del Reges de Israel. ²⁰Jeroboam habeva regnate per vinti-duo annos. Depost le morte de Jeroboam, su filio Nadab le reimplaciava qua rege.

Le regno de Rehoboam super le Giudea

²¹Intertanto, Rehoboam, filio de Salomon regnava in Judea. Ille habeva quaranta-uno annos quando ille deveniva rege e ille regnava per dece-septe annos in Jerusalem, le citate que le Senior habeva eligite ex omne le tribo de Israel pro esser su demora^[2]. Su matre esseva un femina ammonite appellate Naama.

²²Durante le regno de Rehoboam, le populo de Judea faceva lo que es mal coram Deo, e le irritava con lor peccatos, quia illes faceva mesmo pejo que lor ancestres. ²³Illes mesmo edificava pro se sanctuarios pagan, erigeva columnas sacre e palos de Asherah super le culmine de collinas e sub omne arbore frondose^[3]. ²⁴Il habeva mesmo prostitution sacre masculin in le pais. Illes committeva le mesme abominationes del nationes que le Senior habeva expellite de ille terra ante le arrivata del Israelitas.

²⁵In le quinte anno del regno de Rehoboam, rege Shishak de Egypto attaccava Jerusalem. ²⁶Ille saccheava le thesauros del domo del Senior e del palatio regal; ille furava toto, includite le scutos auree que Salomon habeva facite. ²⁷Rege Jeroboam faceva scutos de bronzo pro reimplaciar los e los assignava al officieros del guarda regal que protegeva le entrata del palatio regal. ²⁸¹Quandocunque le rege visitava le templo del Senior, le guarda regal los apportava e pois los reportava in le armeria del guardas.

²⁹Le resto del evenimentos del regno de Rehoboam, includite su gestas e toto lo que ille faceva es scribite in le rolo de pergamenas appellate le Annales del Reges de Judea. ³⁰Rehoboam e Jeroboam esseva continuemente in guerra le un contra le altere. ³¹Quando Rehoboam moriva, ille esseva inhumate inter su ancestres in le Citate de David. Su matre esseva Naama, un femina ammonita. Su filio Abija le reimplaciava qua rege.

Notas

1. O “palos”.
2. Litt. “pro placiar su nomine”.
3. O “semperverde”.