Biblia/Vetule Testamento/Reges/1Reges 16

1 Reges

16

¹Iste es le message del Senior contra Baasha que perveniva a Jehu, filio de Hanani: ²“Io te levava del pulvere e te rendeva duce de mi populo Israel, ma tu sequeva le mal exemplo de Jeroboam. Tu provocava mi ira faciente peccar mi populo Israel. ³Assi io es preste a falcar Baasha e su familia sicut io lo faceva con le descendentes de Jeroboam, filio de Nebat. ⁴Le membros del familia de Baasha qui mori in le citate essera devorate de canes, e illes qui mori in le campos essera mangiate de vultures”.

⁵Le resto del evenimentos del regno de Baasha, includite su gestas, complimentos e extension de su potestate, es scripte in le libro appellate le Annales del Regno de Israel. ⁶Quando Baasha moriva, ille esseva inhumate in Tirza. Su filio Elah le reimplaciava qua rege de Israel. ⁷Le message del Senior contra Baasha e su familia perveniva per le medio del propheta Jehu, filio de Hanani. Illo esseva livrate quia Baasha habeva facite lo que es mal coram le Senior (justo sicut habeva facite le familia de Jeroboam). Le ira del Senior esseva provocate propter le peccatos de Baasha.

Elah regna super Israel

⁸Elah, filio de Baasha comenciava regnar super Israel in le anno vinti-sex del regno de Rege Asa in Judea. Elah regnava in le citate de Tirzah per duo annos.

⁹Deinde, Zimri, qui commandava le medietate del carros de guerra regal, excogitava planos pro occider le. Un die in Tirzah, Elah se inebriava in le domo de Arza, le supervisor del palatio de Tirzah. ¹⁰Zimri irrumpeva in le domo, le percuteva e le occideva. Isto eveniva in le anno vinti-septe del regno de Asa in Judea. Deinde Zimri regnava in su placia.

¹¹Zimri immediatemente assassinava le integre familia regal de Baasha, e non derelinqueva un singule infante masculin. Ille mesmo occideva parentes proxime e amicos. ¹²Assi Zimri destrueva le dinastia de Baasha sicut le Senior habeva promittite per le medio del propheta Jehu. ¹³Isto eveniva propter tote le peccatos que habeva committite Baasha e su filio Elah, e propter le peccatos que illes habeva inducite le populo a committer. Illes provocava le ira del Senior, le Deo de Israel, con lor idolos sin valor.

¹⁴Le resto del evenimentos del regno de Baasha, includite su gestas toto lo que ille faceva, es scripte in le libro appellate le Annales del Regno de Israel.

Zimri regna super Israel

¹⁵Zimri comenciava regnar super Israel in le anno vinti-septe del regno de Asa in Judea, ma le regno de Zimri durava solmente septe dies. Tunc le armea de Israel attaccava le citate philistee de Gibbethon. ¹⁶Quando illes audiva que Zimri habeva committite traition e habeva assassinate le rege, ille mesme die illes seligeva Omri, commandante del armea, qua le nove rege de Israel. ¹⁷Assi Omri conduceva le integre armea de Israel a attaccar Tirzah, le capital de Israel. ¹⁸Quando Zimri videva que le citate habeva essite expugnate, ille entrava in le citadella del palatio e lo incendiava super se ipse, e ille moriva in le flammas. ¹⁹Quia anque ille habeva facite lo que es mal coram Deo. Ille habeva sequite le mal exemplo de Jeroboam in tote le peccatos que ille committeva e inducite Israel a committer.

²⁰Le resto del gestas de Zimri e del rebellion que ille instigava es scripte in le libro appellate le Annales del Regno de Israel.

Omri regna super Israel

²¹Nunc, tamen, le gente de Israel esseva scindite in duo factiones. Le medietate del populo essayava establir qua rege Tibni, le filio de Ginath, durante que le altere supportava Omri. ²²Ma le partisanos de Omri prevaleva super le partisanos de Tibni. Assi Tibni esseva occidite e Omri deveniva le nove rege. ²³Omri comenciava regnar super Israel in le anno trenta-quatro del regno de Asa in Judea. Ille regnava in toto per dece-duo annos, sex del quales in Tirzah. ²⁴Deinde Omri emeva le collina nunc cognite qua Samaria ab su proprietario, Shemer, pro duo talentos de argento. Super illo ille edificava un citate e lo appellava Samaria in honor de Shemer. ²⁵Omri, tamen, faceva lo que es mal coram Deo, mesmo plus que qualcunque altere rege ante ille. ²⁶Ille sequeva le mal exemplo de Jeroboam, filio de Nebat, in tote le peccatos que ille committeva e induceva Israel a committer. Le populo provocava de ira del Senior, le Deo de Israel, con lor idolos sin valor.

²⁷Le resto del evenimentos del regno de Omri, le extension de su podestate e tote lo que ille faceva es scripte in le libro appellate le Annales del Regno de Israel. ²⁸Quando Omri moriva, ille esseva inhumate in Samaria. Inde su filio Achab regnava in su placia.

Achab regna super Israel

²⁹Achab, filio de Omri comenciava regnar super Israel in le anno trenta-octo del regno de Asa in Judea. ³⁰Achab, filio de Omri, tamen, faceva lo que es mal coram le Senior, mesmo plus de tote le reges que regnava ante ille. ³¹E como si il non esseva assatis sequer le mal exemplo de Jeroboam, ille se maritava con Jezebel, filia de Rege Ethbaal del Sidoneses, e ille mesme comenciava prosterner^[1] se ante Baal pro adorar le.

³²Primo, Achab edificava un templo e un altar pro Baal in Samaria. ³³Pois ille erigeva un palo de Ashera. Ille faceva de plus pro provocar le ira del senior, le Deo de Israel, que quicunque altere rege de Israel que le precedeva.

³⁴Il esseva durante su regno que Hiel, un homine de Bethel, reconstrueva Jericho. Quando ille poneva le fundationes de ille citate, isto le costava le vita de su primogenito, Abira. E quando ille lo completava e erigeva su portas, isto le costava le vita de su filio plus juvene, Segub. Tote isto eveniva secundo lo que le Senior habeva dicite^[2] concernente Jericho a Josue, filio de Nun.

Notas

1. O “servir”.
2. Cfr. Josue 6:26.