Biblia/Vetule Testamento/Reges/2Reges 7

2 Reges

7

¹Eliseo diceva: “Audi le message del Senior. Isto es quid le Senior ha dicite: ‘Cras, circa in iste tempore, in le mercato al porta de Samaria, un mensura^[1] de farina fin costara un siclo, e duo mensuras de hordeo costara un siclo’”. ²Un officiero qui coadjuvava le rege, respondeva assi al homine de Deo: “Illo nunquam poterea evenir, mesmo si le Senior aperiva le cataractas del celo!”. Eliseo, tamen, replicava: “Tu videra isto con tu proprie oculos, ma inde tu non potera mangiar alco!”.

³Ora, quatro homines malade de lepra^[2] sedeva juxta le entrata del porta del citate. Illes diceva le unes al alteres: “Quare nos solmente sede hic expectante le morte? ⁴Si nos entra in le citate, nos morira de fame, e si nos remane hic nos morira le mesmo! Vamos igitur a render nos al campamento syrian! Si illes sparnia nos, nos vivera; si illes va occider nos, nos haberea morite in omne caso”. ⁵Assi, in le vespere, illes se levava e procedeva verso le campamento syrian. Quando illes attingeva al bordo del campamento syrian, il habeva nemo ibi! ⁶Le Senior les habeva facite audir un ruito de carros de guerra, cavallos, e de un grande armea. Assi illes habeva dicite le unes le alteres: “Le rege de Israel ha ingagiate le Hittitas e le Egyptianos pro attaccar nos!”. ⁷Ergo illes habeva se levate e fugite in le obscuritate, e habeva derelinquite su tentas, cavallos e asinos sicut illos se trovava in le sperantia de salvar lor vitas. ⁸Igitur, quando le homines malade de lepra arrivava al bordo del campamento, illes entrava in un tenta e mangiava e bibeva. Inde illes prendeva argento, auro e vestimentos e vadeva a occultar los. 7:8 Illes, pois, retornava e entrava in un altere tenta, lo spoliava e vadeva itero a occultar lo que illes habeva ibi prendite. ⁹Assi, tamen, illes diceva le unes al alteres: “Nos non ha facite ben! Isto es un die de gaudio, ma nos non reportava isto a alicuno. Si nos expecta usque vespere, nos va esser punite. Vamos assi annunciar isto a in le le palatio del rege”. ¹⁰Assi illes retornava, vocava le porteros del citate e reportava lo que habeva evenite dicente: “Nos vadeva al campamento syrian e non ha trovate ibi alicuno, nisi cavallos e asinos ligate e tentas. Nos non audiva un sol voce human”. ¹¹Ergo illes clamava le porteros e istes-ci annunciava iste nova in le palatio regal.

¹²Le rege se levava de nocte e diceva a su consilieros: “Io va dicer vos quid le Syrianos faceva nos. Illes sape que nos mori de fame, assi illes quitava lor campamento e se occultava in le agros, pensante: ‘Quando illes sorti del citate, nos les captivara vive, e tunc nos potera entrar in le citate’”. ¹³Uno de su consilieros le respondeva: “Selige alicun homines, e que illes prende cinque del cavallos que remaneva in le citate. Mesmo si illes va esser occidite, lor sorte non essera differente de illo del populo israelita - nos omnes va morir! Vamos facer les sortir, ergo nos potera comprender^[3] lo que eveniva”. ¹⁴Assi illes seligeva duo equitas e le rege les inviava foras a traciar le armea syrian. Illes les ordinava: “Vade e vide lo que eveni”. ¹⁵Assi illes les traciava usque al Jordan. Le via esseva plen de vestimentos e de equipamento que le Syrianos habeva jectate via in haste. Le exploratores pois retornava e reportava al rege lo que illes habeva vidite. ¹⁶Assi le populo accurreva foras e spoliava le campamento syrian. Alora il eveniva que un mensura de farina fin veniva costar de facto un siclo, e duo mensuras de hordeo un siclo, juxta le Parola de Deo.

¹⁷Ora le rege habeva ponite le officiero que le coadjuvava justo al porta del citate. Quando le populo accurreva foras, illes le calcava a morte in le porta. Isto compliva le parolas del homine de Deo que ille habeva proclamate quando le rege habeva essayate de arrestar le. ¹⁸Le propheta habeva dicite al rege: “Cras, circa in iste tempore, in le mercato al porta de Samaria, un mensura de farina fin costara un siclo, e duo mensuras de hordeo costara un siclo”. ¹⁹Le officiero habeva tamen replicate: “Illo nunquam poterea evenir, mesmo si le Senior aperiva le cataractas del celo!”. Eliseo, tamen, habeva dicite: “Tu videra isto con tu proprie oculos, ma inde tu non potera mangiar alco!”. ²⁰Isto esseva exactemente lo que eveniva. Le populo le habeva calcate a morte in le porta del citate.

Notas

1. O “un seah”, mensura pro materia sic equivalente a circa 11 quartos (11 litros).
2. O de un altere simile maladia del pelle.
3. O “vider”.