Biblia/Vetule Testamento/Samuel/2 Samuel 21

2 Samuel

21

Extinction del familia de Saul

¹Durante le tempore del regno de David il occurreva un fame que durava tres annos consecutive. Assi David consultava le oraculo del Senior. Le Senior le diceva: “iste fame occurre a causa de Saul e de su familia sanguinose, quia illes assassinava le Gabaonitas”.

²Assi le rege convocava le Gabaonita e parlava con illes. (Ora, le Gabaonita non esseva descendentes del Israelitas; illes esseva lo que remaneva del Amoritas. Le Israelita habeva promittite con juramento le pace con illes, ma Saul habeva essayate de exterminar les a causa de su zelo pro le populo de Israel e de Juda). ³David diceva al Gabaonitas: “Que pote io facer pro vos? E como poterea io reparar le torto que vos subiva a que vos benedicerea le hereditage del Senior?”. ⁴Le Gabaonita le diceva: “Nostre question contra Saul e contra su familia non ha a que facer con argento e auro - nos non lo expecta; ni nos esserea justificate in poner a morte alicuno in Israel”. David alora le diceva: “Que, ergo, vos pete que io face a vos?” . ⁵Illes replicava al rege: “Un homine cogitava de extenuar nos e facer nos disparer del territorio de Israel. ⁶Que sia date a nos septe homines de su descendentes e nos les pendera al patibulo ante le Senior in Gabaon^[1] de Saul, que esseva le electo del Senior”. Le rege replicava: “Ben, io dara les a vos”.

⁷Le rege salvava le vita de Mephiboshet, filio de Jonathan, filio de Saul, propter le juramento sacre^[2] facite inter David e Jonathan, filio de Saul. ⁸Assi le rege prendeva Armoni e Mephiboshet, le duo filios de Rizpah, filia de Ahia, que illa habeva de Saul, e le cinque filios del filia de Saul Merab, que illa habeva de Adriel, le filio de Barzillai, le Melohatita. ⁹David les consignava al Gabaonita, e illes les pendeva sur le monte coram le Senior. Tote ille septe moriva insimul; illes esseva occidite durante le tempore del recolta - in le prime dies del comenciamento del recolta del hordeo.

¹⁰Rizpah, filia de Ahia, matre de duo de ille homines, prendeva un tela de sacco e lo extendeva super le rocca ubi jaceva le cadaveres. Illa remaneva ibi durante le integre saison del recolta usque al pluvias de autumno, e impediva durante le jorno al aves necrophage de aveller le corpores e, de nocte, al bestias feroce de approximar se a illos. ¹¹Quando David veniva saper lo que Rizpah, filia de Ahia, concubina de Saul, faceva, ¹²ille vadeva e faceva prender le osteos de Saul e de su filio Jonathan que esseva inhumate apud le capites de Jabesh Gilead. (Illes habeva essite robate ab le placia de Bethsan; ubi le Philisteos habeva publicamente exponite lor cadaveres depost que illes habeva occidite Saul a Gilboa). ¹³De ibi David faceva asportar le osteos de Saul e de Jonathan su filio; con illos illes colligeva alsi le osteos de illes que habeva essite executate.

¹⁴Illes sepeliva le osteos de Saul e de su filio Jonathan al pais de Benjamin a Zela, in le sepulcro de su patre Kish. Depost haber facite tote lo que le rege habeva commandate, Deo respondeva a lor precarias pro le pais.

Altere guerras del Israelitas contra le Philisteos

¹⁵Un altere guerra esseva combatite inter le Philisteos e Israel. Assi David descendeva con su soldatos^[3] e combatteva le Philisteos. David esseva fatigate de tote illo. ¹⁶Ora, Ishbi-Benob, un del descendentes de Rapha, habeva un lancea que pesava tres centos shekel de bronzo e ille esseva equipate per un nove arma. Ille diceva que haberea occidite David. ¹⁷Ma Abishai, filio de Zeruiah veniva al adjuta de David, e frappava a morte le Philisteo. Assi le homines de David faceva un juramento dicente: “Tu non venira plus in battalia con nos. Tu non debe extinguer le lampa de Israel!”.

¹⁸Plus tarde il occurreva un altere guerra contra le Philisteos, iste vice in Gob. In ille occasion Sub-bekai, le Hushathita, occideva Saph, le qual esseva un del descendentes de Rapha. ¹⁹Itero un altere guerra occurreva contra le Philisteos a Gob. In ille occasion, Elhanan, filio de Jair, le Betlehemita, occideva le fratre de Goliath le Gittita, cuje lancea habeva un fuste simile a un orditorio pro texitura. ²⁰E adhuc un altere guerra occurreva in Gath. In ille occasion il habeva un homine de grande statura que habeva sex digitos in cata mano e pede, un total de vinti e quatro digitos! Etiam ille esseva un descendente de Rapha. ²¹Quando ille provocava sarcasticamente le Israelitas, Jonathan, le filio del fratre de David, Shimea, le percuteva e le occideva. ²²Iste quatro esseva le descendentes de Rapha que viveva in Gath. Illes cadeva per mano de David e de su soldatos^[3].

Notas

1. O “a Gabaon sur le monte del Senior”.
2. O “del Senior”.
3. O “servitores”.