Binoet

Volapükaklub Hannover evipom givön glato kopanales oka vpagasedi. Ab bi nonik vpabledas sibinöl ejinom demü kods difik ome pötik, pato al pagivön i begineles e studeles vpa, esludom pübön gasedi lönik, kel opubom nunog mälna a yel. Cif kluba, söl Max. Wahren elovesumom redaki. Gased kanom pabonedön i fa vpans votik. Suäm binom te mak 1.50 u flon 1 u frans 2 u sentabs 40... ninkikü potamon (se selän me potakomit). Komedobs bledi obsik i vpaklubes votik as klubanogani pötik, bi binos pesevik, das kudadins klubas pafödoms üno me gased, kel pagevom kopanales valik. Spelobs, das vpans valik oläsevoms e oyufoms steifamis obsik, pesepüköl in plogam obsik, me boneds, ab i me läpols e laltügs pötik; pato pabizugoms laltügs popanolavik e jönevik e votiks de nited valemik, kels binoms pötik plo lovepolam in netapüks e lasum in gaseds netapíkik diseinü pakam vpa. If otuvobs läsevi vpanas, ogletobs nog bledi obsik.

Boneds e penods valik pasedomsöd cife vpakluba Hannover e redakele gaseda at söle Max. Wahren, Friesenstr. 39, Hannover, Deutän.

Nüm telid, popotem te bonedanes e kopanales obsik, kels epeloms läpoloti; sikod bonedonös pötatimo!

Se Volapük: Gased al pakam Volapüka 1894, Nüm: 1, Pad: 1.