Budyšin (Ćišinski)

nadpis	Budyšin
awtor	Jakub Bart-Ćišinski
lěto
žórło	http://texty.citanka.cz/
licenca	public domain
nota	stary prawopis

    Budź witane mi, stare město njepowalne"!
    Drje třepotało sy, hdyž z Frankom w dźiwim boju stał Serb,
    hdyž w smjertnej bolosći sy piło swoju krew´;
    tola hišće stojiš, Serbstwa sydło skalne!

    Drje zapusćał je cuzbnik twoje domy spalne,
    krew´ twojich synow nječłowjeski teptał w hnoju,
    a tola wutroby, hlej přez Łužicu dwoju
    ći serbske serbski hišće bija njerozwalne!

    Hłós zańdźenych stolětow na tebje so roći:
    "Stój kruće," hnuće prosy, "Serbow swědko mócny,
    zo stara sława wot tebje so njewobroći!"

    Stój, o stój kruće, Serbstwa stražniko ty wótcny,
    bróń so, zo žadyn wichor tebje njerozkoći;
    budź jasna hwězda Serbej, hdyž chce padnyć sprócny!