Buks fol dö Züp Kristusa/Buk balid
Buk balid. Monedams frutik al lifi tikälnik.
editKapied 1. Dö züp Kristusa e nestüm vanas alik vola.
edit1. Sölal pükom: »Kel sukom obe, no tägom in daègs«: Ats binoms vöds Kristusa, dubü kels pamonedobs, posdunön omikis lifi e südis, if vilobs, verato padalitälön, e palibön de lada bleinäl alik. Sikodo stud gledinikün obas binomöd, medidön lifi ela Yesus Kristus!
2. Tid Kristusa vükodom tidis valik saludalas; e men, kel labomöv tikäli verätik, tuvomöv manaeti pesävik niso. Abu jenos, das mödikans, do eliloms suvo gospedi, senoms levipi te smaliki al oti, bi no laboms tikäli Kristusa. Yed aikel vilom, kapälön lefulnik e güto vödis Kristusa: mutom steifön, das blimom lifi lölik oka segun ot.
3. Kisi frutos ole, diskusön subimiko dö Kilbalodal, if nelabol miugi, e demüs miplidol Kilbalobale? Vö! vöds subimik no mekons eki saludik e cödiki, sod lif tugik mekom oni Gode löfiki. Vipob umo, senön lebönidi, ka nolön ota seplänami. Üf nololöv nebuko bibi lölik e pükedis filosopanas alik: atos valik nenü Goda löf e ben frutosöv kisi? Van vanas, e valikos binos van, plä löfön Godi, e dünön ome soelik. Atos binos sap geilikün: steifön monargäni süla me nestüm vola.
4. Klu van binos, sükön liegis odeulöl, e spelön in omis. I van binos, vöbön stimis, e datovönok al cali geilik. Van binos, sukön desides mida, e fliagön dinis, demü kels muton poso, papönön vemo. Van binos, vipön lifatimi lonedik, e kudön nemödo tefü lifatäg gudik. Van binos, tikön tefü lif nuik te, e no büokudön dinis füdik. Van binos, löfön dinis fegolöl vifiküno, e no spidön usi, kö fred tenüpik aiblibom.
5. Memolöd suvo pükedavödi et!: »Log no pasatom me logön, e lil no pafulom me lilön«. Sikodo töbolöd, dezugön oka ladi de löf logikosa, ed oli datovön al nelogikosis! Ibo mens suköl midäle stenoms konsieni, e peroms beni Goda.
Kapied 2. Smacedolöd oki !
edit1. Men alik desidom nato, nolön; ye nolüg nen godidred frutom kisi? — Gudikum binom vo feilan miugik, dünöl Gode, ka filosopan pleidik, kel, luleadölok iti, medidom goni stelas. Kel sevomok gudiko: at smacedomok, e no pafredom dubü lobs menas. If noloböv valikosis binöl in vol, e no binoböv in löf: atos yufosöv obe kisi loü God ocödöföl obi ma vobäds?
2. Stöpolöd desidi tuik nolöna, bi patovoms niso gretiks disipäl e cit! Nolans vipoms, palogön, e panemön sapals. Dins mödik binoms, kelas sev frutom lane nemödikosis u nosi. E lestupik binom, kel jäfom dinis votik, ka dünölis oma salude. Vöds mödik no satoms lani; abu lif gudik klietom tikäli, e konsien paklinöl gevom konfidi gretik al Godi.
3. Pluo nolol umosis, e gudikumo bosi: plu jalopumo pocödöfol demüs, if no ulifol saludikum. Klu no vilolös, papliedön tefü lekanäv sembal u nolüg, sod bufumo dredolöd demü sev pegivöl ole! If jinos ole, das sevol mödikosis, e kapälol gudik ze: deno nololöd, das dins, kelis no sevol, binoms vemo mödikums! No binolöd pleitälik, sod koefolöz bufum oliki nenolöfi! Kikod vilol, bizugokön eke, do tidels mödik patuvoms nolalikum, ka ol, ed eplakölums in lon? — Üf vilol, fruto nolön e lenadön bosi: löfolöd, blibön nebesevik, e pacedön, aso nos!
4. Atos binos nolüg geilikün e lenadam frutikün: sevön veratiko, e nestümön iti ok. It cedönok, aso nosi, ed aitikön gudikosis e subimikosi dö votans: binos sap gretik e lefuläl geilik. If logolöv votani sinöl maniföfo, u dunön klimotis gretik: deno no dalolöv, cedönok gudikumi, bi no nolol, vio lonedo blibolöx in stad gudik. Valikans binobs döfik; ye neki cedolös döfikumi, ka iti ol!
Kapied 3. Tefü tid verata.
edit1. Läbik binom, keli verat betidom, no me siämags e vöds fegolöl, sod dub ok it, e kele jonom, vio verat binom oko. Ced obsik, e meug obas citoms obis suvo, e binoms blelogälik. Kisi frutom vestigam mödik tefü dins pasävöl e dagiks? ibo no pokusadobs in cödöf, no esevön otis. Binos stup legretik, das, luleadobsöl dinis frutöl ä zesüdikis, jäfobs viliko dinis nudälik e dämölis. Labobsöl logis, no logobs.
2. E kikod töbobsöv tefü saeks dö gens e bids? — Kele Vöd tenüpik (Son Goda) pükom, at binom pelivöl de niludams mödik. Valikos binos se Vöd bal, e valikos noelos eli Balali; ed at binom el Rigal, kel pükom id obes. Nek nen at kapälom bosi, u cödätom verätiko. Kanom binön stanik ladälo, e blibön in püd ko God, ut, kele Vöd bal binom valikos, ut, kel gedukom valikosis in eli Balali, e logom valikosis in at soelik. O verat, God! obi mekolös os-bali ke ol dub löf tenüpik! Favos obi suvo, lilädön e lilön mödikosis. In ol binos valikos, keli vilob e fliagob. Tidels valik seilomsöz, jafots valik muedomsöz lo ol! Ol soelik pükolöd obe!
3. Plu nedisipikum, e linedälo balikum binom men sembal: pluo kapälom nen töb dinis mödikum e subimikumis, bi getom delöpoa liti kapälüba. Tikäl klinik, balik ä stanik, no padisipom dub möd vobädas, bi dunom valikosi stimü God, e steifom, binön livik de taisük alik. Kis oli neleados e bölados umo, ka lada slopäl no pefunälöl ola? — Gudikan relik leodom balüdo in linedäl vobädis oka, kelis mekomök senedoi. Ed ats oti no zugoms al desidis slopäla klimik, sod it nomom desidis segunü cödät lisäla veratik. Kim labom komipi fikulikum, ka ut steiföl bevikodönok iti? — Ed atos mutosöv binön jäfam obsik: bevikodönok itis, vädelso vedön stenüdikum linedälo, e fästepön boso in gudikos.
4. Lefuläl alik in lif nuik binom pamigöl ko neleful sembal, ed alik sev obas no binom pelivöl de neklül sembal. Miugiko sevönok binos un veg zelädikum al Godi, ka vestigam dibälik nolüga. Pöblamöl no binom nolüg, u dina sev balik, kel, pakonsidöl in ok, binom gudik e pebüdöl fa God; abu konsienäl gudik e lif tugik aibinoms pöbizugöl. Ye, bi mödikans steifoms umo, nolön, ka lifön gudik: demüs pöloms suvo, e blinoms fruti ti noniki, u nemödiki.
5. Od! if gebomsöv duti so gretik, al noesön klimis, e nüplanön tugis, äso geboms, al seplänodön saekis: also gretiks bad e skanübs no vedomsöv in pop, e nepud so gretik no binomöv in kleuds. Zelädö! kü del cödöfa ukömom, tän no posäkos de obs, kelosi elilädobs, sod kelosi edunobs; no posäkos, vio jöniko epükatobs, sod vio reliko elifobs. Sagolöd obe! kiplad binoms nu valiks söls e masans at, kelis esevol gudiko, du nog älifoms, ed äsikomsok nolügo?! Votans ya labedoms calis omas, e no nolob, va memoms otis. Dü lifatim okas äjinoms, binön bos, e nu paseilos dö ots.
6. O! Volaglor fegolom ki-vifiko! Dasö lif otas äbaivögomös ko nolüg omas! Tän estudomsöv ed elilädomsöv gudiko. Dub nolüg vanik in vol, kio mödikans deuloms, kel kudoms nemödo tefü dünön Gode! E bi viloms vilikumo, binön gretik, ka miugans: demüs peromsok in tiks okas. Vo gretik binom men, laböl löfi gretik. Vo gretik binom, kel düvomok smaliko, ed as nosi cedom aliki lüeni geilik stima. Visedan binom vo, kel aso miotini cedom talikosis valik, dat lefrutomös Kristusi. E gudiko nolalik binom vo ut, kel dunom vili Goda, e lüvom vili oka.
Kapied 4. Dö visedug in dunön.
edit1. No dalon, kredön alikes vöde u nin’givame, sod muton, süenön visedik e lonedo dini segunü God. Liedö! dö votan dins badik pakredoms e pasagoms nefikulumo, ka gudiks: also fibiks binobs. Abu mens lefulik no kredoms nefikulo konele alik, bi sevoms fibi menik, klieniki al badikosis, e pököli nefikulo in vöds.
2. Sap gretik binos, no binön tuspidik in dunön, e no ledulön düföfo in tikäds lönik. Sap gretik binos i, no kredön vödes alik menas, e no polön foviko dinis pelilöl u pekredölis al lilis votanas. Bekonsälolöd ko man sapik ä konsienik, e sükolöd bufumo, pabetidön fa gudikuman, ka sukön tikes ola! Lif gudik mekom meni sapik segun God, ed eplaköli tefü mödikos. Ek, pluo ubinom in ok miugikum ä nödikum Gode: pluo sapikum obinom e takedikum in valikos.
Kapied 5. Dö lilädam biba.
edit1. Verat binom pösüköl in bib, no püköf. Bib lölik mutom, palilädön in tikäl ot, in kel pelautom. Mutobs, sükön in bib bufumo frutikosis, ka feini püka. Leiviliko mutobs, lilädön bukis devodik e balikis, äso bukis nolelik e dibälikis. Stüm lautela no skänomöd oli! Va ebinom men petidöfa smalik ud gretika: atos binosöd lindifik ole! Abu löf verata teik oli stigomöd al lilädön! No säkolös, kim atosis esagom-la, sod loigolös, kelos pasagos!
2. Mens deuloms; abu Sölala verat aiblibom tenüpoi. God, nes konsidön pösodis, pükom obes segun bids difik. Nudäl obas dämom mödna obes lilädöl bibi, du vilobs, suemön e dakodön uso, kö mutobsöv beigolön balikäliko. If vilol, kupön fruti: lilädolöd miugik, balikälo e känüdik, e no vilolös evelo, labön voaki petidöfa! Säkolöd vilik, e lilolöd seilo vödis saludalas! I pükeds bäledanas no miplidomsöd ole! ibo pasagoms no nenü kod.
Kapied 6. Tefü levips vädik.
edit1. Alif men fliagom vädiko bosi, foviko vedom muifälik in ok. Pleidikan e monälan takedoms nevelo. Pöfikan e tikälno miugan tägoms in ful püda. Men, no nog edeilöl oke lefulno, patentadom foviko, e pabevikodom in dins smalik e püliks. Men fibik tikälo, e bido nog midälik, e klienöl al dinis sienlik, kanom te fikulo, livönok lölo de desids talik. E demüs labom mödna lügi, if livomok; id ozunom nefikulo, if ek utadunom ome.
2. Ab, üf urivom, kelosi desidom: foviko pavexadom fa debäl konsiena, bi esukom oka liedode, yuföl nosis püde, keli esükom. Sikodo tuvon ladäla püdi veratik, if tadunon liedodes; no, if dünon otes. Klu püd no binom in lad mena midälik, no in men divodöl dines senedik; sod püd patuvom in zilikan tikälnik.
Kapied 7. Fugolöd speli vanik e pleitäli !
edit1. Stupik binom, kel pladom speli okik in menis u jafotis. No jemolöd, se löf ali Yesus Kristus dünön votanes, e jinön pöfik in vol at! Ole it no konfidolös, sod in Godi siadolöd oka speli! Dunolöd, soin kanol! e God oyufom vile gudik ola. Nolüge olik, u luvisedöfe lifana sembal no konfidolös, sod bufumo bene Goda, kel yufom miugikanes, e miugom konfidölanis oke!
2. No luglorolöd, ni demü liegs, if en labol, ni tefü flens, if binoms valüdik: sod glorolösok dem God, kel givom valikosis, e levipom, givönok iti bu valikos! No pleidolöd demü koapa gret u jön, kel dub maläd smalik parübom e panefömotom! Kodü skil u täled ola no plidolöd oke, dat no miplidolös Gode, kele gudikos valik lönos, kelosi labol nato!
3. Oli no cedolöd gudikumi, ka votanis, dat ba no padüvolös aso badlikum fa God, nolöl, kelos in men binos. No binolöd pleitälik dem vobäds gudik, ibo cödäts Goda binoms votik, ka uts menas! Miplidos ome suvo, kel plidos menes. If ba labol bosi gudik in ol: kredolöd gudikumosi dö votans, dat konsefolös miugi! No dämos, if nalsiadol oki valikanes; abu dämos levem, if bizugolok i bale te. Aipüd binom miugane; yed in lad pleitälana patuvoms jalud e zuen mödnik.
Kapied 8. Vitolöd kondiflöfi tu gretiki !
edit1. No manifamolös oka ladi mene alik, sod ko men sapik ä dredöl Godi süenolöd oka jäfi! Melakolöd seledo ko yunans e mens nebesevik! Lieganes no flätolöd, ed in zilaki sölalas no gololös viliko! Sükolöd sogi menas miugik e balikälikas, menas relöl e südälikas, e bepükolöd, kelos veilos dabumälame! No binolös konfidlöfik vofe sembal, sod Gode komedolöz valemo vofis gudik valikis! Vipolöd, binön konfidlöfik Gode te ä lanales omik, e vitolöd pasevügi menas!
2. Löf binom pölaböl valikanes; abu konfidlöf no pötom. Jenos sotimo, das pösodan nebesevik litom dubü voak; e deno pösod at vedom täik dub oka komöp. Niludobs sotimo, plidön votanes dubü fetanam obas ke oms; e beginobs bufumo, miplidön otes dem süds vädik, pesenidöls in obs.
Kapied 9. Tefü lobed e lenödöf.
edit1. Binos vemo gudik: stadön in lobed, lifön nödü cif, ed eklemön giti valik. Binos mödo sefikum, stadön in nödöf, ka binön cifan. Mödikans binoms lobedik plu kodü zesüdöf, ka se löf; ats laboms plönis, e muroms levilo. No ogetoms libi ladäla, ifno demü God udisojedomsok se lad lölik. Gonolöd isi ud usi! nö utuvol takedi, ifno in lenödug miugik nödü cifam löpana. Niludam, das cen steböpa blinom-la takedi, e cen at ecitoms ya mödikanis.
2. Binos veratik, das alikan dunom viliko segun tikäds oka, e lüslopälom etes umo, kel baivögoms ke om. Ab, if God binom bevü obs: zesüdos, lüvön i sotimo cedis obas dem benod püda. Kim binom also sapik, das kanom-la, nolön lefulno valikosis? Klu no vilolöd, konfidön tuiko tikäde ola, sod vilolös i, lilön viliko cedi votanas! If tikäd ola binom gudik, ed ulülov oti dem God, al sukön tikäde votik: ofästepol umo dub atos.
3. Ibo elilob mödna, das binos sefikum: getön konsäli, ka givön oti. Kanos i zidön, das tikäd alikana binom gudik; abu no vilön läsevöni votanes, if lisäl u kod flagom osi: atos binos mal pleitäla e düfäla.
Kapied 10. Vitolöd püköni bundemik !
edit1. Vitolöd, soin kanol, lutoni menas! ibo bepükam zidas volik, ifi jenos-la känüdo, dämom mödo. Ibo pastenobs foviko dub pleid, e vedobs slafan oma. Dasö äseilobös suvumo, e no äbinobös bevü mens! Ye, kikod pükobs also viliko, e lupükobs balan ko votan, do gekömobs seledo al nevödami, nes eviodön konsienäli? Pükobs viliko dem atos, bi sükobs, patrodön, balan fa votan, me pükots rezipik, e bi vipobs, susilüodön ladi pefenöl dub tiks valnik. E plidos levem obes: pükön e tikön dinis, kelis löfobs mödik u vipobs, u kelis niludobs taikis obes.
2. Abu, liedö! suvo jenos vanlik ä nefruto. Ibo trod senedik at kodom peri no smaliki troda linedälik e godika. Demüs galonöz e plekonöz, dat tim no fegolomös nefruto! If padälos pükön, e pötos: pükolöd dinis dabumälöl! Kustöf badlik e lulead fästepa obas läpoloms mödo tefü no-jepön mudi. Ye bepükam devodik dinas tikälnik födom no nemödo fästepi tikälnik; pato, if mens lesümik tefü ladäl e tikäl lasamomsok in God.
Kapied 11. Steifolöd püdi e fästepöni.
edit1. Kanobsöv, labön püdi gretik, if no vilobsöv, jäfön pükotis e dunotis votanas, e dinis, kel no tefoms obis. Liko kanom, blibön lonedo in püd ut, kel kösekomok kudadines votanas, kel sükom pötis senedik, e konleadomok in linedäl nemödo u seledo. Beatiks binoms balikälans, bi olaboms püdi gretik.
2. Saludals semik kikod ebinoms also lefulälik e leplobiks in medidön? Bi esteifoms, itis funälön lefulno tefü taliks desids alik, e demüs ekanoms, züpön se ladäladib Gode, e kälokön neleadiko. Obs pamofobs tumödo dub liedods lönik, e kudobs tuiko tefü dins golenik. I seledo bevikodobs lefulno klimi bal, e seledo stigobsok al fästepi vädelsik. Se kod at blibobs kaldälik e laviks.
3. If binobsöv lefuliko edeilöl obes it, e leno pekofudiks in linedäl: tän kanobsöv, gütön i dinis godik, e plakön bosi de svid lenlogedäla sülik. Nelead gretikün e soelik binom, das no binobs livik de liedods e desids, e das i no blüfobs, betridön vegi lefulik saludalas. Üf tadun i te pülik zitom obes: vedobs tu vifo smakurajöfik, e sükobs trodis menik.
4. If steifobsöv, aso mans kurajöfik stanöfön in komip: zelädo logobsöv, donikömön su obis Sölala yufi de sül. Om, kel givom obes pöti komipöna, dat vikodobsös: binom löbik, yufön komipeles spelöl tefü ben oma. If siadobs fästepöni relo in plägamis senedik sembalis te, täno reläd obas ofinom suno. Sikodo len vuli pladobsöd lecüdi, dat, peklinöls de liedods, getobsös ladäli takedik!
5. If sävulobsöv väyelso klimi bal, tän vedobsöv suno mens lefulik. Ye nu senidobs tadilo, das ebinobs gudikum e klinikums beginü levotälam, ka posü yels mödik, efegolöls sis dunam lesiägodas. Zil e fästep obas mutomsöv, glofön vädelso; yed aso din gretik pacedos nu, if ek kanomöv, konsefön dili zila balid. If gebobsöv begino mekädi smalik: täno kanobsöv latumo, dunön nefikulik ä fredo valikosis.
6. Binos plönik, deseitön kustöfi; abu binos nogo plönikum, tadunön vile lönik. Yed, if no bevikodol dinis smalik e nefikulikis: kiüp obemasanol fikulikumosis? Begino tadunolöd slopäle olik, e deseitolöd kustöfi badik, dat no mekomös piano fikuli gretikum ole! Od! if loigolöv, püdi vio gretik ole, e fredi vio gretiki mekolöv votanes dubü täg gudik: kredob, das binolöv kudlikum tefü fästep tikälnik.
Kapied 12. Dö frut täöfa.
edit1. Binos gudik obes: labön sotimo plönis anik e täöfis, bi gevokoms meni al notlöfi, dat lesevomös, das stebom in xilöp, e dat no pladomös oka speli in dini sembal vola. Binos gudik, das liedobs sotimo tapükis, e das cödäton badik e negöno tefü obs, do duns e desäns obas binoms gudik. Atos mödna dukos al miugi, e jelos ta glori vanik. Ibo, üf pasmacedobs senedo fa mens, e gudikos in obs no pakredos: tän sükobs zilikumo noelali linedik, os binos, Godi.
2. Demüs men mutomöv, fimönok somo in God, das no neodomös, sükön trodis menik mödikis. Sosus men vila gudik sufom liedis u tentadis, u pavexadom dub tiks badik: täno seivom, God vio zesüdik binom ome; senidom, das kanom gudikosi nonik nenü God. Tän i paglumom, seifom e plekom dem pöflöfs, kelis sufom. Täno naudos omi, lifön lonedumo, e vipom, deilön, dat kanomös padilimön, e binön ko Kristus. Tän i lesevom gudiko, das sef lefulik e püd fulik no kanoms, sibinön in vol at.
Kapied 13. Tefü tentads pölepedöl.
edit1. Ünä lifobs in vol, no kanobs, binön nenü vexads e tentads. Demüs binos pepenöl in buk ela Yob: „Lif mena su Tal binom kligadün.“ Klu alikan mutomöv, binön kautik tefü tentads okik, e galön pleköl, dat pöti citöna no tuvomös diaban, kel slipülom nevelo, sod aizigolom, süköl, keli feslugomös. Nek binom also lefulik ä saludik, das no labomöx sotimo tentadis, e no kanobs, palivön lefulo de ots.
2. Ye tentads binoms mödna vemo frutöl mene, do binoms böladik e plöniks; ibo dub ats men pamiugom, paklinom e patidom. Saludals valik egoloms daü vexadis vetik e tentadis mödik, ed en elaboms fruti. Ed uts, kel no ekanoms, ledulön tentadis: enefiedoms ä pedeimoms. No binom rodef also saludik, e top also pesävik, kö tentads u täöfs no binomsöx.
3. Ünä men lifom, no binom sefik lefulno ta tentadis, bi polobs in oks kodi tentadas, sisä binobs pemotöl in desid. Üf bal tentad u vexad yilom: votik nakömom, ed oilabobs bosi pösuföl, bi eperobs guedis leläba rigik. Mödikans sükoms, fugön tentadis, e faloms dibikum in otis. Me fug soelik no kanobs, vikodön, sod me sufäd e miug veratik vedobs stenüdikum, ka neflens valik.
4. Aikel seivegom senedo te, e no seslütom vuli: at olabom fruti nemödik. Tentads ogekömoms sägo vifumo al oti, ed ostadom badikum. Piano, e me sufädug ko lonedäl, üf God uyufom, ovikodol gudikum, ka dub mekäd e tepäl. In tentads sükolöd mödna konsäli! e no tölatolös stoinälo meni petentadöl, sod trodolöd omi, äso vipolöv, das jenosös ole!
5. Nelaidöf ladäla e konfid smalik al Godi binoms rig tentadas badik valikas. Äso naf nen guböm pasemofom dubü vatalubels: also patentadom difiko men luleadik, lüvöl desini oka. Fil blufom feri, e tentad meni cödik. Mödna no sevobs nämis obas; abu tentad jonom, kelos binobs. Ye muton, galön, pato in begin tentada; ibo neflen täno pabevikodom nefikulikum, if no dälobs ome nütridöni da yani ladäla, sod kosgolobs ote bifü svoedi, sosus ulänokom: Demüs ek esagom:
Begino tadunolöd! medin tu lato pomökom: if, dubü tima loned, bad gretikum ya uvedom.
Ibo begino tik balik plösenomok ladäle; poso fänot stenüdik; täno fredodam, mof sinik, e jöto sisagam. E somo neflen badavilik nütridom piano löliko, bi no tadunon in begin ote. E plu lonedumo ek ubinom nedutlik, al tadunön: plu fibikum in ok ovedom vädelso, e stenüdikum oivedom neflen ta omi.
6. Ans plönoms tentadis vetikum in begin levotälama, votans in fin. Ye teldikan pavexadom ti dü lif lölik oka. Ans patentadoms te nevemo, ma lenleodam godikas cöda e sapa, kel, vätöl stadi e melidodis menas, biseleodom valikosis al saludi pesevälanas.
7. Se kod at mutobs, no temipön, kü patentadobs, sod lebegön zilikum nogo Godi, dat yufomös obes in dränüb alik, bi, segun püked ela Paul, ogivom zelädo fömi somik tentade, das kanobs, ledulön. Sikod in aliks tentad e vexad miugobsöd lanis obas disü nami Goda, kel osavom ed ogeilom miuganis tikälo.
8. In tentads e vaxads pablufos, vio mödiko men efästepom; dub ats vöbom melidodis gretikum, e tug vedom manifikum. No binos din gretik, das men binom devodöl ä zilik, if no senom täöfis; yed, if blibom sufädik timü vexad, gevom speli fästepa gretik. Ans paplesefoms ta tentadis gretik; ab in lägleipams delik leitiks pabevikodoms mödna, dat pamiugöls konfidomsös nevelo okes it tefü dins veütik, bi vedoms fibik in dins also.
Kapied 14. Vitolöd krüti leitälik !
edit1. Flekolöd logälis al iti ok, e vitolöd, becödätön dunotis votanas! Men, becödätöl votanis, töbom vanliko, pölom suvo, e sinom nefikulo. Yed, if becödätom, e duvestigomok iti: vobom aifruto. Äso din mufom obas ladäli, also cödätobs mödna tefü din at; ibo dem taisük perobs nefikulo cödäti verätik. If God aibinomöv disein klinik levipöna obas: no pamuifobsöv also nefikulo, üf tadunon slopäle obas.
2. Ye, binom mödna kod linedälik pesävöl, ud i dinäd senedik, kel leigo mufom obis. Mödikans, nes nolön osi, sükomsok it pesäviko me duns okas. Jinoms i, binön kotenugiks lefulo, ünä bos jenos segun vil e tikäd omas; ye, sosus din sembal zitom votik, ka vipoms: pamuifoms foviko, e vedoms favik. Sukü dif niludamas e meugas, dikods vedoms lesuvo bevü flens e sifans, bevü klerans e relädikans.
3. Kustöf bäledik padeseitom fikulo, e nek levotälomok vilik al tikädi votik. If oka lisäle u skile lekonfidol umo, ka tuge, nödöl oli Yesuse Kristus: ovedol seledo e latiko men padalitöl, bi God vilom, das disojedobsokös ome lefuliko, e das me löf filik xänobsös ovü lesevöni valik lisäla.
Kapied 15. Dö vobäds pedunöl se löf.
edit1. Demü nos in vol, e nevelo löfü meni, binos pedälik, mekön bosi badik; ye, dem pöfikana frut, vobäd gudik binom sotimo pönedunöl libiko, u pöfetököl plo gudikum. Atoso vobäd gudik no panosom, sod patovom in gudikumi. Nenü löf vobäd senedik frutom nosi; abu, kelosi mekon löfo, soif binosöv smalik u nestümik: valikos vedos frutöl. Ibo God konsidom umo desäni e löfi dunölana, ka greti vobäda.
2. Mekom mödikosi, kel löfom mödo; mekom mödikosi, kel dunom gudiko vobädi; mekom gudiko, kel dünom umo komote, ka vile lönik. Bos jinos mödna, binön löf, e binos bufumo midäl, bi slopäl natik, vil lönik, spel pamesedöna, slopäl al koveni viloms seledo, mobinön.
3. Kel labom löfi veratik e lefuliki, sükomok it tefü din nonik, sod levipom, das valikos padunosös te stimü God. Glötom i neki, bi no sükom fredi patik oke; i no vilom, fredokön in ok it, sod vipom, pabeatön um in God, ka in lab guedas alik. No lücödätom gudikosi sembal mene, sod tefamom valikosis al Godi, fa kel alikos dekömos rigik, ed in kela (Goda) juit, as in zeilün okas, saludals valik aitakedoms. O! kel men labomöv spagi löga veratik: senomöv zelädo, das talikos valik binos fulik vana.
Kapied 16. Sufobsöz döfis votanas !
edit1. Kelosi men no kanom, gudumön in ok, ud in votans: atosi mutom, liedön sufädo, jüs God ulenleodom votiko. Tikolöd, das somo binos ba gudikum pabluföne olik e sufäde, nenü kels melidods obas no völadoms mödo. Ye plekolöz tefü neleadübs somik, das God yufomös benik ole, dat kanolös, sufön gudälik otis!
2. If ek, pemonedöl balna u telna, no läsevom: no vilolöd, feitön ke ot, sod loveleadolös valikosi Gode, dat vil Goda, kel nolom gudiko, flekön badikosis al gudikosi, jenomös, e stim oma pafödomös in dünels valik oma! Steifolöd, binön sufädik in sufön votanas döfis e fiböfis alika bida, bi ol i labol mödikosi pösuföl fa votikans! If no kanol, oli mekön somiki, aso keli vilol: okanol liko, votafomön votani segunü plid ola? — Votanis logobs viliko lefulikis, e deno no gudumobs döfis lönik.
3. Vilobs, das votikans pagijonoms jalopo, ed obs it no vilobs, pagijonön. Lib gretik, pagivöl votanes, miplidom obes; e deno no vilobs, das panesiamosös obes, kelosi fliagobs. Vilobs, das votikans panüstöbomsös dubü statudods; ed obs it sufobs leno, das paneleadobs semliko. Klülükos atoso, das düvobs seledo kemeni, äs obis it. If valikans binomsöv lefulik: kisi täno plo God sufobsöv fa votans? —
4. Ye nu God ebüdom somo, das lenadobsös, balan polön böladi votana, bi nek binom nen döf, nek nenü bölad, nek saidik oke, nek saido sapik oke. Demüs mutobs, sufön balvoto, trodön balvoto, e leigo yufön, betidön e monedön balvoto. Pötü täöf vedos gudikumo manifik, vio tugik ek ebinom. Ibo pöts meni no mekoms döfiki, sod jonoms, kimik binom.
Kapied 17. Tefü lif kleudik.
edit1. Lenadolök, iti bevikodönok tefü mödikos, if vilol, labön püdi e baladi ko votikans. No binos smalöf: lödön in kleuds ud in kluböps, stebön niso, nes plonön, e ledulön fiedik jü deili. Beatik, kel üs ulifom gudik, ed ufinom läbiko! If vilol, äso lepötos, tägön e fästepön: cedolödok aso pexilani ä voöpäbi su Tal! Vedolök stupan demü Kristus, if vilol, dukön lifi tikälnik!
2. Kleot klerik e tonsur yufoms nemödo; sod votam südas, e funälam lefulik liedodas mekoms kleudani veratik. Aikel sükom votikosi, ka Godi soelik, e saludi lana oka: otuvom te dränübis e liedis. I no kanom, lonedo blibön in püd, aikel no steifom, binön pülikün, e nödik valikanes.
3. Ekömol, al dünön, — e no, al regön. Nololöd, das binol pabevoköl, al liedön e vobön, — no, al nedutön u lupükön! Sikodo mens iso pablufoms, äso golüdain in fönöp. Iso nek kanom, ledulön, ifno vilom, miugönok se lad lölik löfü Godi.
Kapied 18. Dö sams Fatas saludik.
edit1. Loegolöd samis lifik Fatas saludik, se kels lefuläl veratik e reläd enidoms! ed osevol, vio nemödik binos, e ti nos, kelosi dunobs. Agö! lif obas binom kios, if pafeleigom etas life? Saludikans ä flens Kristusa edünoms Sölale in faöf e soöf, in kaldöf [kaldäl[1]] e nüd, vobölso e fenokölso, galöno e cunöno, dub pleks e medidams saludik, in bösulams e nestims mödik.
2. O! liedis ki-mödik ä vetikis esufoms postals, matürals, pliedals, virgans e lemänikans alik, evilöls, sukön futavegedes Kristusa! Ibo ehetoms lanälis okas in vol at, dat olabomsös otis in lif tenüpik. O! lifi kio jalopik ä klemöli Fats saludik edukoms in nekulivöp! Esufoms tentadis ki lonedöfik ä vetikis! Kio mödna pavexadoms fa neflen! Edäblinoms Gode plekis kio-mödnalik ä zilikis! Kio jalopo ecunoms! Elaboms ki-gretikis zili e kurajöfi, al fästepön tikälno! Ekligoms kio jamepik, al bemütön liedodis! Kimiki desäni peklinöl e känüdiki elaboms tefü God! Delo ävoboms, e neitso ejäfoms plekis lonedik; ab i voböls enedunoms leno pleki tikälik.
3. Ägeboms fruto timi lölik; düp alik dünöna Gode äjinom otes binön blefik, e sukü svid gretik medidöna äfögedoms sägo kälami zesüdik koapa. Äklemoms alikis liegis, dinidis, stimis, flenis e palefanis; no eviloms, labön bosi vola; ti no esumoms zesüdikosis life. Sägo tefü zesüdikos epidoms dünöni koape. Sikod ebinoms pöfik tefü dins talik, abu liegiks beno e tugso. Ädaleboms senediko; ye linedälo peklietoms dubü ben e trod godik.
4. Äbinoms voöpik volefe, abu flens nilikün ä lebeseviks Gode. Okes it äjinoms, binön nos, ed ebinoms nestümik in vol; ye logsü God äbinoms kostik e pelöföls. Estadoms in miug veratik, älifoms in lobed balikälik, etägoms in löf e sufäd; demüs vädelso efästepoms tikälo, ed egetoms beni gretik lä God. Binoms pemeköl, aso sam kleranes valik, e mutoms, umo stigön obis al fästepön gudik, ka num lavikanas stigom al luleadi.
5. O! kleranas valikas zil eibinom ki-gretik timü fünam rodefa saludik okas! — Devod kio gretik in plek! lezil kimik tefü tug! pud ki-jalopik! Kio gretiks drestim e lobed efloroms tefü valikos nödü cifam masana! Vegeds epalemänöl jonoms nogo, komipöl also brafiko, efutapedoms voli. Ek nu pacedom gretik, if no ebinom tadunel, if kanom, polön sufädo bligis, kelis elensumom.
6. Agö lavöfe e luleade tefü cal obas! Deyilobs also vifo de zil rigik, e binobs sägo lifafenik sukü lavöf e nedut. Daso fästep in tugs no slipülomös lölik in ol, kel elogol suvo samis mödik devodanas!
Kapied 19. Plägams klerana gudik.
edit1. Lif klerana gudik binomöz padeköl me tugs valik, dat kleran binomös linedälo somik, aso kel jinom senedo menes! E vö! Binomök linedälo gudikum, ka jinom senedo, bi God dulogom obis, kele debobs grestimüni, aikö binons, e loü kel mutobs, tägön klinik, äso lanals süla. Mutobs, denuamön vädelso desini obas, e stigönok ali zil, äsif adelo beginobsöv balidna levotäloköni. Mutobs sagön: Stenüdolös obi, o Sölal God! in desinäl gudik ed in dün saludik ola! gevolöd, das adelo beginobös lefulo, bi völados nosi, kelosis edunob jünu.
2. Äso desin obas, also fästep obas in gudikos; ed aikel vilom, fästepön gudiko, gebomök duti gretik. If ut, meköl desini stenüdik, pökom suvo: kios tefü et, kel mekom seledo desini u lu stenüdiki?! Ye lüvan desina pakodom difiko, e nedun smalik plägamas ti no jenom nenü däm sembal. Desin cödikanas binom pastaböl um in ben Goda, ka in sap lönik, ed in beginots alik aikonfidoms Gode. Ibo men desinom, abu God leodom; e veg mena no binom in mekäd oma.
3. If plägams kustöfik nejenoms sotimo demü Godilöf u frutü blod: nefikulo kanoms, pagüvön poso. Ab, if panedunoms leitäliko kodü neyof u lulead: nedunam binom saido pönik, ed osenon dämi. Sägo, if ugebobs duti valik, nog opökobs boso in mödikos. Yed aimutobs, desinön bosi fümik, e pato ta dinis neleadöl obis mödüno. Ä lined obas, ä sened leigo padusükomsök e paleodomsök, bi bofiks yufoms fästepöne.
4. If no kanol, konleadokön laiko, dunolöd osi sotimo, e vädelso luüno telna, os binos, gödelo e vendelo! Desinolöd gödelo, e xämolöd vendelo tägi oka! Betikolöd, vio ekondidol adelo tefü vöds, vobäds e tiks! ibo nis enofol ba suvo Godi e kemeni. Zönolödok aso man ta luvisedi diabana! Bemütolöz gomapi, ed olejäinilol nefikulumo slopi midälik aliki! Nevelo binolös nosidunik lefulno, sod lilädolöd, penolöd, plekolöd, medidolös, u dunolös bosi frutik komote! Ye plägams koapik mutoms, jenön ma sevälam, ed i no valikans mekomsöz otis in mod leigik!
5. Plägams plätugedik no daloms, pajonön maniföfo, bi plägams privadik padunoms sefikum in klänöf. Ye kautolöd, das no binolös nedutlik tefü plägams tugedik, e zilikum patikes! sod, nag edunol lefulno ä fiedik bligis e pebüdölosis valik: tän, üf tim nogo palemänom, kösekolödok ole it, äso devod ola vipom! No valikans kanoms, labön öti plägami, sod at pötom balane, et umo votane. Löfon i, labön plägamis difik ma pötöf tima, bi semiks plidoms um in zäladels, votiks um in vobadels. Neodobs atis timü tentad, votikis timü püd e taked. Plidos, tikön votikosis, if lübogs, votikosis üf fredobs in Sölal.
6. Pötü glezäls denuamobsöz plägamis gudik, e lenvokobsöz zilikumo plobegis saludalas! Desü zäl al zäli mutobs, bitopälön okes, das oditobs-la nu se vol at, ed olovegolobs-la ali zäl el tenüpiki. Dem atos mutobs, prepadönok kudöfo in tims saludik, tägön devodumo, ä fölön kuratumo statudis valik, äsif getobsöv sunüno fa God mesedi vobas obsik.
7. Ab if God fözogom mesedi, kredobsöz, das binobs paprepadöl nog tu nemödo, ä nedigiks glora so gretik, kel in tüp pebiselonöl obinom manifik in obs, e steifobsöz, prepadönok gudikum al ditami!: »Beatik (binom) dünel,« gospedal Lukad sagom, »keli Sölal, üf ukömom, utuvom galöli. Vo, sagob oles, oti omekom löpani tefü gueds valik oka.«
Kapied 20. Tefü löf ali soal e seil.
edit1. Sükolöd timi pötik jäfönok it, e memolöd suvo benodis Goda! Lüvolöd dinis nudälik! Lilädolös stöfäli somik, kel gevom umo lebönidi, ka jäfami! If ustönol pükotis nezesüdik e zigolöni nosidunik, ed i lilöni nulöfis e lupükotis: otuvol timi saidik e pötiki jäföna medidamis gudik. Saludals gretikün ävitoms melaki menas, üf äkanoms, ed ebizugoms, dünön kläniko Gode.
2. Ek esagom: »Alif ebinob bevü mens: aso men pülikum egekömob.« Atosi plakobs mödna, sosus lupükobs lonedo. Binos nefikulum, seilön löliko, ka no pökön vödso. Binos nefikulikum, binön pesävik domo, ka jepönok saido plö dom. Sikod, aikel steifom, lükömön al lifi linedik e tikäliki: at mutom, ko Yesus fagokön de lemödef. Nek maniföfo pubom sefik, ifno löfom pesävugi. Nek pükom sefik, ifno seilom viliko. Nek cifom gudik, ifno viliko binom nödik. Nek obüdom sefik, ifno ulenadom lobedöni viliko.
3. Nek fredom sefik, ifno labom it ok noelüdi konsienäla gudik.Ye sef saludalas eibinom fulik dredöna Godi. Do enidoms dubü tugs gretik e ben, deno in ok ebinoms no lu kudlik e miugiks. Ye sef badikanas säfonom pleitäle e rogame, e fino cütom omis it. Nevelo siagolöd oke sefi in lifüp at! aiviovemo jinol-la, binön kleudan gudik u soalan devodöl.
4. Aikels fa mens pacedoms, aso gudiküns, ebinoms mödna perisköföls levemo dem itekonfid tuik. Demüs binos frutikum mödikanes, das no binoms livik lefulno de tentads, sod das paneflenoms suvo, dat no binoms tu sefik, dat no pafuloms ba dubü pleitäl, ed i no lüslopäloms tu vilik al trodis senedik. O! konsienäli kio gudiki konsefomöv un men, kel sükomöv nevelo fredi golenik, e jäfomöv nevelo voli! Ki-gretiks püdi e takedi labomöv ut, kel, eklemövöl kudi vanik aliki, tikomöv te dinis saludik, e pladomöv oka speli lölik in Godi! —
5. Nek digom trodi sülik, ifno eplägomok dutlik in lebönid saludik. If vilol, vedön lebönidik jü ladi: nütridolöd in smacemi, e fagolös lutouni vola, äso binos pepenöl!: »Vedolsöd lebönidik in smacems okas!« In ziöp otuvol, kelosi mödna netuvol senedo. Ziöp binom lesumik, if niso stebon laiko; abu vedom taik e nestümik steböle seledo in ot. If gudiko ulödol ed ujepol oti beginü levotälam: tän obinom ole poso flen löfik ä trod svidikün.
6. In stil e taked lan devodik fästepom, e lenadom klänis biba. Uso tuvom leflumis drenas, me kels vatükomokös e klinomösok väneitso, dat vedomös pluo lebesevikum Jafale oka, pluo fagikum binom de lutoun alik vola! Demüs God sa lanals onilom ute, kel ufagomok de besevans e flens. Binos gudikum, binön pesävik e jäfönok, ka luleadölok dunön sägo milagis. Lobik binos mene tikälnik: segolön seledo, fugön palogöni, e no vilön logöni menis.
7. Kikod vilol logön, kelosi labön, no binos pedälik? Vol e desids oka fegoloms. Desids midäla stigoms, al zigolön; ab, if düp ufegolom: kiosi geblinol, ifno vexadis konsiena e disipami ladäla? — Segolön fredik pälos suvo lomädi lügik, e neit fredo pedugalöl kodom gödeli lügik. Midälik fred alik kömom somo flätöl; abu fino beitom e funom. Kisi logön kanol votöpo, kelosi no logol is? Ekö! sili, tali e löminis valik! Ibo se ats dins valik binoms pemeköl.
8. Kisi kanol, logön semöpo, kel kanos dulön lonedo disü sol? Kredol ba, pasatön! ye no orivol atosi. If valikosis logolöv komöpikis: kios binosöv, ifno jin vanik? Datovolöd oka logälis ali God in geil, e dabegolös pardami sinas e luleadas! Loveleadolöd vanikosis vanikanes! ab ol loigolöd, kelosis God ebüdom ole! Jötolöd yani poü ol, ed al oli vokolöd Yesusi, eli löfik oka! Blibolöd ke om in ziöp ola, bi votöpo no püdi otuvol also gretiki! Eblibolöv nefikulumo in püd gudik, ifno esegolöl elilolöv bosi lupükotas. Sosus fredol, lilön sotimo nulöfis: mutol, sufön demüs muifi ladäla.
Kapied 21. Lebönid lada.
edit1. If vilol, fästepön in gudikos: konsefolödok in godifred, e no vilolöd, binön libik tuiko, sod kipolös in pud sienis valik ola, e no loveleadolös oki frede nepötik! ukösekolödok lebönide lada, ed otuvol devodi! Lebönid givom gudikosis mödik, kelosis nepud laidunom, deülön foviko. Binos makäbik, das men kanom, evelo fredön lefulo dü lifatim at, kü betikom e beladom oka xilami, e risköfis also mödikis lana.
2. Demü leitäl lada e nesenidam tefü döfs obas, no senobs liedis lana obsik: sod nekodo smilobs suvo, kü gidiko mutobsöv, drenön. Lib veratik e fred legik no patuvoms, plä in godidred ed in konsienäl gudik. Läbik binom men, kel kanom, mojedön dini disipöl aliki, e konleadönok in lebönid saludik! Läbik, kel klemom valikosi kanöl, stenön u vetön konsieni! Komipolöd manik! Kustöf pabevikodom dubü kustöf. If nolol, moblibön de mens, tän i mens mobliboms de ol, e leadoms oli, dunön olikosi.
3. Loveleadolöd votanes dinis omas, e no migolösok in jäfis sölas gretik! Flokolöd balüdo logälis in oki, ed oli pato monedolös iti bu pelöfans valik oka! If no labol göni menas: no glumolösok dem atos, sod lügolöd, das no kondidol saido gudik e kautöl, äso lepötosöv dünele Goda e klerane devodik. Suvo binos frutölum e sefikum, no labön in lif at trodis mödik, pato midälikis. Ye, das no labobs, u senobs seledo trodis godik: its en binobs kod, bi no sükobs lebönidi ladäla, e bi no mojedobs lefulno trodis vanik e senedikis.
4. Oli lesevolöd nedigiki troda godik, ab umo digiki liedas mödik! If men binom lebönidik lefulno, tän vol lölik ote binom böladik e biedik. Gudikan tuvom kodis saidik glumönoka e drenöna. Ufas lenlogom oki, udas düvom kemeni: nolom, das nek lifom iso nenü vexads. Plu loigomok kuratumo, plu vedom glumikum. Din dola cödik e lebönida linedik binoms sins e klims obas, in kels seistobs pakopligöl somo, das kanobs seledo, medidön sülikosis.
5. If tikolöv suvumo tefü deil oka, ka tefü lifatim lonedik: nedoto gudumolövok zilikum. If beladolöv i pönis füdik höla e klinamöpa: kredob, das sufolöv viliko vobis e liedis, e das plafolöv nosi jalopa. Ye, bi dins at no pabeladoms, e bi löfobs nogo flätis: demüs blibobs kaldälik e nedutliks vemo.
6. Fib tikäla kodom mödna, das koap misalöfik plonom also vifo. Demüs plekolöd miugik al Sölali, dat givomös ole tikäli lebönida, e pükolöd ko profedal!: »Zibolöd obi, o Sölal! me bod drenas, ed obi drinädolös fulo me vat drenas!«
Kapied 22. Medidolöd misalöfi menik !
edit1. Aikö ubinol, ed aiköi ulüflekolok: obinol misalöfik, ifno ulüflekolok ali God. Kikod pomuifol, if no jenos ole, äso vilol e fliagöl? Kim labom valikosis segunü vil oka? Ni ob, ni ol, ni sembal menas su Tal. Nek in vol binom nenü sembals vexad e trepam, ifi binomöv regal u papal. Kim stadom gudiküno? Zelädo men ut, kel kanom, liedön bosi stimü God.
2. Temipäbs mödik e fibans pükoms: »Ekö! lifi ki-gudik labom men at! Ki-vemo binom liegik, gretik, valüdik e subimik!« Ye lenlogolöd guedis sülik! ed osenol, das timliks gueds alik vola binoms nosik, nesefiks vemo, e bufumo böladöls, bi nevelo palabedoms nenü kud ä dred. Bundem talikosa no mekom meni läbik, sod gued zenomafik saidom ote. Binos vo pöflik, lifön talo. Plu men steifom, lifön tikälikum: plu lif nuik vedom biedikum ote, bi senom gudikum, e logom kleilumo döfis perüböfa menik. Ibo fidön, drinön, galön, slipön, takedön, vobön, e binön padisojedöl neodes lemänik nata: binos misalöf gretik, e lied mene relädik, kel viliko binomöv paliböl e livik de sin alik.
3. Ibo men linedälik pavetom vemo dubü neods koapik in vol at. Demüs, dat binomös livik de misalöfs somik, profedal begom devodo, du sagom: »Obi savolöd, o Sölal, de zesüds oba!« Ye paö menes, no sevöles misalöfi okas, ed umo paö utes, kel löfoms misalöfi at e lifi golenik! Ibo semans, do zesüdikosis ti laboms te me vobön e lubegön: löfoms somo lifi nuik, das okudomsöv leno tefü monargän Goda, if kanomsöv, iso lifön tenüpoi.
4. O ladäls stupik ä nekrediks, kel in talikos seistoms also dibiko, das nosi gütoms, ifno midälikosis. Ye misalöfans at osenoms dolik nog in fin, vio pülik e nosik ebinos, kelosi elöfoms also levem. Abu saludals Goda, e Kristusa flens devodöl valiks ni eloigoms utosi, kel äplidos midäle, ni kelos in tim at efloros; sod spel valik otas e desän ästeifoms guedis tenüpik. Levip lölik otas pelüodom ini geil al guedis oibliböl ä nelogikis, dat dubü löfön logikosis no pazugomsös al bapikosis. No perolöd, o blod, speli fästepöna in tikälnikos! Nogo timi labol ä pöti.
5. Kikod vilol, fözogön ola desini? Suistanolöd, beginolöd in timil at, e pükolös!: »Nu binom tim dunöna, nu tim komipöna, nu tim pötik gudumöna lifi«. If sufol vexadis e liedis, täno binom pöt melidöna. Mutol, golön da fili e vati, büs okömol in klieti. Ifno ugebol mekädi tefü ok, obevikodol no klimi. Ünä polobs koapi döfik at: no kanobs, binön nen sins, e lifön nenü fav e lieds. Labobsöv viliko takedi nen misalöf; ye, bi dubü sin eperobs nedebäli, eperobs i leläbi veratik. Klu mutobs, sufädön, e varön misaladi Goda, jüs stad misalöfik ufegolom, e deilöf at pufeslugom dubü lif.
6. O! kio gretik binom döföf menik, aislopöl al badikosi! Lekoefol adelo sinis, ed odelo denu dunol pelekoefölis. Nu desänol vitami sinas, e posü düp mekol, äsif edisinolöv nosi. Demüs binos gidik, das miugobsok, e das no niludobs evelo bosi gretik dö obs, kel binobs also döfik e nelaidöfiks. Kanos i, paperön foviko dubü lulead, kelos finona me ben perivos in töb mödik.
7. Kis fino nog ojenos tefü obs, kel ya so lesun vedobs lavik? Paö obes, if vilobs, somo slopön al takedi, äsif ya binom-la püd e sef, do nena veged saluduga veratik pubom in täg obas! Zesüdosöv vo, das nogna, aso nuläbs gudik, pabetidobsöv tefü süds gudikün. Täno ba spelonöx tefü gudumam füdik e fästep tikälnik gretikum.
Kapied 23. Medidolöd deili !
edit1. Lesun obinos pafinöl iso ke ol; xämolöd, kimik binol! Adelo un men sibinom, ed odelo no pubom. Yed, if binom pamosumöl de logs, sun depubom i meme. O dim e düfäl lada menik, kel betikom te komüpikosis, e no bulogom umo füdikosis! Tefü valiks duns e tiks ola mutolöv kondidön, äsif deilolöv adelo. If labolöv konsienäli gudik, no dredolöv mödo deili. Binosöv gudikum, vitön sinis, ka fugön deili. If no binol peprepadöl aledo, liko obinol odelo? Odel binom nezelädik, e liko nolol, va ogetol odeli?
2. Kisi frutos, lifön lonedo, if gudumobsok also nemödiko? O! lif lonedik no gudumom obis vätimo, sod suvo mödom nogo debi. Dasö elifobsös dü del te bal in vol, ab gudiko in del at! Mödikans numoms yelis efegolöl sisü levotälam; abu frut levotälama binom mödna smalik. Deil binom dido jekik; yed obinos ba risköfikum, lifön lonedumo. Beatik men, kel oilabom bifü lögäls düpi deila okik, e prepadomok vädelso tefü deilön! If elogol evelo meni deilöl, memolöd, das ol id ogolol vegi öt!
3. If gödel binom: tikolöd, das orivol no vendeli! Vendelo no venüdolös, siagön ole gödeli! Demüs aibinolöd löbik, e lifolöd somo, das deil tuvomös oli nevelo nelöbiki! Mödikans deiloms süpido ä no peprepadöls. Ibo düpo, kü no paniludos, Menason okömom. If düp lätik at ukömom: obeginol, cödätön levotiko tefü lif lölik efegolöl oka, ed opidol vem, das ebinol also luleadöl e leitälik.
4. Kio läbik e visedik binom men, kel nu steifom, binön somik, aso kel vipom patuvön in düp deila! Nestümön lefulik voli, levip zilik fästepöna tugso, löf al pudi, pönäd jalopik, lobedön viliko, fenonönok, e sufön aliki täöfi demü löf ali Kristus: atos gevos konfidi gretik tefü odeilön läbiko. Ünä binol saunik, kanol, dunön gudikosis mödik; ye no nolob, kelosis okanol malädik, dunön. Nemödikans pagudumoms dubü maläd, äs id uts pasaludükoms seledo, kel tävoms mödiko.
5. No vilolös, lekonfidön flenes e palefanes! Id in timi füdik no fözogolös oka saludi, bi mens ofögedoms oli vifumo, ka niludol! Binos gudikum, nu kudön pötatimo, e dunön büo bosi gudik, ka spelön, das votans oyufoms ole posü deil ola. If ol it no binol nu kudlik ple ok: kim okudom füdo ple ol? — Nu tim binom lekostik; nu binoms dels saluda, nu tim lesumik binom. Abu paö ole! if no gebol gudikum timi, in kel kanol, melidön utosi, kelo lifolöv tenüpik. Tim okömom, kü olevipol deli u düpi bal, al gudumokön; ye no nolob, va ogetol oti.
6. Suö, o löfünan! de kio gretik risköf kanol, livokön, de dred ki-gretik lelivönok, if nu ailifol in godidred ed in valädam deila! Steifolöd, nu lifön somo, das in deilönadüp labolös kodi fredönoka bufumo, ka dredöna! Lenadolöd nu, deilön vole, dat nu beginolös, lifön ko Kristus! Lenadolöd nu, nestümöni valikosis, dat täno kanolös, lügolön peneleadöl ali Kristus! Nu pudolöd me pönäd koapi oka, dat täno kanolös, labön konfidi zelädik!
7. Agö!, o stupan! kikod niludol, lifön lonedo, do deli nonik labol is paseföli? Kio mödikans, spelöl lifüpi lonedik, ebinoms pecitöl e pateilöls süpido de koap! Ki-mödna elilol sagön: »At pefunom dub glaföm, et evatadeilom; at, falöl de geil, eblekom nägapi, et etuafom dubü zibet, et edeilom pledöl. Balan edeulom filo, votan fero, votikan sukü lupakip, votan dubü ravels!« Somo fin valikosas binom deil, e lif mena fegolom, äso jad.
8. Kim omemom oli posü deil olik, e kim oplekom ple ol? — Eyö, o löfikünan! nu dunolöd, kelosi kanol dunön, bi no sevol, kü odeilol! I no nolol, kelos ozitos ole posü deil. Ünä labol timi, konleadolöd ole liegis nedeilik! Tikolös nosi, sumü salud oka, kudolöd tefü godikos te! Flenis ole nu mekolöd, grestimöl saludalis Goda, e naldunolöl vobädis omas, dat, if uditol se lif at, ets olasumomsös oli in tenedis tenüpik! —
9. Kondidolöd, aso voöpan ä lot talo, keli dins vola no tefoms! Ladäli konsefolöd libiki ä suso pelüodöl al Godi, bi no labol iso pladi dulik! Usi flekolöd oka pleki delik e seifis, pemigöl ko drens, dat posü deil tikäl ola digomös, lovegolön läbik al Sölali! Jenosöd!
Kapied 24. Tefü cödöf e pöns sinas.
edit1. In valikos betikolöd fini, e vio oledulol loü cödal jalopik, kele nos binos pesävik; kel no pasofom dubü legivots, e no lensumom sekusadis, sod cödöfom ma git! O sinel misalöfikün ä stupik! kel dredol sotimo loapi mena zunöl: kiosis ogesagol Gode, sevöl klimadunis valik ola? Kikod no büokudol tefü del cödöfa, kü nek okanom, pasekusadön u pajälön fa votan, sod alikan obinom bölad saidik oke it? Nu vob ola binom frutöl, drens binoms lesumik, seìf padalilom, dol mopönädom e klinom.
2. Klinamöpi gretik ä saludiki labom men sufädik, kel, plaköl negiti, liedom umo demü badnöf votana, ka demü negit pedunöl oke; kel plekom viliko plo taels oka, e pardom lado debälis; kel no fözogom, begön pardami de votikans; kel misaladom nefikulumo, ka zunom; kel gebom mödna mekädi ta iti ok, e steifom, yokön lefulno midi tikäle. Binos gudikum, nu klinönok de sins, e noesön klimis, ka fözogön klinami al füdi. Vo citobsok it dubü löf neleodik, keli labobs al midi.
3. Fil et okonsumom kiosi votik, ifno sinis ola? Pluo nu spalolok it, e sukol mide: plu jalopikumo popönol poso, ed okumol stefi gretikum pöfiledöli. Dubü kelos men usinom umo, dub atos popönom vemumo. Nedutlikans potomoms uso me stigs filik, e gomikans povexadoms dubü tuvemiks soöf e faöf. Uso nepuedans e löfels luyofas polovegifoms me picin filedöl e svefin lustömöl; glötans sukü dol olukanidoms, äso dogafs vutöl.
4. Klim alik olabom tomi patik oka. Pleitälans pofuloms uso me jemod valik, e monälans povexadoms dubü neodöf vemikün. Uso düp bal in pön obinom nesuflikum, ka yels tum is in pönadüns. Uso binom ni taked, ni trod pekodemanes; yed iso lieds zedoms sotimo, e kanon, juitön trodis flenas. Nu binolöd kudübik e glumik tefü sins, dat in del cödöfa kanolös, binön sefik ko beatikans! Ibo täno cödikans ostadoms in stanöf gretik ta utis, kel eglumoms ed epedoms otis. Tän aso cödel ostanom, kel nu disojedomok miugiko cödätes menas. Täno pöfikan e miugan olaboms konfidi gretik; abu pleitälan pojeikom väflanso.
5. Tän pojonos, das men sapik in vol ebinom ut, kel elenadom, binön stupik e nestümik dem Kristus. Täno lied alik, pesuföl sufädo, oblinom fredi, e negit valik omuedom. Täno relan alik ofredom, e negodlikan alik olügom. Tän mid, pukruzöl oyubom umo, ka if puinulüdomöv in luyofs. Täno kleot misalöfik onidom, e kleot feinik podagom. Tän ludomil pöfik polobom umo, ka gledom golüdik. Tän aisufäd ofrutom umo, ka valüd lölik vola. Täno lobed balikälik popliedom plu, ka luvisedöf alik vola.
6. Täno konsièn peklinöl e gudik ofredom umo, ka filosopav nolanik. Tän enestümön liegis ovätükos plu, ka div lölik dinas talik. Täno potrodol umo demü plek devodik, ka dem juit zibetas zadik. Tän ofredol plu tefü seìl pefölöl, ka tefü lupükam lonedik. Täno vobäds saludik völadoms mödikumosi, ka jöniks vöds mödik. Tän lif jalopik e pönäd düfik oplidom plu, ka fredodam valik Tala. Lenadolöd, nu sufön in smalikos, dat täno kanolös, palibön de lieds gretikum! Is blufoloköd balüdo, al nolön, kelosis okanol poso. If nu no kanol, sufön so nemödikosi: okanol liko, ledulön tomis tenüpik? — If nu vexad smalik oli mekom also nesufädöli: kiosi höl obevobädom täno? — Ekö! no kanol vo, labön fredis tel: iso fredön in vol, e poso regön ko Kristus.
7. If jü deli nulik elifolöv in stims e luyofs: atos valik kiosi frutosöv ole, if mutolöv, deilön in timil at? — Sikodo valikos binos van, sumü löfön Godi, e dünön Ome soelik. Ibo, kel men löfom se lad lölik Godi: at men dredom ni deili, ni pöni, ni cödöfi, ni höli, bi löf lefulik mekom lügolami sefik al Godi. Ye stunik no binos, das ut, kel fredom nogo tefü sinön, dredom deili e cödöfi. Abu binos gudik, das luüno elos dredön höli bemütosös oli, üf löf no nog gevokom oli de sin. Yed, aikel no konsidom godidredi: okanom leno, ledulön in gudikos, sod ofalom sun in jäinilis diabana.
Kapied 25. Dö gudumam zilik lifa lölik obas.
edit1. Binolöd galik ä dutlik in dün Goda, e tikolöd suvo!: »Alki ekömol isi, e kikod elüvol voli? — No-li ejenos, al lifön Gode, e vedön men tikälnik?« — Demüs steifolöz zilik, fästepön, bi olabol lesuno mesedi vobas oka. Täno ni dred, ni dol obinoms fovo in züm ola. Nu labol töbi nemödik; e tän otuvol takedi gretik, sägo fredi tenüpik. If uivobol fiedik ä zilölo: God, nenü dot, omesedom fiedik ä liegliko. Mutol, konsefön speli fümik, das ogetol pamatuigi; abu no cedolöd atosi, aso zelädiki, dat no vedolös nedutlan u pleitälik!
2. Ven semikan trepik etidisom mödna bevü dred e spel, e, pabäpedöl vöno dubü glum, ibäjedomok bifü latar sembal glüga, al plekön: etikom äd epükom sukölosis: »Dasö nolobös ga, va oledulob in ben!« E foviko elilom linedälo gesagi godik at: »Kiosi vilolöv, dunön, üf nololöv atosi? Dunolöd nu, kelosi vilolöv, dunön tän, ed obinol saido sefik!« E suno patrodöl e pastenüdöl, elekonfidom vile godik, ed efinom tidisöni trepiko. No evilom fövo, davestigön nudälik, kelos ome zidosöv füdo; sod esteifom umo, vestigön, kelos binòs-lá plidöl e lefulik ma vil Goda, al beginön e finön vobädi gudik aliki segunü vil ota.
3. «Spelolöd in Sölali, e dunolöd gitikosi! (profedal pükom); lödolöd Tali, e ponulüdol dubü liegs ota!« Os-bal neleados mödikanis tefü fästep in gudikos e gudumam zilik; os binos: lejek demü fikuls, u töb komipöna. Vö! mens ut bu votans fästepoms tugso, kel töboms stenüdikum, bevikodön valikosis, binöl vetikum e taikumos omes. Ibo men fästepom umo, e melidom beni gretikum täno, kü bevikodomok um iti, e funälomok.
4. Abu no valikans laboms mödikosi leigik, kelosi mutoms, bevikodön e funälön. Ye komipel zilik, do labom-la liedodis mödikum: ofästepom um in gudikos, ka votan benosüdik, kel binom lu zilik tefü tugs. Dins tel yufoms mödo al gudumami gretik, os binos: elos säslütokön mekädik utose, al kelosi nat labom slopäli badik, ed elos steifön zilo utosi gudik, kelosa neodobs üno. Töbolös, vitön e bevikodön id utosi pato, kelos miplidos ole suvo in votikans.
5. Sükolöd vätopo, frutön ole! Sosus logol u lilol samis gudik: zilolöd, naldunön otis! Ab, if esenidol bosi pönik, kautolöd, posdunön atosi! ud, üf edunol vöno, steifolöd, foviko gudumönok! Äso log oka loegom votikanis, id also paloegol fa votans. Kio lesumik ä löflik binos: logön blodis zilöl, devodikis, benosüdik ä mükikis! Kio lügik ä plönik binos: logön, üf zigoloms neleodo, e no dunoms, al kelosi binoms pabevoköl! Kio dämik binos, luleadön bligis cala, e flekön ladäli al dinis no palenkonfidölis obes! —
6. Memolöd desini pelensumöl, e bitopälolös oke magi pekruzölana! Gito jemolöx, üf medidol lifi Yesusa Kristus, bi no nog esteifol umo vedöni sümik ome, do ebinol lonediko su veg Goda. Kleran, kel uplägomok senidik e devodo tefü medidön lifi saludikün e liedi Sölala: otuvom niso valikosi bundemo, kel binos frutöl e zesüdik ome, e no sükomök bosi gudikum plä Yesus. Od! if Yesus pekruzöl kömomöv in obas ladi, ki-vifo binobsöv nolanik saido!
7. Kleran zilöl lensumom e sufom viliko valikosis pebüdöl ome. Kleran luleadik ä lavik labom glumis e denu glumis, e plönom väflanso trepis, bi nelabom trodi linedik, e paneleadom, sükön senediki. Kleran liföl plä pud binom pasesiadöl rübübe gretik. Kel sükom leitamis e libis: oibinom in blötanab, bi nu atos, tän etos omiplidos ote.
8. Liko dunoms klerans votik also mödiks, kel binoms panüstöböl vemo nödü pud kleudik? Segoloms seledo, lifoms padepatöl, fidoms pöfiküno, poloms kleotis lüdik, voboms suvo, pükoms nemödikosis, galoms lonedo, suistanoms gölo, lonedoms plekis, lilädoms mödna, e tägoms in pud alik. Loegolöd Kartusianis, Zisterzianis, e rodefas votik kleudanis e jikleudanis, kel suistanoms väneitso, al lobikanidön Gode! Demüs binosöv jemodik, if ol vilolöv, blibön nedutlan in dün also saludik, du mödef also gretik kleranas beginom, lobön Godi.
9. Od, if no neodonöv, dunön bosi votik, ka lobön me löliks lad e mud Sölali obas, Yesusi Kristus! Od, if nevelo neodolöv, fidön, drinön e slipön, sod aikanolöv, lobön Godi, e jäfön te plägamis tikälnik! — Täno binolöv mödo läbikum, ka nu, kü dünol koape demü zesüdöfs mänifodik. Dasö zesüdöfs at no sibinomsös, sod dasö neodobsös te zibetis tikälnik lana, kelis, liedö! gütobs ze seledo!
10. If men urivom, das sükom oke trodi lä jafot nonik: täno beginom, gütön lefuliko Godi; tän id obinom kotenugöl lefulno tefü zids valik; täno ni fredom demü din gretik, ni lügom demü din smalik; sod lölik e konfidöl lovegivomok Gode, binöle ome valikos in valikos. Din nonik deulom, u deilom evelo Gode, sod valiks lifoms e dünoms ote ma vineg.
11. Aimemolöd fini, e das tim paperöl no gekömom! Tugis ovöbol nevelo nenü kudöf e dut. If beginol, vedön lavik: beginol, stadön badlik. Ab, üf ukonsefol zili saludik: otuvol püdi gretik, e vob obinom nefikulikum ole demü ben Goda e löf al tugi. Men zilöl e dutlik binom löbik al valikosis. Binos töbikum, tadunön klimes e liedodes, ka mekön vobis koapik. Kel no vitom pökis smalik, falom pianik in gretikumis. Oifredol vendelo, üf ugebol gudiko deli. Galolöd tefü ok it, stigolös e monedolöd it oki, ed, aivio votikans stadomsöx, ol no luleadolödok! Ofästepol also mödo in gudikos, äs ugebol mekädi ta iti ok. Jenosöd! —
Küpets (fonät: ‚Wikisource’).
- ↑ Ma diläd tiädü „Bükapöks”.