Buks fol dö Züp Kristusa/Buk telid

Buk telid. Monedams duköl al tägi linedälik.

Kapied 1. Dö täg linedälik.

1. »Monargän Goda binom in ols,« Sölal pükom. Flekolöd ladäli lölik al Sölali, e lüvolöd voli misalöfik at! täno lan olik otuvom takedi. Lenadolöd, nestümön senedikosis, ä flekönok al linedälikosis! tän ologol, das monargän Goda kömom in oli. Ibo monargän Goda binom püd e fred in Salutikäl, kels no pagivoms negodlikanes. Kristus okömom al oli, ed ogivom ole trodi oka, üf umökol ote lödi digik in linedäl. Valiks glor e dek ota binoms in lined, ed uso plidos ote. Visidom mödna meni linedik, pükom svido ke ot, gevom trodi lesumik, püdi mödik, e binom konfidlik in mod stunik vemo.

2. Suö, o lan fiedik! prepadolöd ola ladi gamale at, dat binomös löbik, kömön al oli, e lödön in ol! Ibo pükom also: »If ek löfom obi, ofölom oba vödis: e Fat oba löfom oti; okömobs al oti, ed omökobs in ot lödi.« Demüs givolöd pladi Kristuse, e nesiamolöd ningoli dines votik alikes! Üf labol Kristusi: binol liegik, ed atos saidos ole. — Ot it obinom jelal olik e plokudal fiedik in valikos, sosä no spelolök in menis. Ibo mens votomsok lesun, e depuboms vifo. Ye Kristus aiblibom tenüpoi, e yufom stenüdik jü fini.

3. No dalon, konfidön mödo mene döfik ä deilike, ifi binom frutöl ä löfik. I no dalobs, lügön mödo, if tadunon e tapükon obes sotimo. Kels binoms adelo ke ol, kanoms, binön odelo ta oli, ed i votafleko; mens votaflekomsok mödna, äso stom. Pladolöd oka konfidi lölik in Godi, ed Omi dredolöd ä löfolöz! It oplopükom ple ol, ed odugom also dini, äso binos gudikün. No labol iso pladi bliböl, e binol voöpan ä tevan, aikö stebol. Id olabol nevelo takedi, ifno lölik binol pebalöl ko Kristus.

4. Kikod zilogol iso, do plad at no binom top olika takeda? Löd ola mutom, aibinön in sül, e dalol, äs un men beigolöl, te lenlogön talikosis. Dins valik fegoloms, e fegolol togo ke ots. Kautolöd, das no lenlagol läso, dat no pafanolös, e deulolös! Tiks ola binomsöz lä Geilünal, e pleks ola pailüodomsöz ali Kristus! If no kanol, medidön subimikosis e sülikosis: takedolöd in lied Kristusa, e lödolöd vilik vunis saludik oma! Ibo, if ulefugol devodik al vunis e vunamalis ela Kristus: osenol stenüdami gretik in glum: oglifol no dem nestüm menas, ed osufol nefikulo vödis stimiviodöl.

5. I Kristus penestümom fa mens in vol, ed in misalöfün pelüvom in lejemod fa besevans e flens. Kristus evilom, liedöni e panestümöni: ed ol, venüdòl-li, plonön tefü bos? — I Kristus elabom neflenis e tapükelis; ed ol, li-vilol, labön valikanis, aso flenis e benodelis? Demü kios sufäd ola pokronomöv, if nos täöfa ujenos ole? — If no vilol, sufön anikosi täöfik: flen Kristusa obinol liko? — Sufolöd ko Kristus e demü Kristus, if vilol, regön ko Kristus!

6. If enütridolöv lefulno balna in linedäli Yesusa, ed esmeikolöv bosi smalik löfa filedöl oma: täno no kudolöv tefü frut u däm ola, sod fredolöv bufumo demü nestim pelendunöl, bi löf ali Yesus bevobädom, das men nestümomok iti. Men löföl Yesusi e verati, men verato linedälik ä pelivöl de slopäls neleodik, kanom neleado lüflekönok ali God, datovälokön ove iti ok, e takedön juitü God.

7. Aikel lesevom dinis, äso binoms, no äso pasagoms e padivoms: at binom vo sapik e petidöl umo fa God, ka fa mens. Kel nolom, tägön linedälo, e divön te nemödo dinis senedik: at dunom vobädis devodik netefodü plad, e nes varön timi pelonöl. Men linedälik kanom, konleadokön foviko, bi nevelo kösekomok lefulno dines senedik. Ni vob senedik, ni jäfam zesüdöl dü tim sembal, neleadoms oti, sod yumomok dines, äso zidoms. Kel eblimom gudik ä leodo linedäli: no patupom dubü dins selednik e vädiks menas. Dins neleadoms e disipoms eki also mödo te, äso jäfom otis.

8. If binolöv gudik lefulno, e peklinöl löliko: valikos ole dünosöv al gudikosis e fästepi tikälnik. Ye, bi no binol lefulno edeilöl oke it, e no padepatöl de talikos valik: demüs dins mödik miplidoms ole, e kofudoms oli. Nos stenos e kopligos also mödik ladi mena, äso löf neklinik al jafotis. If klemol trodi senedik: okanol, medidön sülikosis, e mödna yubön linedälo.

Kapied 2. Binolöd miugo lenödik !

1. Smacedolös, va ek binòm-lá ple ol, ud ta oli; ab atosi steifolöd kudlik, das God binomös ke ol in din alik, keli dunol! Konsefolöd konsienäli gudik, e God ojelom oli gudiko! Ibo badnöf mena nonik kanom, dämön ute, kele God vilom, yufön. If kanol, seilön e liedön, ologol nedoto yufi Sölala. Nolom timi ä modi savön oli, e demüs mutol, lekonfidön ote. Labom valüdi, yufön ole, e libön oli de bejemam alik. Suvo frutos vem, al konsefön miugi gretikum, if votans noloms e blamoms döfis obas.

2. If men miugomok demü döfs oka: täno sofom nefikulo votanis, e saidunom nefikulik utes, kel zunoms ome. God jelom e libom miugani, löfom e trodom oti; slopälom al meni miugik, seidilom beni gretik miugane, e posü bapam ota datovom oti al glori. Manifamom klänis oka miugane, ed, oti svidiko zugöl, vüdom al oki. Nestü pegetöl bejemam, miugan blibom lefulno in püd, bi aibinom pestaböl in God, e no su vol. No niludolös, das emekol-la fästepis in tugs, if oli no cedol, aso pülikumi, ka valikanis.

Kapied 3. Dö gudik men püdik.

1. It binolös balüdo in püd, e tän okanol, mekön püdi lä votans! Men püdik mekom fruti gretikum, ka nolal. Men liedodik seplänom badavilo i gudikosi, e kredom nefikulo badikosi. Gudikan püdik seplänom valikosis al gudikosi. Kel binom vo püdik, badiniludom tefü nek. Abu men nekotenugöl e muifik pavexadom dubü tiks badiniludöl difiks. Ni om it binom takedik, ni leadom votanis, takedön. Pükom suvo, kelosis no pükön mutomöv, e nedunom, kelosi mutomöv, mekön bufumo demü frut oka. Loegom, kelosis dunön, votikans binoms pabligöl, e luleadom, kelosis it mutom, mekön. Sikod uzilolöz balüdo ta iti ok, e tän okanol, zilön gito tefü kemen oka!

2. Binol vemo skilik, al sekusadön e kölön dunotis oka; ye no vilol, läsevön sekusadis votanas. Binosöx gidikum, das iti kusadolövok, e das sekusadolös oka blodi! If vilol pasuföni, sufolöd i votani! Lesevolöd, das binol nogo fagik de veratiks löf e miug, kel zunom e nekotenugom tefü nek, ifno tefü ok it. No binos gretik, melakön ko gudikans e sofans; ibo atos plidos nato valikanes. Alikan labom i viliko püdi, e löfom utis pato, kel binoms meuga öt ke om. Abu lifön püdo ko düföfans e vädikans, ko nepudans u tadunels obas: atos binos ben gretik e dun vemo pöloböl e manälik.

3. Teldikans lifoms in püd ke ok, ed i ko votans. Yed i votans binoms, ni laböls in oks püdi, nu leadöls votanis in püd; binoms bölad votanes, ab aiböladum okes it. Nogo votans binoms, kel konsefoms okes it püdi, ä steifoms, gedukön votikanis al püdi. Yed obas püd valik in lif misalöfik at binom pösiadöl bufum in sufami miugik täöfas, ka in no-senöni otis. Kel men nolom gudiküno, liedön: olabom püdi gretikün. At binom vikodel okana, ä söl vola; binom flen Kristusa, ä geral süla.

Kapied 4. Tefü ladäl klinik e desän balikälik.

1. Me flitäds tel, kel binoms balikäl e klinug lada, men datovomok ove talikosis. Balikäl mutom binön in desän, e klinug in dunakod. Balikäl steifom Godi; klinug dasumom e gütom oti. Nonik dun gudik obinom plönik ole, üf ubinol linedälo palivöl de desid neleodik. If desänol e sükol nosi votik, ka plidön Gode, e fruti kemena: ojuitol libi linedik. Üf lad ola binomöv ritik: jafot alik binomöv ole lok lifa, e buk tida saludik. Jafot nonik binom also smalik e pülik, kel no plösenom-la gudi Goda.

2. If binolöv gudik ä paklinöl linedälo: logolöv nen neleadüb, e suemolöv gudiko valikosis. Lad klinik dudranom süli e höli. Alikan cödätom senedik also, äso binom linedälo. Üf fred binom evelo in vol, zelädo men lada klinik juitom oti. Ed, üf lied e trep binoms semöpo: täno konsien badik senom plü otis. Äso fer, pepladöl in fili, perom feraxüdi, e vedom glutöl lefulno: also men, ulüflekölok lölik al Godi, paklinom de nedut valik, e paceinom in meni nulik.

3. Sosus men beginom, vedöni lavik: täno dredom töbi smalik, e lensumom vilik trodi senedo. Ab, üf beginom, bevikodönok lefulo, e tägön manälik su veg Goda: täno cedom aso nefikulosi, kelos ejinos fikulik ome büo.

Kapied 5. Medidolöd iti ok !

1. No kanobs, konfidön obes it lemödo; ibo ben e sev defoms obes suvo. Litäl in obs binom smalik, e perobs oti nefikulo dubü lulead. Mödna i no senidobs, das binobs also bleiniks linedälo. Mekobs mödna badikosis, e sekusadokölso dunobs te badikumo. Pamofobs sotimo kodü liedod, e kredobs, das jenos-la demü zil saludik. Blamobs smalikosis in votan; e no loigobs pökis gretikum obas. Senobs ze foviko, e düvobs as mödikosi, kelosi sufobs fa votans; abu no loigobs, vio mödikosi votans sufoms fa obs. Men, düvölöv verätik e gito dunis oka, no tuvomöv kodi cödätöna jalopo votanis.

2. Elos kudönok it binos linedälike mene kud balid kudas valik; e kel jäfomok iti dutliko, seilom nefikulo tefü votans. Ovedol nevelo men linedälik e devodöl, ifno seilol dö votans, e kautol lepato tefü ok it. If loegol lefulno Godi ed oki te: dins pusenidöl in sened no omufoms oli. Kiplado binol, if no binol komik ole it? Ed, if edugolol valikosis: kisi frutos, if eluleadolok it? — If vilol, labön püdi, e vo pabalön ko God: mutol, nedunön valikosis votik, e loegön oki soelik te.

3. Demüs fästepol mödo in gudikos, if konsefolok pelivöli de taliks kuds alik. Palunol vem, üf bosi talik cedol, aso veütikosi. Nos ole binosöd gretik, subimikos, lesumik u plidöl, sumü God soelik, e kelos binos fa God! Trodi valik, keli jafot gevom, düvolöd vaniki! Lanäl, löföl Godi, nestümom valikosi, kel binos pülikum, ka God. God, el tenüpik, nemaflik e fulöl valikosis, soelik binom trod lana e fred veratik ladäla.

Kapied 6. Dö fred konsiena gudik.

1. Fam mena gudik siudom in noelüd konsiena gudik. Konsefolöd konsienäli gudik, ed oilabol fredi! Konsien gudik kanom, sufön lemödikosis, e binön lefredik in täöfs. Konsienäl badik aibinom dredik ä pemuiföl. Otakedol svidiko, üf lad ola no ublamom oli. No vilolös, fredön, pläsif edunol gudik! Badans laboms nevelo fredi veratik, e no senoms püdi linedälo; »ibo püd no binom negodlikanes,« Sölal pükom. Ed, if sagoms: »binobs in püd, neläb no zidom obes, e kim kinom, dämön obes?»: no kredolöd otes! ibo zun Goda säflamom süpidik. Täno vobäds otas ponosoms, e tiks omsik odeuloms.

2. Famokön in glum, no binos fikulik löfölane; ibo somo famön oki malos, famönok in kruzöm Sölala. Blefik binom stim, kel pagivom, e keli getobs fa mens. Lügöf aikopanom stimi vola. Stim gudikanas seistom in konsienäl otas, e no in mud menas. Fred cödikanas binom fa God ed in God, e yof otas in verat. Kel men levipom glori veratik ä dulöli: no kudom tefü glor timlik. E, kel steifom, u no nestümom ladälo glori timlik: jonom kleilo, das löfom lu mödiko süliki. Men ut juitom takedi gretik lada, kel kudübom ni tefü lobs, ni tefü blams menas.

3. Men, kela konsienäl binom klinik, binom nefikulo kotenugöl ä takedik. Binol ni saludikum, if palobol, ni nestümikum, if pablamol. Kelos binol, atos binol; e no kanol, padüvön plu, ka binol noelüdü God. If loigol, kelos binol in linedäl oka: okudübol no tefü atos, kelosi mens sagoms dö ol. Men logom senedi; abu God logom in ladäli. Men konsidom dunotis; ye God vätom desänis. Aidunön gudik, e niludön nemödikosis tefü ok: atos binos mal lana miugik. Elos no-vilön patrodöni fa jafot sembal, binos mal klinuga gretik, e konfida linedälik.

Kapied 7. Löfolöd Yesusi plu, ka valikosis !

1. Leläbik binom, kel sevom, kelos binos: löfön Yesusi, e nestümön iti ok demü Yesus. Muton, lüvön löfikosi demü pelöfan, bi Yesus vilom, palöfön soelik, e plu, ka valikos. Löf jafota binom cütik ä nelaidöfik; löf Yesusa binom fiedik ä ledulöl. Aikel lenlagom jafote, ofalom ke ofalöl; kel lenlägomok Yesuse, stadom fimik tenüpoi. Ati löfolöz, ed oti konsefolöz ole aso fleni, kel, ifi valikans yiloms de ol, no lüvom oli, e no leadom jenön, das odeulòl-la fino! Pateilolök füdo de valikos, va vilol-la, ud no vilol-la.

2. In lifön e deilön yümoloköd Yesuse, e lekonfidolöz fiede ota, kel soelik kanom, yufön ole, üf valikans binoms nekanik! Pelöfan ola binom somik, kel no vilom, sufön votani nebü ok; sod vilom, soelik labedön ola ladi, ed aso regal siedön su tron lönik. If nololöv, livönok gudiko de jafot alik: Yesus vilomöv, lödön vilik lä ol. Otuvol, das konfid valik, pupladöl fa ol plö Yesus in menis: obinom paperöl ti löliko. Demüs no konfidolöd ride vienik, e no stuidolösok su oti, bi mid valik binom, äso yeb, ed oka glor alik ofalom, äso yebaflor.

3. Pocütol vifo, if konsidol te jini senedik menas. If ole sükol trodi e fruti lä votans, osenol mödna dämi. If sükol in valikos Yesusi, otuvol i Yesusi. Yed, if sükol iti ok: otuvol ìd oki it, ab ali rüb ola; ibo men, no süköl Yesusi, binom dämikum oke, ka vol lölik e taels valiks.

Kapied 8. Tefü löf konfidlik Yesusa.

1. If Yesus kombinom: valikos zitos gudik, e nos jinos, binön fikulik; ab, üf Yesus no kombinom, valikos binos plönik. If Yesus no pükom in obs, trod binom nosik; yed, üf Yesus sagom vödi te bali, trod gretik pasenom. No-li Maria Magdalena esuistanof foviko de plad, kö edrenof, sosus Martha epükof: »Ekö Sölali! vokom oli?« — O düp läbik! kü Yesus vokom de drens al fredi tikäla. Kio neluimälik e düfälik binol nen Yesus! Ki-stupik binol e vanik, üf vipol bosi plä Yesus! Atos nò-li binos dämum, ka per vola lölik? —

2. Vol kanom, ole frutön kiosi nenü Yesus? Binön nen Yesus, binos höl vetik; e binön ko Yesus, binos palad svidik. Üf Yesus binom ke ol: neflen nonik kanom, dämön ole. — Aikel etuvom Yesusi: etuvom divi gretik, sägo gretiküni guedas valik. E, kel perom Yesusi: perom tu mödikosi, e mödikumosi, ka voli lölik. Pöfünan binom, kel lifom nenü Yesus; e liegünan binom, kel binom flen Yesusa.

3. Kanäv gretik binos: nolön melaköni ko Yesus; e sev tönöna Yesusi binom vised gretik. Binolöd miugan ä püdik! e Yesus obinom ke ol. Binolös devodöl ä takedik, e Yesus oblibom lä ol! Kanol, femofön foviko Yesusi, e perön beni oma, if vilol, kösekönok senedikoses. Ed, üf ufemofol ed uperol omi: olefugol ali kim, e kimi tän osükol, aso fleni? No kanol ti, lifön nenü flen, ed, if Yesus ole no binom flen bu valikans: obinol vemo lügik ä nepatrodöl. Dem atos dunol stupik, if konfidol votane sembal, u fredol in om. Välolöd bufumo voli lölik, aso nefleni, ka elosi nofön Yesusi! Bevü pelöfans valiks Yesus soelik binomöz el pelöfan patik!

4. Valikans palöfomsöd demü Yesus; abu Yesus palöfomöz dem ok it! Yesus Kristus soelik binom pölöföl lepato, bi soelik patuvom gudik ä fiedan bu flens valik. Dem ot ed in ot, ä flens ä neflens binomsöd löfik ole, ed oti lebegolöd plo valiks at, dat valikans oti lesevomsös e löfomsös! Vipolöd nevelo, palobön u palöfön pato, bi atos dütos te Gode soelik, kel no labom eki leigik oke! I no vilolöd, das ek jäfomös oli in ladäl oka! id ol no jäfolöd löfi kol votani; sod Yesus binomöz in ol ed in gudikan alik!

5. Linedäl ola binomöd klinik ä libik, nenü kopligam ko jafot sembal! If vilol, gütön e nolön, vio svidik binom Sölal: mutol, binön palivöl de slopäls votik, e däblinön ladi peklinöl Gode. Atosi no orivol jenik, ifno ben ota fokömom ole, e lenzugom oli, dat, ol vagik e pelivöl de valikos, pabalolös soelik ko soelik! Ibo, if ben Goda kömom in meni, täno men vedom stenüdik tefü valikos; yed, if ben yilom: men vedom pöfik ä fiban, e binom paloveblünöl, bido te al pafaedön. Ye no dalom, vedön smakurajöfik, u devön dem atos; sod mutom, lekonfidön sufädugo vile Goda, e, lobü Yesus Kristus, sufön valikosi zitöl ome; ibo posü nifatim sukom hitüp, e posü neit gekömom del, e posü lustom stom lejönik pubom.

Kapied 9. Dö nelabön trodi valik.

1. No binos fikulik, nestümön trodi menas, if labon godiki. Ye binos gretik, e sägo legretik, üf kanon, nelabön ä trodi menas, ä godiki; if kanon, vilöni stimü God, sufön viliko xilami ladäla, ed in nos sükön iti ok, e no gelogön su melidodis lönik. Kis gretik binos, das binol yofik e devodan, if ben kömom? — Düp at binom viplik valikanes. Ut sofiko monidom, keli ben Goda polom. E kikodo stunön, if böladi no senom ut, kel papolom fa Levalüdal, e padukom fa Dukünal?

2. Labobs viliko bosi trodöl obis, e binos fikulik, klemönok iti. Matüral Laurentiud sl. ebevikodom voli e slopäli al oka bijopali, bi enestümom valikosi, jinöl mekön in vol fredi, e löfü Kristus eliedom i sufädik, das Goda saludünan Sixtud, keli elöfom vemüno, pemosumom ome. Sikodo löfü Jafal ebevikodom menilöfi, e trode menik ebizugom plidöni Gode. Id ol lenadolöd also, löfü Godi lüvön fleni un zesüdiki e löfiki. I no glifolöd, if pulüvol fa flen! Ibo nolol, das fino valikans poditobs balan de votans.

3. Men komipomök mödo e lonedo ta iti ok, büfä lenadom, iti bevikodönok lefulniko, e dugön slopäli lölik oka su God. If men stuidom oki su oki it: täno lönvedom nefikulo trodes menik. Abu löfölan veratik Kristusi e steifan zilik tugas no lönvedom trodes, e no sükom svidis sienlik somikis, sod vipom bufumo plägamis vetik, e dasuföni vobis düfik demü Kristus.

4. Sikod, if trod tikälnik pagivom ole fa God, lensumolöd danik oti! Abu nololöd, das binom legivot Goda, e no melidod ola! Demüs no pleidolöd, no fredolöz tuvem, e no vedolöd rogik! sod demü legivot binolöz nogo miuguman, i kautölum ä dredikum in duns valik oka, bi düp at ofegolom, e tentad osukom! If trod pumosumom ole, operolöd no foviko speli, sod ovarolöz miugik e sufädo tefü visid sülik! Ibo God labom valüdi denulegivöna trodi gretikum ole. Atos no binos din nulik u nebesevik sevöles vegis Goda; ibo saludals gretik, e profedals vönik eplakoms suvo cenami somik.

5. Dem atos ek esagom dö kom bena: »Ven ben ebundemom, epükob: no oyilob tenüpoi.« Abu, kelosis eplakom, ven ben edefom: lüyumom atosis me vöds: »Emoflekol ola loapi de ob, ed evedob pakofudöl.« Ye perom leno speli dem atos, sod, begöl nogo zilikumo Sölali, pükom: »Al oli, o Sölal! vilob vokön, ed oba Godi lebegob.« Täno getom frutis pleka oka, e, das binom pedalilöl, noelom me vöds: »Sölal elilom, ed emisaladom obi: Sölal evedom Yufal oba.« Yed in kios evedom Yufal? »Eceinol (pükom) plonis obik in yubi, ed ezümol obi me fred.« If ejenos also saludales gretik: obs fibik ä pöfans no dalobs devön, üf senobs nu zili saludik, täno kaldäli; ibo tikäl kömom e mogolom segunü plid vila oka. Demüs Yob beatik epükom: »Visidol oti (meni) gödelo, e süpido blufol oti.«

6. Klu tefü kis kanob spelön, u kise konfidobök, ifno te misalade gretik Goda, e spele tefü ben sülik? Ibo, do labob iso menis gudik, u blodis devodöl, u flenis fiedöl, u bukis saludik, u penotis jönik, u svidikis kanidis e hümis: valiks at yufoms e smekoms nemödo, if binob palüvöl de ben, e paloveleadöl pöflöfe lönik. Tän no binom med gudikum, ka sufäd, fenonam oba it, e divodug in vili Goda.

7. Etuvob nevelo meni also reliki e devodöli, kel no eplakom sotimo mosumi bena, ud esenom lun’ami zila saludik. Saludal nonik ebinom also süliblesenik e pedalitöl, kel no petentadom-lá büo u poso. Ibo ut no digom medidami subimik Goda, kel no puxamom me glums anik demü God. Tentad büologöl laidunom, binön mal troda suköl. Ibo trod sülik pasiagom pebluföles me tentads: »Kel uvikodom, ogivob ate, fidön de bim lifa,« Sölal pükom.

8. Ye trod Goda pavigom mene, dat men vedomös stenüdikum, al ledulön täöfis. Tän i tentad sukom, dat men no vedomös pleitälik demü gudikos. Diaban no slipom, e midäl no nog binom edeilöl; sikodo no finolöd, prepadönok ali komip! Ibo deto e nedeto binoms neflens, kel takedoms nevelo.

Kapied 10. Danolöd demü ben Goda!

1. Kikodo sükol takedi, do binol pemotöl al vobi? — Binolöd peprepadölum al sufädi, ka trodes, ed umo peprepadöl, al polön kruzömi, ka juitöne fredis! Kim menas volälik no labomöv viliko tikälnikis trodi ä fredi, üf kanomöv, aigetön otis? Ibo trods tikälnik vükodoms fredis alik vola e luyofs mida. Voliks fredods alik vo binoms uf vanik, ud jemodiks; abu freds tikälnik soeliks binoms lesumik e stimiks, pemotöl se tugs e penin’giföls fa God tikäles klinik. Ye nek kanom, äso vipom, aijuitön trodis godik atis, bi tim patentadöna no moblibom lonedo.

2. Ye lib dobik lana, ed itekonfid gretik neleadoms mödo visidi sülik. God dunom gudiko, du givom beni troda; abu men dunom badik, no gegivöl dano valikosis Gode. E demüs legivots bena no kanoms, lüflümön obes, bi binobs nedanöl rigale benas, e no gedukobs valikosis al fonäli rigik. Ibo ben paigivom ute, kel plös danom digiko; ye pasumos pleitälane, kelos laidunos, pagivön miugane.

3. No vilob trodi ut, kel mosumom obe lebönidi lada, ed i no vipob dalitami subimik, duköl ali pleitäl. Ibo no subimikos valik binos saludik; e no svidikos alik binos gudik, e no desid alik binom klinik, e no löfikos valik binos lesumik Gode. Lensumob viliko beni, dubü kel aivedob miugikum, godidredölum e löbikum ali fenonam ita. Kel nolom, das ben binom legivot, e das mosum ota binom pön: at no venüdom, lücödätön oke bosi gudik, sod bufum oläsevomok, aso pöfani e nüdiki. Givolöd Gode, kelos ome dütos, ed oke lägivolöd, kelos ole lelönos! os binos: »danolöd Gode plo ben, e koefolöz, das deb e pön pötik debe binoms pöläsevöl ole soelik!«

4. Siadolödok egelo su slepi disikün, e geilikün pogivom ole! Ibo slep geilikün no binom nen disikün. Saludals gretikün loü God binoms pülikün logsü oks, e plu binoms glorikum, pluo binoms miugikum in ok. Fuliks verata ä glora sülik, no desidoms glori vanik. Pestaböls e fimiks in God, leno kanoms, binön pleitälik. Mens, kel läsevoms Gode gudikosi valik pegetöli: no sükoms, getön stimi balan fa votikan, sod viloms te stimi ut, kel kömom de God. Vipoms üno atosi, das God palobomös in oms ed in saludals valik, ed aisteifoms atosi.

5. Klu binolöd danik tefü smalikünos, ed odigol getöna gretikumosis! Pülikünosis cedolöd, aso gretikünosis, e nestümikosis lensumolöd, aso legivotis patik! If dinid gevala pakonsidom, givot nonik ojinom smalik u tu pülik. Ibo no binos smalik, kelos palegivos fa God gretikün. — Ifi givom pönis e flapis: mutos binön lesumik obes, bi dunom aigönü salud obas in valikos, kelosa ziti dälom tefü obs. Kel men levipom, konsefön beni Goda: binomöd danik plo ben pegetöl, e sufädik, if ben pasumom! Plekomöz, das ben gekömomös! e binomöd kautik e miugan, dat no peromös oti!

Kapied 11. Dö num smalik löfölas kruzömi Yesusa.

1. Yesus labom nu löfölanis mödik monargäna sülik oka, abu polelis nemödik kruzöma oka. Labom mödikanis, kel levipoms trodis, e nemödikanis desidöl glumis. Tuvom kopananis mödik taba, ye nemödikis cuna. Valikans vipoms, fredön ke ot; nemödikans viloms, sufön bosi dem ot. Mödikans sukoms Yesusi jü bodiblekami; abu nemödikans jü drinöni gleköpi liedas. Mödikans grestimoms milagis ota; nemödikans dilsumoms len jemod kruzöma. Mödikans löfoms Yesusi, ünä täöfs no zidoms; mödikans loboms e pliedoms oti, ünä getoms trodis anik fa ot. Ye, sosus Yesus usävomok, ed ulüvom otis ilo: täno plonoms, u faloms in säkurajöfi tu gretiki.

2. Abu, kels löfoms Yesusi demü Yesus, e no dem okas trod lönik sembal: ats oti pliedoms in glum e ladälanab, äs in trodün. Ed üf vilomöv, nevelo givön otes trodi: deno lobomsöv oti egelo, ed aivilomsöv, danön ote.

3. O! kio mödikosi kanom Yesusilöf klinik, no pamigöl ko taisük e lönilöf! No-li ködutäbs binoms pönemöl valikans, kel aisükoms trodis? — Uts, kel aitikoms tefü nited e frut okas: no-li jonoms, das löfumomsok, ka Kristusi? Kiplado patuvom ek, vilöl-la, dünön glato Gode?

4. Seledo patuvom men also tikälik, kel binomös livik de valikos. Ibo kim otuvom meni vo pöfiki tikälo, e pelivöli de jafot alik? — Völad ota vükodom valikosis pelukiblinöl de mieds fagik e fagiküns Tala. If men mogivomöv guedi valik oka, binosöv nog nos. Ed, üf dunomöv pönädi gretik, binosöv nogo nemödik. Ed, if lenlönomöv nolügis valik oke, binomöv nogo fagik de lefuläl. Ed, üf labomöv tugi gretik, e devodi vemo filedöli; nogo mödikos defosöv ote, os binos: din bal, levemüno zesüdik ote. Kios? Zesüdosöv, das, elüvöl valikosis, lüvomösok, e segolomös lölik se ok, ä konsefomös nosi lönilöfa! Ed if udunom valikosis, kelosis enolom, dunön: kredomöd, das edunom nosi! —

5. No cedomöd, aso gretikosi, kel kanosöv, pacedön, as gretikos in om, sod oki nemomöd düneli vo nefrutiki, äso verat pükom!: »If umekols valikosi pebüdöl oles, pükolsöd!: «Binobs dünels nefrutik.» Tän okanom, binön vo pöfan ä nüdik tikälo, e pükön ko profedal: »Binob soelan ä pöfik.« Deno nek binom lieguman, nek binom stenüdikum, nek libikum, ka ut, kel nolom, lüvönok e valikosis, e cedokön, aso disiküni.

Kapied 12. Veg regik kruzöma saludik.

1. Düfik jinom mödikanes püked at: »Fenonolöd iti ok, pololöz oka kruzäli, e sukolöd Yesuse!« Abu mödo düfikum obinos, lilön cödäti lätik at: »Peneläbädans! yilolsöd de ob in fili tenüpik!« — Kels nu lenliloms viliko kruzöma tidi, e sukoms ote: ats no odredomsök füdo sepeti kodemüba tenüpik. Kruzömamal at obinom in sil, if Sölal okömom, al cödöfön voli. Täno dünels valik kruzöma, kels lifüpo emekomsok lesümikis Pekruzölane: oniloms ko konfid gretik Kristuse cödal.

2. Klu, kikodo dredol, lensumön kruzäli, me kel golon ali sülamonargän? — In kruzäl binom salud, in kruzöm lif, in kruzed jel ta neflenis. In kruzäl svid sülik panin’gifom, in kruzed binom stenüd lana, in kruzöm fred tikäla. In kruzöm binom ninäl tugas valik; in kruzed saludug lefulik. Lane no binom salud, e no spel getöna lifi tenüpik, ifno in kruzöm. Sikodo sumolöd oka kruzedi, sukolöd Yesuse, ed ogolol in lifi tenüpik! — Yesus ebügolom, polöl oka kruzömi, ed edeilom len kruzöm ple ol, dat id ol pololös oka kruzedi, e vipolös, deilön len kruzäl! Ibo, üf udeilol ke om: id olifol leigo ke om; ed üf ubinol dilsumel lieda: obinol i dilsumel glora.

3. Ekö! valikos siudos in kruzäl, e valikos deslopos de mod udeilönà. Al lifi ed al linediki püdi veratik no sibinom veg votik, ka veg kruzeda saludik e funälama vädelsik. Ugololöd, köi vilol! usükolös, aikelosis vilol!: ed otuvol no vegi subimikum in geil, e sefikumi su Tal, ka vegi kruzeda saludik! Blimolöd e leodolöd valikosis ma vil e ced oka!: ed otuvol no votikosi, adas aimutol, liedön bosi, uf libaviliko, ud pemütöl; ed oituvol somo kruzedi: uf osenol doli len koap, ud osufol glumis in lanäl.

4. Nu polüvol fa God, täno povexadol fa kemen; e, kelos binos um: obinol suvo böladik oke it. Deno kanol no, palibön u paleitön dubü sembals med u trod, sod ledulolök, ünä plidos Gode. Ibo God vilom, das lenadolös, liedön glumi nenü trod, e das disojedolösok ome lefulniko, e das vedolös miugikum dubü glum! Nek osenom in ladäl also vem liedi Kristusa, äso men umutöl, liedön sümikosis. Sikodo kruzöm aibinom peprepadöl, e valädom oli vätopo. No kanol, seyilön, aiköi gonòl-la; ibo aipololok iti ke ol, ed oituvolok it, aiköi ukömol-lá. Flekolödok löpoi, flekolödok disoi! flekoloköd senedoi, flekoloköd linedoi! ed in atos valik otuvol kruzedi. Zesüdos, das aitönol sufädugi vätopo, if vilol, labön püdi linedälik, e melidön kroni tenüpik.

5. If polol viliko kruzäli: opolom oli, ed odukom al zeili pevipöl, kö obinom fin liedöna, do atos ojenos no talo. If polol neviliko kruzedi, mekom ole böladi; vetolok um, e deno mutol, ledulön. If umojedol kruzedi bal: otuvol nedoto votiki, e ba vetikumi.

6. Kredol-li, sägonön utose, kelosi nek deilikanas ekanom, vitön? — Kiom saludalas in vol ebinom nenü kruzed e glum? Nena Yesus Kristus, Sölal obsik, ünä elifom, ebinom dü düp bal nen dol lieda: »Kristus (it pükom) emutom, liedön, e suistanön de nelifans, e somo nütridön ini glor oka.« — Ed ol, kikodo sükol vegi votik, ka vegi regalik at, kel binom veg kruzöma saludik?

7. Kristusa lif lölik ebinom kruzäl ä matür; ed ol steifol oke takedì-li e fredi? — Pölol, pölol, if sükol votikosi, ka liedön glumis; ibo deilik lif lölik at binom fulik misalöfa, e pezümöl me kruzeds. Ed ek, pluo fästepom tikälo, plu vetikumis tuvom mödna kruzälis; ibo, plu löfom, plu dolikum ome binom top xilama.

8. Ye men somik, pavexadöl so mödna, no binom nenü leitam troda, bi senom fruti vemo gretiki, dekömöl ome de sufam kruzäla ok’ik. Ibo, bi disojedomok viliko kruzede: bölad valik gluma paleitom dubü konfid in trodi dogik. E, pluo mid pafibom dubü glum, pluo tikäl pastenüdom dubü ben linedälik. E, bi se löf vipom, vedön lesümik Kristuse pekruzöl: sotimo pastenüdom somo, das no vilomöv, binön nenü dol e glum. Ibo kredom, das binom plu lesumikum Gode, pluo kanom, sufön täöfis mödik e vetikis demü God. Atos no jenos me näm mena, sod dubü ben Kristusa, kela ben kanom, dunön dinis also gretikis in mid döfik, das men, pemoföl dubü zil tikäla, beginom e löfom utosis, kelosis voto aifugom ed aidredom nato.

9. Polön kruzäli, löfön kruzäli, pudön koapi, e disojedön oti dünelüge, fugön stimis, sufön viliko lejemodis, nestümönok iti, e vipön panestümöni, dasufön dämis e täöfis valik, e levipön benöfi nonik in at vol: ats binoms dins, tadunöl nate menik. If loegolok iti: tuvol, das dubü näm lönik no kanol, dunön bosi dinas at. Yed, if konfidol Sölale, näm de sül pogivom ole; vol e mid podisojedoms sölame ola. I no odredol nefleni, diabani, if binol pevaföl me kredug, ä pemalöl me kruzed Kristusa.

10. Sikodo sludolöd, aso dünel gudik ä fiedöl Kristusa, polön manälo kruzedi Sölala ok’ik, pekruzöla sukü löf ple ol! Binolöd löbik, sufön täöfis mödik e mifätis valnik in lif misalöfik at! Ibo dins at ojenoms ole, aikö binol-la, ed otuvol zelädik otis, aikö sävolòk-lá. Mutos, binön also; e no binom med votik morönöna glumes, mifätes e doles, ka sufädug. Drinolöd desidik lieda gleköpi Sölala! üf vilol, binön flen Sölala, e labön dili ke ot. Lönigivolös Gode, va vilom, gevön trodis ole! It dunomös, äso plidos ome plü! Yed ol binolöd löbik, sufön glumis, ed otis cedolöd, aso trodis gretikün! Ibo lièds ata tima, ifi soelik kanolöv, ledulön valikis: no saidoms, al melidön glori füdik.

11. If uvirol atosi, das glum obinom svidik ole ä lesumik demü Kristus: täno, kredolöd osi! stadol gudik; ibo etuvol paladi su Tal. Ünä lieds binoms bölad ole, e sükol fugön otis: so lonedo stadol badlik, e glums, kelis fugön steifol, osukoms ole vätopo.

12. If binol löbik, äso debol, liedön e deilöne: ostadol sun gudikumo, ed otuvol püdi. Ifi ubinolöv süliblesenik jü süli kilid, äso Paul: dem atos obinolöv no sefik ta täöfis. »Ob (Yesus pükom) ojonob ote, vio-mödiksosis mutom, liedön demü nem oba.» Sikodo palemänos ole, liedön, if vilol, löfön Yesusi, ed aidünön ome.

13. Dasö digolös, liedön bosi demü nem Yesusa! Glor kio gretik valädomöv tän oli! yub ki-gretik binomöv lä saludals valik! dabumälam kio gretik binomöv i kemene! — Valikans dido komedoms sufädi, do te nemödikans viloms, liedön. Gido mutolöv, liedön viliko i nemödikosi bos demü Kristus, bi mödikans liedoms vetikumosis demü dins talik.

14. Cedolöd, aso zelädikosi, das lifolök in aifunälam! Ed ek pluo deilom oke it: pluo beginom, lifön Gode. Nek binom fägik, suemön sülikosis, ifno demü Kristus udisojedomok yoke täöfas. Nos binos lesumikum Gode, nos saludlikum ole in vol at, ka liedön viliko demü Kristus. Ed if labolöv väli: mutolöv, vipön umo, liedön täöfis demü Kristus, ka paklietön dubü trods mödik, bi etoso vedolöv sümikum Kristuse e lesümikum saludales valik. Ibo melidods e lefuläl cala obas no siudoms in mödiks svids e trods, sod leplu in sufön gretikis plönöfis e glumis.

15. If salude menas bos binosöv gudikum ä frutikum, ka liedön: Kristus zelädo ejonomöv atosi vödso e me sams. Tadilo, züpanis suköl, e valikanis vipöl, sukön ome, monedom sepetiko, das polomsöz kruzedi, du sagom: »If ek vilom, sukön obe: fenonomöd iti ok, sumomöz oka kruzedi, e sukomöd obe!« — Nag esüenon ed eduvestigon valikosis: kömon al sludi levöladlik ati, das mutobs, da glumis mödik nin’golön in monargäni Goda.