Cant rouyal
Cant rouyal
Quand le Cél en plen jour s'amantoulo d'oumbratge,
É le Sérs, é l'Auta se gourmon toutis dous,
Le Bestial espaurit d'un ta rabent auratge,
Se cour agourruda dins sous amagadous,
Atal la Mousco ba déjouts uno teulado,
O countro uno paret gandi-se la trumado;
Més taléu que se crey seguro dans le jas,
La Tararagno sort doun nou se tracho pas,
Que l'istroupo les pés é le cap li rougagno.
Ten bou, Mousco, ten bou, qu'adezaro beyras
Le broc que del trauquet tiro la Tararagno.
Tu que fas le tutét al cap de toun courdatge,
Per prene traytomen Mouscos é Mouscaillous,
Yeu meni, Tararagno, à toun desabantatge
Un brounzinayre Bol de grosses Foussalous,
Que de toun cos arput auran pic o pelado
Daban que dins un trauc te trobes estujado.
Ça, Foussalous, quitats las tutos des albas,
Per à cops de fissous li defendre le pas;
Car per la bous teni dins la razo campagno,
Yeu courreré cerca redde coum'un matras
Le broc que del trauquet tiro la Tararagno.
Coume le Loup cruél é coubes al carnatge
Anirio dins un Parc gourdilha les Moutous,
Se le Pastre, fournit de bras é de couratge,
Nou li fasio fuma qualques cops de bastous,
Atal nou y a cousin tant foro d'escalado
Ount une Tararagno on nou bis enjoucado;
Qu'en bél arpatejan debalario plus bas,
Per nous cura les éls é courre per las mas,
En dangé de nous mettre en tarriblo magagno,
May que nous-aus aben tout fayt à nostre cas
Le broc que del trauquet tiro la Tararagno.
Més la pauro Arachné b'auguec à soun doumatge
Le cerbél delougat é l'esprit cabillous,
D'ana n'intan n'incan coumpara soun oubratge
Al que Pallas fasio sur soun rét merbeillous.
É be que l'in soubréc ? re, sounco qu'ennayrado,
De Filho se troubéc en Bestio transfourmado,
Aprép que, per mata la primfilo Pallas,
Soun sabe fourec court de may de milo gras.
D'aquel'houre s'amago, & de poou de caucagno,
Fuch descaradomen en toutis sous afas
Le broc que del trauquet tiro la Tararagno.
A perpaus, un tal broc n'es pas mes en usatge
Per entrouca bruguets ni per pausa sedous,
Ni per fa crobo'és crabo entre mas de Maynatge,
Ni tapauc per fourni mércos as Jougadous;
Mens es le qu'al cubat repousse la grunado,
Mens le que del calel ten la méco'attizado,
Ni le qu'un Paure pren per tira del fangas
Un'espillo roüillouso, ô bira le paillas:
Yeu canti d'uno bouts que le cor accoumpagno,
Sense qu'al gran jamay l'on m'en counesco las,
Le broc que del trauquet tiro la Tararagno.
Esplicaciu de l'Allegourio
Per l'orro Tararagne entendan Sathanas,
Quand dins un Cor coupabl'el pot fourra le nas;
É per la Coufessiu que de nous le destragno,
É doun le fa biarda plus bite que del pas
Le broc que del trauquet tiro la Tararagno.