Canzun de Sontga Margriata

Canzun de Sontga Margriata

Sontga Margriata ei stada siat stads ad alp,
Mai quendisch dis meins.
In di eis ella ida dal stavel giu,
Dada giu sin ina nauscha platta,
5Ch’igl ei scurclau siu bi sein alv.
Paster petschen ha quei ad aguri cattau.
«Quei sto nies signun ir a saver,
Tgeinina zezna purschala nus havein.»
«Sche ti vul quei buca dir ora,
10Sche vi jeu dar a ti treis bialas camischas,
Che pli ti scarvunas e pli alvas ch’ellas vegnan.»
«Quei vi jeu buc, quei prend jeu buc!
Quei sto nies signun ir a saver,
Tgeinina zezna purschala nus havein.»
15«Sche ti vul quei buca dir ora,
Sche vi jeu dar a ti treis bialas nuorsas,
Che ti sas tunder treis gadas igl onn
E mintgaga ventgaquater crenas launa.»
«Quei vi jeu buc, quei prend jeu buc!
20Quei sto nies signun ir a saver,
Tgeinina zezna purschala nus havein.»
«Sche ti vul quei buca dir ora,
Sche vi jeu dar a ti treis bialas vaccas,
Che ti sas mulscher treis gadas il di,
25Mintgaga siu bi curtè latg.»
«Quei vi jeu buc…»
«Sche ti vul quei buca dir ora,
Sche vi jeu dar a ti in bi curtgin,
Che ti sas segar treis gadas igl onn,
30E mintgaga siu bi ladretsch fein.»
«Quei vi jeu buc…»
«Sche ti vul quei buca dir ora,
Sche vi jeu dar a ti in bi mulin,
Che mola il di segal e la notg salin,
35Senza mai metter si buc in.»
«Quei vi jeu buc…»
«E sche tiu signun sto quei saver,
Sche ti sas fundar entochen culiez.»
«O, buna sontga Margriata,
40Lai po vegnir viado,
quei sto nies signun buc ir a saver.»
Cu la sontga Margriata ha gidau ô il paster petschen,
Ha quel puspei entschiet a dir:
«Quei sto nies signun ir a saver,
45Tgeinina zezna purschala nus havein.»
«Sche ti vul quei dir ora,
Sche dueis ti fundar treis tschuncheismas ault.»
Allura va sontga Margriata dabot,
E da tut ella pren pietigot!
50«Pietigot, ti miu bien signun,
E pietigot, ti mia buna caldera,
Pietigot mia buna panaglia,
E pietigot ti mia buna fueinetta,
Che jeu durmevel adina cun tei.
55Pertgei fas quei miu bien paster?
Pietigot mias bunas vachettas,
Vus vegnis a schigiar dil latg.
Ah, pietigot entuorn, entuorn,
Sappi Dieus cur jeu cheu tuorn!»
60Epi mav’ella sul Cunclas ô.
La caldera e las vaccas mavan suenter,
Aschi lunsch sco ellas han viu,
Han ellas buca calau de bargir.
Epi eis ella ida sper ina fontauna ô, a cantond:
65«O ti, o ti fontaunetta,
Sche jeu mond ir naven
Sche vegnas lu schigiar si!»
E la fontauna ei schigiada si.
Epi eis ella ida sper ina plaunca ô, a cantond:
70«O ti, o ti plaunchetta,
Sche jeu mond ir naven,
Sche vegnas ti guess a seccar!»
E la plaunca ei seccada.
«Ah, mia buna jarva,
75Sche jeu mond ir naven,
Ti vegnas lu seccar e mai verdegar.»
E la jarva ei seccada e mai verdegada,
E cur ch’ell’ei ida sut il zenn da sogn Gieri e sogn Gagl,
Tuccavan ei d’ensemen, ch’ei dev’ô il battagl.