Cheribizo
Bernard Rainold (XVI-XVII sec.)
Cheribizo
IL CHERIBIZO
Sommario de tutte le professioni & arte milanese con diversi Sonetti in lingua rozza, et un'Echo
Togna polida, honesta, s'al ve pias
cetam per vost marit, a voi donaf
ol più garbat present che sia stat
donat a qual se voia dona mia.
Quest don ì da savì che l'è un baslot
de crestal montagnul tut intaiat
per man de Nibalin che no gh'à par.
Ul tai è quest, che dent ghe vedarì
la nobile Citat dol gran Milan
che fu da tut nomat l'Ambrusa Val.
La vedarì frutifera e circonada
da quei duò fium ciamat Ad'e Tesin
che la secoren d'ogni vituaglia.
Vedarì po le mure che la saren
con un Castel fortissem instimabel
fornit de bona zent e moniciò,
che per da per vo farì gran maraveia,
e da nuf porte al se ghe va denter:
una se ciama Porta Oriental,
e Porta Tosa, e Porta Romana,
e Porta Ludovica, e Porta Snis,
e Porta Verzelina, e la Comasina
con al Porta da Des, e Porta Nuva.
Passat inanz un pez a vedarì
quel'aqua ch'è sì degna d'ess nomada,
che se naviga per comoditat.
Com' che sarì po inanz fos oter tant
a catarì ul Sives l'un, l'oltr'ul Nirò,
dof scora le contrade quant al piuf,
spazand i chigador e i aquariù
e tutta la mondisia dra Citat
e di scanaporzei e di becher,
quant ai lav i budei e i petazui.
Vedarì po le fabrech segnalat
che a recuntai al me saraf pur trop
tant ei in qualitat e nobilissem.
Vedarì anch i lugh cognominat
che so che ve saran de gran content.
Vedarì po quel degn governador
ch'è po anch gieneral de tutt ul Stat,
con ogni sort de zent, com'va a una cort,
e di Marchesi e Cont e Cavalir,
segnori imbassador, col mazordom,
coi secretarij, camareri e scalch,
coper, sot camarer, pagi, stafer,
cardenzer, botier e dispenser
maestri di cirimoni e la musica,
cughi, sot cughi, canever e guater
e do trombetti, tamborin col fifer,
cavailezir, arcabusir, todeschi,
cavalirriz e i master sella stala,
uselador, strozer e cagnater,
la guarda de la cort e chi la scova.
Daspò vu vederì tut el Senat,
conseier gienerai e castelan
e i president di dù Magistrat,
princep e castelan, trì prazedent,
quel dol Senat e quei di Magistrat,
e col gran cangielir conservator
quel ch'as dis l'ordinarij, e quel di biad;
gh'è anc el prezendet dra sanitat,
e i fiscai da le toghe e dai pagn corti,
tesorier gieneral, monizioner
e po l'ofiz ch'a 's dis di colitrar.
Vedarì po la gran provision:
ul vicari, i dodes, i sesanta,
resonat, sindez, thesorir, noder,
trombetti, bianch e ross, e accusator.
I consol de iustiza e i consultor,
giudes di vittuali, e quel dul vin,
el giudes dra dovana e quell di legn,
el giudes di moned e quel di strad,
l'ofiz dra sanitat e quel di crid
l'ofizei di stader ch'a 's dis dol bol,
l'ofizei dol Besoz ch'è sovr'ai scrocch.
Capitani, vicari de Iustiza,
ul podestat an lu col so vicari,
el giudes dul caval e quel dol gal,
noderi, cavalieri e lugh tenent,
ciapador, sbir, spion e ach el boia,
e che maestra i boia a fà botega,
e che im preson voraf esser de fora.
I abat dul colegio di dottori,
coi so dù servitor vestit da ross,
e i abat di noder e del Cangiel
col so us'cier, an lor vestit trochin,
e po i protettor dra Mala stala
col so protetorel che fa l'us'cier.
Scolté pur ach quel che voi cuntà:
cinquantot ostarie sì famos
che dent ghe vedarì tut bel fornit;
vedarì i Tri Re, el Gras Falcon,
ul Capel, la Fontana, ol Poz, la Bala,
con el Scagn e la Goba e la Salvina,
la Simia, i bettolin dra Vierena,
le Rose, ol Moret, la Gavardina,
ol Pavonzin, le Spad, ol Paternost,
ol Fus, ul Pavon veg in co de' vegher,
la Corona, la Cerva, ol Pasquirul,
po in comped e ul gamber e ol Lion,
la Cervetta, i do Fopp, ul Rebechin,
ul Popel e la gran Bona di rost,
e ach i Cantonzei, el Campanil,
ul Morlet, la Campana, i Trì trombetti,
l'Angiol, l'Orso, ol Bagio col Brovetto,
e 's taz le Cros e i sant per modestia.
[...]