Chi g'ha temp, no specia temp

De tutt i stramberij che g'ha la gent,
La pussee grossa la me par a mì
Quella de specià a god on àlter dì
Quij coss che se pò god in sul moment.
Vedi de fatt che quij che pensa inscì
Per lo pù crèpen senza god nïent,
E tutt quell c'hann vanzaa cont el sparmì,
S'eI pìpen poeù i ered alegrament.
Fioeuj, se g'hemm quajcoss de god incoeu,
Godèmel senza tant liron liran,
Perchè la mort l'è adree a menà 'l folcioeu!
E la dà dent comè in d'on camp de gran,
Tajand sù vecc e giòven e fioeu,
E nissun ghe po dì: specia doman!