Ciöf de flus de munt
Ciöf de flus de munt.
De flus de munt n ciöf ói fá.
Tan bel chʼ al vën an odará!
Tʼ amez mëti n bel sanví,
co á le popo prësc daorí.
Encëria mëti edlbais
y danterete erenprais.
De düc chisc dui corusc adöm
le plü se vën le blanch y bröm,
do chisc arcunci ciöfs bi zinc,
de chisc le ennom é paroncinc.
Y dlungia ia liëii entoronn
de entrames sorts le ciöf dal tonn.
I prei ne pói mo desmoncé,
lapró chi mëssi ince lié.
Milandores a trec i plej,
parüda ince chëres fej.
Confolia, te te mëti tlo,
y nagoles dal crëp lapró.
San Jan dá ince ca söes flus,
co crësc adora encër chi trus.
San Pire emprësta ca söes tles,
de chëres tol la mi les ês.
Y os i dëis al ciöf onú,
ferghissmainniht con osc corú.
Y spaich, sön munt alalt coü,
arcunci ete bel monü.
Encër le ciöf sën mëti fëies pro
y cioli adöm spo a dedô.
A che cösc ciöf é destiné,
vignönn se pó ponsé.