Ciantia de Col de Lana
Josef Floss
Ciantia de Col de Lana
Sides vedl o stort
o jonn gaiert,
jí junse düc
a pié le lombert;
al é gnü ri,
ó desfá Fodom,
arobé Ampëz
y mez chësc monn!
Cun döt le poch
ól gní le talian
spo ince da nos
cun na gran fan.
Sc' al ó cuché
te nüsc confins,
arál da fá
cun nos ladins!
Bele döt Fodom
de lomberc bolësc,
ai vëgn döt spësc
y mai se finësc.
Mo nos te chi büsc
fajunse bel plan,
bi düc ascognüs
cun le stlop a man!
Y canch' ëi é prësc
düc söinsom,
spo "punf" che döt
cogora jö te Fodom.
Insciö fajunse
tan dî ch' ai vëgn
sides de o nöt,
da nëi o tarëgn!
Lascele splundré
cun sü canuns,
val' bot ince nos,
val' colp ti duns'!
Y sce de y nöt
al spöda füch
dal sënn ch' al á,
al se fej pa püch.
Ite sön chël col
stál a gní mat,
gnô sön duicater
cun les grifes da iat.
Minâ de messëi
se fruzié la si,
mo gnü él tosc
spo plü saurí!
Canch' ëi é stüfs,
spo pói s' un jí
cun döt so poch
jö por Ciaurí!
Sc' ai á da score
chiló n debit,
l' unse bëgn paié
cun döt le fit!
Sc' ai ó arobé,
ch' ëi vais altró;
de chël che é nost
n' ái val' da se tó.
Te nosc paisc
sunse nos patruns;
ai lomberc
degun ti nen duns'!