Coged (1894:8)
Kasedagab de Soto Maior, kel edeilom in Stockholm balul 22id ayelo in lifayel 81id omik, äbinom du yels 37 legatel de Bordugän lä kut svedänik. Äbinom valemiko pesevöl e pelöföl in glezif ed in sogs ädistinomok dubü kosad lesumik e mods montielik, leigüpo äbinom benodel pöfikanas. Kasedagab äbinom sägo jü bäledüp löfäb lädas e bal gasedas de Stockholm sagom das „logs jönik mils e mils ejedoms logedis vamik al om.“
Äklotomok kudiko e molädiko e pälogom ti egelo ko rosaf e pab in gnobahog.
Ninlödels de Stockholm, pesevöl in Svedän as vemo nulälik, änotedoms valikosi tefü pösod oma, sägo futis smalik e... lögis omik.
Semdelo äspatom e vobels tel ägoloms po om.
„Lilolöd, Anderson“, balid äsagom, „limödi ävilolöv givön plo lögs somik?“
„Mödümo kloni bal“ Anderson ägepukom.[1]
Süpito Kasedagab ätulomok e pladöl klonis tel in nam mana pestunöl, äsagom in svedänapük defik:
„Eko, flen, vilob bekipön lögis obik ple ob it.“
NOETS. (Vükifonät)
- ↑ Bükapök; pla: ägepükom.
Se Nuns blefik se Volapükavol 1894, Nüm: 8, Pad: 7.