Dö geb pläpodas
Söl Bernhaupt, plofed vpa e kademal penom obes, se Beyruth in Sürän, penedi se kel zükobs sukölosi:
“Su flan 11id nüma 2id bleda divik ola, lilädob vödis at: Dalü lautel pübobs sezüki at, notedöl das, in lovepolam vpik fa dl. Lederer, pläpods bemalöl mufi regoms kimifali e votiks no; distinam at, äso enotedobs ya in glamat obsik, kodom fikuli e binom nezesüdik, ibo, aigeböl kimfali, telaplän nonik zitom.
Sötob tapükön notedi at e läsevön löliko biti dla. Lederer.
Besiam, das telaplän nonik zitom, binom nevelätik.
A.s.: golob in teati; golob in teat, binoms sets tel difik; balid malom das binob plö teat e das golob äl om, telid malom das binob in teat e das golob us. Zu: penob su tab; penob su tabi vödis anik. Also äkanoböv nog stukön setis anik kels blöfoms pöki olik.„
Söl Bernhaupt bitopom pöti obes pükön dö geb pläpodas in vp, tefü kel ipenobsöv in nüm sembal suköl.
Sagobs foviko osi: söl Bernhaupt pölom e mekom pöki nesmalik, lovepolölo: vado a teatro dub golob in teati. Geb pläpodas, äso in püks valik, kodom fikulis anik i in vp, ab kod atosa binoms lautels glamata kels, pla plänön malami velätik pläpoda alik, givoms te lisedi atas e sagoms: in malom in; fa malom da; ko malom con e l. sikod alif studöl otuvom in pük tälik pläpodis in, da, con, ecc., olovepolom omis dub in, fa, ko e l. nen meditön dö siäm velätik seta.
Zesüdos sagön kuladiko kisi malom, kisi sepetom pläpod sembal e ogebon ati alif siäm seta pölovepolöl flagom osi, aikiom binom pläpod keli gebobs in pük obsik. A.s.: pläpod al in vp, malom mufi, lüodi äl top sembal, kluo alif döl at posepetom in se tpölovepolöl ogebonöd pläpodi al, nen dunön seniti pläpode pegeböl in pük netik. Also olovepolon setis: vado a scuola, in casa, dal signor Pietro, parto per Roma, ecc., dub; golob al jul, al dom, al söl Pietro, motävob al Roma e l. At binom pök keli mekoms vpels anik, kels, lovepolölo, geboms pläpodi ut keli geboms in pük okik e lovepoloms setis pepenöl löpo dub pläpods fol difik, du döl pesepetöl in sets aibinom ot.
Gebonöd pläpodis velätiko e ologon das, aigeböl kimfali, denusagobs osi, binom mögik telaplän nonik. Omenodonöd kluo seti balid söla Bernhaupt also: golob al teat.
Leiko osagon: penob len tab e no: su tab.
Elogobs das in pük obsik gebobs pläpodis difik al sepetön döli ot, rezipiko mödikna gebobs pläpodi ot al bemalön dölis, tikis difikün, e if in lovepolam vpik gebobs i pläpodi lebalik, klüläliko atos okodos kofudami e nekleili[1].
Efe sagobs: egli è da uomo; vengo da Milano; da tre giorni; da farsi; ho ricevuto da Pietro; ferito da una palla, da un servo; Francesca da Rimini, ecc., in sams at valik, pläpod da labom malamis difik e kluo müton gebön pläpodis kels sepetoms döli, tiki peninkiköl in set alik e no aigebön oti.
Büfo lovepolön pläpodi sembal, meditonöd dö malam oma e pladonöd in vp uti kel labom bemalami at e no lovepolonöd vödo, materiko.
Kludobs komedöl vpeles memön das in vp müton polön dölis tikis e no vödis.
NOET.
- ↑ Utos keli sagobs tefü tälapük, jenos i in püks valik votik.
Se Volapükabled Tälik 1888, Nüm: 4, Pads: 25-27.