Dö säk veütik
Dö säk veütik, va pübam vpagaseda gletik binom viplik, pübobs atis se penods pegetöl: »Vpaklub zenodik plo Stirän in Graz läsevom döli pübama vpagaseda gletikum, if gased at obinom löliko nepaletik e if ostigom vpanis al pakam zilikün vpa jünuik ed al fünam klubas vpk nulik.« Söl Josef Schindler in Neusatz (Nugän) penom: »Tefü fünam gletika gaseda vpk pla bleds nuik smalik, döl at tuvom flanü ob läsevi lölik oba, e cedob, das dubü balif e vilöf vpanas döl at okanom pavolekön. Datuvel obelobom zelado döli at [liedo mutobs dotön vemo; ibs[1] egetobs bü tim anik zülagi semik se yel 1887, pesevik vpanes bäledikum, ninöl lebüdis mödik e beginöl deutapüko ko vöds: Ob, padal vönik . . . , segun kels dat. vpa klödom labön sägo giti, nedälön pübami gasedas vpk.] deno no cedob, das ofinom pübami calableda oka, kelos ye no odämosöv volekame döla. Obo lügoloböv beginame as fünel.« Söl Georg Sy in Charlottenburg lä Berlin spelom, »das gased gletik oninom nunis valik dö vpamuf, klubadins ..., kelis tuvon anu te dabaliko in gaseds smalik - u no, bi te nemödikos kanos panünön lo stad anuik vpa. Somo gased nulik at ovedom ‚lezenodikün‛. No dalom, äs pesagos ya, ninön netapükikosis. Ab stip bal plöpa obinom, das no klub gletik bal obonedom samadi te bal, sod luüno mödanum kopanalas kluba alik mutom bonedön gasedi, i dat kanoms liladön omi domo in taked valik kuladiko. Liedo vitimäl vpanas mödik anu binom so pülik, das nena bonedoms gasedis smalikün.« Si liedo! e if ployeg so bizugik no oplöpom, obinos te demü yuf materik defik flanü vpans it, lön kelas valik gased sötom vo binön! Doti ot, va gased otuvom numi sätik bonedelas, labom söl V. Neymon de Neyfeldt (Triest). Söls Charles P. Emerson (Augusta, Me.), Will E. Perkins (Portland, Me. Nolümelop) e Rud. Sperl (Leoben) läsevoms ployegi e vipoms yufön omi, ye söls tel lätik vipoms i sibinami fovoik vpabledas nuik. So söl et penom: »Pübön vpagasedi gletik bal, kel golomöv al vpans valik in vol, jinom obe döl lejönik; ab fetanami de vpagaseds valik, nu sibinöl in gased gletik bal, no kanob cedön as gudik. Löfob döli at, das gased smalik papübom in alim pükas gledinik, deutik, nelijik, rusänik, flentik, nedänik e. l., laböl kolümis leigalienik, bali in vp, votiki in motapük a. s. Kosmopolan. Ats kanoms pasedön i nevpanes, e binos mögik, das senit omsik kanom palenzugön.« In mod sümik söl Karl Lenz in Werder a/Havel sepükom cedi oka dö yeg at: ». . . ye i timapenáds anu sibinöl pubomsös fälo, bi 1) nedelidöf timapenädas mödikün at mekom mögik i vpanes pöfikum, bonedön vpabledi; 2) binos gudik, if län alik labom gasedi vpk luüno bal plo niteds patik netas difik; 3) stüm publüga tefü vp paifödom vemo, if kanon nunön ome, das in läns difikün voladilas valik (!?), sesumü Fikop, ya timapenäds vpk puboms . . . . Sosus vigagased papübom, pobonedom fa ob, falo no obinom delidikum ka maks 10 a yel.« Notedobs al atos, das uts, kels vipoms fe, ab no kanoms pelön vpagasedi delidikum, osükoms koliladelis, kels opeloms i dili bonedasuama. So vpagased gletik obinom vemo pöfüdik plo pakam dina obsik, voleköl luvelato fünami klubilas nulik. Das stüm publüga pafödom me vpableds e bledils nemödik nu sibinöl, kels leno kanoms panemön netiks (ba sesumü Kosmopolan), no kanobs ebo lesagön. Valiko jinon fögetön ya, das fünam gaseda gletik bal, kel labom vpanis valik as bonedelis e binom klu somo lifafägik, pemobom te sikodo, bi kanon biselogön i fini vpabledas nemödik nog sibinöl, kelas num pelunom jünu nog vayelo. Nedunobs, bepükön dodis votik, kels pemekoms tefü gased peployegöl, bi spelobs, kanön pübön ya in nüm suköl bleda obsik ployegi pelevoböl fa komitef. Täno vpans valik posuflagoms me suvok in vpagaseds, länotön okis as fünels u lakifels. Onolobs klu nolön suno, va ployeg okanom vedön jen.
NOETS. (Vükifonät)
- ↑ Jiniko bükapök; pla: obs, u ba: ibo.
Se Volapük: Gased al pakam Volapüka 1895, Nüm: 7, Pads: 1-3.