Dö vödasbuk nulik stämas volapüka
Egetobs lenu dili balid vödasbuka at, e spetivo dili deuto-vpik, pepotöl plüetiko obes fa Söl Datuval.
Koefobs kanüdiko lilädeles obsik das senam balid obas äbinom stun, demü votams mödik kelis etuvobs, e kels ba no oplidoms mödiko volapükanes anik, pekösömöl gebön volapüki anuik, nen tikön das äkanon e ävilon, i fa vpans fiedik e fa Söl Masal it, gudumön füdo oti. Abu Söl Datuval, do no ävilom e nevelo odalom das lukadem sembal ädistukom stabis vpa, binom man vemo sapik e mükik, e kludo älensumom viliko krütis e konsälis ut gudik, kelis - pos plag e stud - vpaflens velatik egivoms ome püdiko e fleniko.
Vödasbuk at nulik no binom nog (natiko) vödasbuk nomik vpa; binom te mob, keli Söl Datuval bitopom kademe vpa, e te pos bepükam flenik, e krütam püblügik, ovedom vödasbuk füdik stämas vpa plo egelo.
Spelobs kludo das püd jönik, e päidesidöl osibinom fino bevü vpans, bi valiks okanoms logön das votams e menodams velätik e zesüdik, e krüts gudik, pelensumoms in fomam vödasbuka nulik vpa, keli beglidobs gäliko.
No labobs anu spadi al bitopön lilädeles obsik vötamis[1] valik; onotedobs te utis veütikün; kelis sezügobs se nunod gudik pegivöl fa flen obas Söl Dl. Kniele, in gased sikik oma.
* *
Tonab r pagebom nu ofenikumo, dub atos evedos mögik givön stämes mödik toni rigik oma e mekön kapälnikum e bevünetikum vödis tefik, somo evedoms a. s. se dlin = drin, se dled = dred, se tlep = trep, se glet = gret, se led = red, se dlem = drem, se kuläd = kurat, e l. Dido votot at no pedudugom leo e vätopo, äs ba mödikans evipomsöv, ab tu mödikos ba i no binos gudik. Aliko mutos pabemalön as fästep gretik, das lucödät tefü nelasum tonaba r edepubom; na vöds ba tumats anik ya pifomoms me tonab r, no äkanon suemön, kisi dämosöv, if vöds nog 2-300 kömoms alos.
Fovo finots nulik pejafoms al bemalön kladis semik vödas. Sukü gebam kludik finotas at, vöds mödik ämutoms pavotön boso, ye nen votam stämas. Finots at binoms: 1.) ir plo glamatikos, o. b. bemalams in gramat(ir), sikod sagobs nu: verbir, ladverbir, deklin(ir), ladyek(ir), pronom(ir) (pla pönop netikavik) e l.; 2.) er plo « militaria », sagobs kludo no fovo: batan (finot « an » binon nesiämik), sod bataler, no brigan, sod brigad(er), no kompan, sod kompaner e l.; 3.) eot plo klots, sikod vöd « klot » it peceinom in « kleot », e sagobs pla nöked kraveot, pla blit bleot, pla jit jeot, e l.; 4.) et plo zibs, a. s. huit binom nu huet, biskid = bisket, fömad = fömet e l.
Lemäno finots penemöl no pelenlägoms vödes valik tefik, bi vöds mödik binoms ya kapälnik nen atos, ab in vödasbuk pelägivoms vöde alik in kläms, kelos binos vemo frutik (pöfüdik), do ba begineles u votikanes bit at binom tupöl. Klödobs it, das pötü vöds lemödik finots tefik ekanomsöv pamaletön, vödas somik bkinoms a. s. fat(an), mel(öp), desän(äl), am(ap), pod(uk), bakun(ed), bim(ep) e l.
Vöds anik pevotoms bi äbinoms nekludik, nevelätik, ud i fecenlik, e spelobs, das tefü ats vpans mödik, kels jünu etaeloms vpi demü vöds somik, okotenoms mödüno ed oklödoms nu, das datuvel no binom neflenik votames lisälik e zesüdik. Vöds somik binoms brasiep pla fidaplan, lurin pla luvat, vertap pla vir (bomavir); ferut pla lelod (fer pla lel), prod(ab) pla böfüd, toun pla böset, veig pla vegam, gom pla guk (vöd kel pötom gudiküno plo « Gurke », jünu « küg ») e l. Vöd « gäl » pevotom in « fred », bi « gäl » binom subsat lovegolik al « gal », also labobs nu: galön = wachen (binön galik), gälon[2] = wecken (mekön gälik). Logobs also, das te kods veütik äbinoms, kö votams pemekoms, e kredobs, das dub atos vödasbuk otuvom läsevi valikas gitiko tikölas e das oläpolom al lefulnam pluo, bi vöds plo bemalots nulik plu ka 100 pefomoms. Binos fino loblik, das in pübot at vödasbuka nems lönik pösodas emobliboms. Komedobs also vödasbuki nulik vamiküno volapükanes valik tala.
In onüm opükobs umo dö vödasbuk ed olägivobs lisedi vödas peceinöl löliko u dilo.
* *
Spelobs das vpaflens valik oviloms yüfön me mon, e kevobam püdik Söli Datuvali, kel aivitimom timi, sauni, e moni omik pöfüdü vp löfik obas.
NOETS. (Vükifonät)
Se Nunal nulik 1891, Nüm: 4, Pad: 17.