Dalebüd Cifala de 1934, Mayul 1, Nüm: 2

Fölölo desini in büad obik de 1934, yanul, 1 pemäniotöli,

lunob me penäd at statudis sököl tefü Volapükanef.

Statuds at plaikons nomenis büik valik.

Dalebüd at ponotükon büo in „Volapükagased pro Nedänapükans“, e pötatimo i in „Zänagased Volapüka“, ven gased lätik podabükon.

STATUDS TEFÜ VOLAPÜKANEF

I. Dil valemik.

§ 1. Volapükan alik labon bligi:

1ido ad dasevön cifali as cif löpikün Voolapükanefa, e bai atos

2ido ad dasevön i stidis Volapükik, kels padasevons fa cifal.

§ 2. Sekü § 1 statudas at Volapükan alik bligidon

1ido ad gebön Volapüki, soäsä at baiodü cifal pelonon fa kadäm Volapüka, e

2ido ad födön ma mafäd näma okik sevädi, paki e gebi Volapüka.

§ 3. Ad riv diseina in § 2 statudas at pemäniotöla binos vipabik, das Volapükan alik

1ido lebonedon eli „Zänagased Volapüka“, e

2ido lüyumon ad bal Volapükaklubas netik ud ad „Diläd valemik feda Volapükaklubas“.

§ 4. Ad dakip baläta bevü Volapükans it, e leigo ad pladul cifala lo cifods notik in reigäns difik, zesüdos ad labön klubädi patik pösodas, kels bitons as guverans Volapükik.

§ 5. Födü balät Volapüka zesüdos ad labön plödü kadäm Volapüka klubädi pösodas, kels bitons as Volapükinolans.

§ 6. Cifal Volapükanefa büdakipom oke gitäti teik

1ido ad givön diplomis alseimik Volapüki tefölis,

2ido ad gividön demü kod alseimik dili gitäta at oka klube, u stide votik, u pösode patik alseimikes, e

3ido ad gesumön mögädo demü kod veütik gitäti at fa om pegividöli.

II. Dil guverik.

§ 7. Cifü Volapükans reigäna cif binon, kel labom tiädi: lecif, if reigän tefik labon lödanis plu balion, e tiädi: cif, if reigän tefik labon lödanis läs balion. Cifs Volapükanas reigänas labü lödans läs balion ponemons in statuds at: cifs calik.

§ 8. Ziläks reigänas gretik, kels laabons pluuneplu reigis livätik, kanons palecedön mögädo, sevabo if atos binon vipabik, as reigäns, in kels cifs calik kanons pacälodön labü tiäd: lecif.

§ 9. Lecifs e cifs calik komulons Volapükanis ziläkas oksik lo cifal, e pladulons cifali lo Volapükans ziläkas oksik.

§ 10. Lecifs e cifs calik pacälodons nemediko fa cifal. Mutons dalabön diplomi profäsorana Volapüka.

§ 11. Reigän alik, in kel lecif dabinon, kanon padilön ma neod ad ziläks smalikum, in kels Volapükans pacifons fa cifs. Cifs at binons sumätöfü lecif.

§ 12. Cifs sumätöfik pacälodons fa cifal sekü mob lecifas löpü ons binölas. Mutons dalabön diplomi tidala Volapüka.

§ 13. Pos fin kaledayela cifs sedons lecife löpü ons binöle nunodis dö stad Volapüka in ziläks oksik.

§ 14. Lecifs e cifs calik sedons cifale mögiküno suno pos fin kaledayela nunodis dö stad Volapüka in ziläks oksik.

§ 15. Cifal kanom säcälön cifis e lecifis Volapükanas

1ìdo sekü beg lönik onas,

2ido sekü mob Volapükanas ziläkas onsik, e

3ido demü kods veütik.

III. Dil nolavik.

§ 16. Volapükan alik, kel fölon flagis e stipis pro gredät nolik alik pelonülölis, kanon dagetön sökaleodiko diplomis sököl:

I. diplom tidana Volapüka,

II. diplom tidala Volapüka,

III. diplom profäsorana Volapüka,

IV. diplom xamana Volapüka.

§ 17. Diploms in § 16 pemäniotöls teiko pagivons fa cifal.

§ 18. Lisitan diplomas nolik no kanon dagetön diplomi gredäta löpikum, büä udagetom diplomi u diplomis büikumis.

IV. Siks.

§ 19. (1) Cifal büdakipom oke gitäti ad sikön utanis, kels ebenodistükons okis mu patiküno tefü Volapük, medü sikots sököl:

I. Diploms sikik pro meritabs patik, sevabo:

a) stimadiplom tradutana,

ä) stimadiplom lautana,

b) stimadiplom spikädana,

c) stimadiplom musigala,

d) stimadiplom poedana,

e) stimadiplom kadämala,

f) stimadiplom senätana.

II. Cäl ad stimaliman Volapükanefa.

III. Legiv köna di ,Schleyer'.

(2) Stimadiplom kadämala kanon te padagetön fa liman süperik kadäma Volapüka, du sikots votik valik kanons padagetön fa Volapükan alik, kel ebenodistükon patiküno oki.

V. Volapükabürs.

§ 20. Bürs lecifas e cifas Volapükanas binons leigo Volapükabürs.

VI. Zänagased Volapüka.

§ 21. Ad käläl demädas Volapükik el „Zänagased Volapüka“ papübon.

§ 22. Zänagased Volapüka binon jäfidot valemik

1ido cifala,

2ido Volapükanefa,

3ido feda Volapükaklubas,

4ido kadäma Volapüka

5ido Volapükafunda, e mögädo,

6ido stidas bevünetik votik.

VII. Nomem konömik.

§ 23. (1) In nomem konömik ma neod plu kuratiko utos valik palonon u paleodükon, kelos pelonon te valemo in statuds at, e fovo utos vlaik, kelos z esüdon demü nomädik gudik dinas. In nomem at i suäms pro diploms balatik do tefü pelabiks palonons. Mon at papelons Volapükafunde ya dabinöle, jüs mögädo tefü ons büad votik pulonülon.

(2) Pato in nomem at palonons u paleodükons:

a. zänagased Volapüka,

ä. Volapükagaseds calöfik votik,

b. püb penäda, u penädas votikas,

c. bligs, gitäts e gitods lecifas e cifas Volapükanas. Stips, kelis mutoy fölön demü cäl ad dinits at. Säcäl dinitas at.

d. if zesüdos, e ma neod dilädam taleda ini ziläks,

e. mögädo nunods calöfik lecifas e cifas,

f. Volapükabürs,

g. stips ad daget diplomas nolik Volapüka,

h. fom diplomas,

i. fom sikotas, stips ad daget onas e mod, ön kel pagevons,

j. monadins,

k. dins votik Volapüki teföls.

VIII. Votükam statudas.

§ 24. Votükams mögädo zesüdiks statudas at polonülons ön vätäl ko lecifs e cifs calik Volapükanas.

So pelonöl tö ‚Bad Godesberg‛

tü d. 1id mayula yela: 1934

Cifal Volapükanefa,

Prof. Dr. ALBERT SLEUMER

Se Volapükagased pro Nedänapükans 1934, Nüm: 5, Pads: 26-29.