Dalebüd Cifala de 1934, Prilul 1, Nüm: 1

Lecedölo zesüdiki, das stid cifalama palonon fümiko, e

vipölo ad folön desini me büad obik de 1934, yanul, 1 penotüköli,

lonob me penäd at statudis sököl tefü cifalam.

Dalebüd at ponotükon büo in „Volapükagased pro Nedänapükans“, e pötatimo i in „zänagased Volapüka“, ven gased lätik at podabükon.

CIFALAM.

I. Tiäd.

§ 1. Cifal binom cif löpikün Volapükanefa.

II. Topät.

§ 2. Sovüo jüs cifal baiodü stids fa om pedasevöls: guveranef Volapükanefa, kadäm Volapüka,... ulonom topi patik as topät oma, lödöp labana dinita at obinon i topät calöfik cifala.

III. Primadät.

§ 3. Dät datika Volapüka fa ‚Johann Martin Schleyer‛, sevabo: d. 31id mäzula yela: 1879 palecedon i as primadät cifalama.

IV. Gitöf.

§ 4. (1). El ‚Johann Martin Schleyer‛ ebinom sekü jenot teik datika Volapüka klülo ä gitöfo cifal Volapükanefa.

(2) Ob: ‚Albert Sleumer‛ binob gitöfo cifal Volapükanefa sekü dalebüd de cifal balid: ‚Johann Martin Schleyer‛ de 1910, dekul, 3, medü dalebüd kelik ecälom obi ad fovan oka ko gitäts e gitods valiks, kels seköfons ko dinit at.

(3) Fovans oba obinoms gitöfo cifals Volapükanefa, if udagetoms diniti at ma mod, kel palonon in statuds at.

V. Blig.

§ 5. Cifal labom bligi

1ido ad dakipön baläti Volapüka,

2ido ad dakipön baläli bevü Volapükans valik tala,

3ido ad steifön, das Volapük vedon, näi netapüks, kosädamedöm bevünetik valemik vola.

VI. Gitäts e gitods.

§ 6. Cifal labom gitäti e gitodi ad lonülön mesülis valik, kelis lecedom zesüdikis pro ben Volapüka, stipä mesüls at no taons la mesüls, kels pelonons baiodü om fa stids fa om pedasevöls, e sotefä mesüls at no tefons gitodis, kelis egividom protim pluuneplu lunik stides, u klubes, u pösodes patik.

VII. Tef ad stids seköfik.

§ 7. Cifal binom sekü cal oka dilekan ela „kadäm Volapüka“ ä presidan ela „fed Volapükakluba§s“.

VIII. Calüp.

§ 8. Büdakipü jenet in § 12 padiseinöl calüp cifala dulon jü fin lifüpa okik.

IX. Vicifal.

§ 9. Cifal cälom se limans kadäma Volapüka u lecifs Volapükanas hibalani ad vicifal.

(2) Dinit vicifala palabon lifüpio pläsif finikon

1ido sekü beg penamik lönik calilabana, u

2ido sekü säcäl demü kods veütik.

(3) Säcäl vicifala pagevon fa cifal.

(4) Pos säcäl vicifala cifal okudom, das ünü mul bal vicifal nulik pacälom, efe ma mod ot, kel pelonom in setem: (1) bagafa at.

(5) Dü tim, das vicifal nonom, hiliman kadäma, kel labom dünayelis mödikün, obitom zesüdo as vicifal.

(6) Vicifal pladulom cifali in jenets valik, das atan kodü kod alseimik: maläd, nekom lunüpik,... no fägom ad duinön cali oka.

(7) I pö non cifala, sekü deadam calilabana u säcäl oma kodü kejent in § 12 padiseinöl vicifal obitom as cifal, jüs cifal nulik pudavälom ma mod in statuds at palonöl.

X. Cäl fovana.

§ 10. Cifal cälom nog dü lifüp oka se limans kadäma Volapüka u lecifs Volapükanas hibalani ad fovan oka.

XI. Daväl cifala.

§ 11. (1) Üf cifal mögädo deadomöv, nes ëcälodön fovani oka, limans kadäma Volapüka e lecifs Volapükanas odavälons se dinitilabans at hibalani ad cifal Volapükanefa.

(2) Utan, kel udagetom pö vögodam balid pluamanumi verik vögodas lonöfik davälagitodanas valik, obinom cifal Volapükanefa.

(3) If pö vögodam balid nek udagetom pluamanumi verik vögodas lonöfik, vicifal ovüdom davälagitodanis ad davälön cifali se utans tel, kels udagetoms vögodis mödikün pö vögodam balid.

(4) Utan, kel udagetom, pö vögodam telid pluamanumi vögodas lonöfik pugevöl, obinom cifal Volapükanefa.

(5) If pö vögodam telid bofikans udagetomsöv numis leigik vögodas, du vicifal obinomöv balan bofikanas et, täno vicifal polecedom as cifal pudavälöl. If vicifal ye no obinomöv balan bofikanas et, täno kanom stetön balani bofikanas cifali. If no vilom gebädön ünü dels kil gitodi at, täno hiutan limanas kadäma u lecifas, kel bofikanas olabom dünayelis mödikün, polecedom as cifal pudavälöl.

(6) Pösod balatik alik (klu utan, kel binon leigüpo ä liman kadäma ä lecif) gitodon ad gevön vögodi te bali.

(7) Vögodam demü daväl cifala jenon penamiko ä kläniko.

XII. Säcäl.

§ 12. Limans kadäma Volapüka e lecifs Volapükanas labons gitodi ad säcälön cifali, if klülädos sekü zöt lonöfik sanana skilik, das binom nesanoviko lienetik.

XIII. Zänabür.

§ 13. Bür cifala binon zänabür Volapüka.

XIV. Siämamäk Volapüka.

§ 14. Siämamäk Volapüka binädon me talaglöp diametü zimmet bal su feled sirköfik klilagedik, kela diamet suämon zimmetis tel. In feled klilagedik sus talaglöp vöd: „Volapük“ binon, e dis at spiked Volapüka: „Menefe bal, püki bal“. Tonats e däsinot talaglöpa blägons, e mels in talaglöp vietons.

XV. Siämamäk zänabüra.

§ 15. Siämamäk zänabüra binädon me siämamäk Volapüka, sus kel vöds: „Zänabür Volapüka“ binons, e dis kel su tanod in latin spiked Volapüka: „Unam unui generi humano linguam.“ binon.

XVI. Nomem konömik.

§ 16. In nomem konömik plu kuratiko utos valik palonon, kelos zesüdon demü nomäd gudik dinas.

XVII. Votükam statudas.

§ 17. Demü dakip baläla in Volapükanavol cifal no olonülom votükamis statudas at, büä ubekonsälom oki tefü ats ko limans kadäma Volapüka e lecifs Volapükanas.

So pelonöl tö Bad-Godesberg,

tü d. 1id prilul yela: 1934.

Cifal Volapükanefa:

Prof. Dr. Albert SLEUMER.

Se Volapükagased pro Nedänapükans 1934, Nüm: 4, Pads: 19-21.