Dalebüd Cifala de 1948, Gustul 18, Nüm: 5
- Me dalebüd ä diplom dätü d. 3id dekula yela: 1910 datikan famik mekavapüka: Volapük, monsinyor: ‚Johann Martin Schleyer‛ in ‚Konstanz‛ len Lak di ‚Konstanz‛ elovegivom obe dugi fovik Volapükanefa de deadamadel okik.
- Edunom atosi, bi esevom obi asä Volapükani lezilik sis yel: 1892. Espodob ai ko om, ed evisitob omi dönuamo in ,Konstanz'. Noe ilautob ünü yels mödik mödoti gretik yegedas gönü Volapük, abi islopükob menis mödik pro Volapük. Fovo espikädob suvo komü kobanefs gretikum, ed istütedob ai mastali pö töbidam valik me mon.
- Lunüpo bü dead oka cifal: ‚Schleyer‛ i ecälom obi asä kadämali Volapüka lobülü dun obik gönü Volapük. Deadam cifala nenfenik ejenon tü 1912 gustul 16.
- De del at cifalacal oba eprimon. Spod jäfädik ko Volapükans mödik äglofon. Lärnamods ad lärnön Volapüki päfövons. Tü prilul 23 yela: 1914 esävilupob lezäliko mebastoni jönik labü pöträt reliäfik gudik mastala e nüpenot lunikum len deadamadom ela ‚Schleyer‛ in ‚Konstanz‛. Zänodü vobs fluköfik valik pro stäänükam püdapüka voik at volakrig balid esplodülon; so mög alik ad pakön Volapüki änosikon valöpo dü yels mödik.
- Konletam Volapükanas in Deutän e kobovob ko Volapükans foginäna äkanons papreparön te nevifiko ün yels: 1920-1933. Bümals spelik mödik älüjonilons dönulifikami Volapüka. Ab täno ün yel: 1935 dub proib tatik propagid alik yufapükas mekavik süpiko pänemögükon. Mögis lätikün ad yumükön pöpis in kobovob püdiälik ä beniköl volakrig telid mu mifätik edistukon. Vüo valöpo i flens e nolans mödik Volapüka edeadons. Lepato in Deutän dönulifikam logädik Volapüka e kobovob frutik ko Volapükans fiedik in läns votik pefikulükons e pafikulükons vemo dub krigs e seks onas.
- Sekü kods at ecedob pötiki ad lovegivön cifalacali no-Deutänane ebluföföl.
- Cälod obik edrefon söli: ‚Jakob Sprenger‛, dabükan ä kadämal Volapüka, pemotöli in ‚Speicher‛, kanton: ‚Appenzell‛, Jveizän tü 1872 mayul 8, e lödöli in ‚Gams‛, kanton: ‚St. Gallen‛, Jveizän. Sis yel: 1891 slopan fiedik at mastala obsik ed oba ebejäfom Volapüki lanälo, ed elautom penädis digik dö at. Dub atos esevädikom veitiko. As fünan Lelivükamafeda bevünetik enitedälükom limanis ata feda so vemo pro Volapük, das pük at evedom dü yels mödik jü atim kosädapük bevü limans, kels spikons pükis de ods distikis.
- Dub tanät nabätik Volapüka ko Lelivükamafed bevünetik garan jinon pagevön, das Volapük olabon fütüro käli pato vobediki, e das atoso mög dönustäänikama i pasefükon lä nets votik tala.
- Tü del degmälid gustula yela: 1948 mastal neglömovik obas obinom dü yels kildegmäl in lananöp. Etdelao söl: kadämal ‚Jakob Sprenger‛ olovesumom dugi löpikün Volapükanefa tala lölik e leigo cali dilekana Volapükakadäma.
- Begob Volapükanes valik ad fiedön kol om asä fovan obik in cifalam: valikans stütonsös omi ai nämiküno pö töbidams omik ad födön Volapüki!
- Benäd Goda gevonös cifale kilid Volapükanefa duni e fredüköli e sekaliegiki in dün diala sublimik obas dü yels vemo mödiks!
- ‚Bad Godesberg‛, 1948 gustul 3.
- Cifal telid Volapükanefa ä dilekan Volapükakadäma:
- Prof. Dr. theol. et Dr. phil. ALBERT SLEUMER
- Studadilekan p.d.
Se Volapükagased pro Nedänapükans 1948, Nüm: 5, Pads: 18-20.