Davánt troc agn
Davánt troc agn.
Davánt troc agn l ava un de Chierz na novicia sa Ciastel e coscì l jiva mefo plu oute de not da sta cotela; ma per se la tò plu curta, l jiva dagnára su per mont da La Court e passáva via per Jou de l'Omblie. Na sëra fra le autre passa chëst tel su per Pre Blanchët, l veiga fuoch nte na ciasota, l vol jì a se mpié la pipa e a vedei chi che l é. L và ite e veiga n clap de ëi e ële che fajëva banchët, l cugnësc demè un, che l eva suo compere, e chëst ie comana de no dì nia a degugn; senò, l mossarà morì. Chëst se n và davò sua strada e bon, e l é ence sté bon de se tegnì de no dì nia de sta roba che l ava vedù a degugn; ma na outa, come che se fesc, cánche s’é n puo beus, che i é vegnus de se dì ceze ja La Plié, l i'à trat chëst da denot delongo ntel mus a chëst suo compere che l eva ence con chi autri strions sun Pre Blanchët che i fajëva banchët, e coscì se disc che l siebe ence mort prëst daspò e che fossa sté chët suo compere a l fè morì.