De Scheper

De Scheper.
Author:	Emmy von Dincklage
Text type:	Gedicht
Comment:
:

Lang de Schüppe
un de Kippe
un dat Haiken van de Wand;
kleppt de Misse,
driv ick wisse
mine Schaop in’t Heideland.
Hollah - oh!

Kaommt se alle
ut’n Stalle,
mine Schöäpkes bünd nich mack!
Se willt springen,
ick will singen
met min Brügge in’n Sack.
Hollah - oh!

Wenn ick breide
up de Heide,
wott de Dagg mi mangs to kott;
wenn ick slaope,
mine Schaope
use Hündken möiten mott.
Hollah - oh!

Kaom ick binnen,
sitt tau spinnen
achtert Weel de lüttke Maid.
Man de Buer
kick so suer;
’t is doch bäter up de Heid!
Hollah - oh!