De Tein Gebode Gades
| De Tein Gebode Gades. | |
|---|---|
| Text type: | Religion |
| Comment: |
Katechissen druckt bi Warner Berendo in Ollnborg in Opdrag vun Graaf Johann VI.
|
| : | |
De Tein Gebode Gades
Alse se ein husvader synem Gesinde eintfoldigen vörholden vnde lehren schal.
- Dat erste Gebodt.
Du schalt nene ander Göde hebben neuen my.
- Wat ys dat?
Wy schölen Godt bauen alle dinck früchten / leuen / unde em vortruwen.
- Dat Ander Gebodt.
Du schalt den Namen des Herrn dynes Godes nicht unnütte vören.
- Wat ys dat?
Wy schölen Godt früchten unde leuen / dat wy by synen namen / nicht flöken / sweren / töuern / legen edder dregen / Sundern / densüluen in allen nöten anropen / beden / lauen und dancken.
- Dat drüdde Gebodt.
Du schalt den Vyrdach hilligen.
- Wat is dat?
Wy schölen Godt früchten unde leuen / dat wy de Predigen unde syn Wordt nicht vorachten / sunder datsülue hillig holden / gerne hören unde lehren.
- Dat Veerde Gebodt.
Du schalt dynen Vader unde dyne Moder ehren / up dat ydt dy wolgha unde lange leuest up Erden.
- Wat ys dat?
Wy schölen Godt früchten unde leuen / dat wy unse Oldern unde Heren nicht vorachten noch vortörnen / Sunder se in ehren holden / en denen / gehorsam syn / Se leff unde weerdt holden.
- Dat vöffte Gebodt.
Du schalt nich döden.
- Wat ys dat?
Wy schölen Godt früchten unde leuen / dat wy unsem Negesten / an synem lyue nenen schaden noch leidt dohn / Sunder helpen unde vördern in allen Lyues nöden.
- Dat Söste Gebodt.
Du schalt nicht Eebreken.
- Wat ys dat?
Wy schölen Godt früchten unde leuen / dat wy küsch unde tüchtigen leeuen / in wörden unde wercken / unde ein yder synen echten Gaden leef hebben unde ehren.
- Dat Söuende Gebodt.
Du schalt nich stelen.
- Wat ys dat?
Wy schölen Godt früchten unde leuen / dat wy unses Negesten Geldt edde Gudt nicht nehmen / noch mit falscher wahre edde handel an uns bringen / Sunder em syn Gudt und naringe helpen beteren und bewaren.
- Dat Achte Gebodt.
Du schalt nene valsche Tüchnisse reden wedder dynen Negesten.
- Wat ys dat?
Wy schölen Godt früchten unde leuen / dat wy unsen Negesten nicht valschiken belegen / vorraden, achterreden / edde ein bösj Gerüchte maken / Sunder schölen en entschüldigen / unde alle gudt van em seggen unde alle dynck thom besten kehren.
- Dat Negende Gebodt.
Du schalt nicht begeren dynes Negesten Husz.
- Wat ys dat?
Wy schölen Godt früchten unde leuen / dat wy unsem Negesten nicht mit list na synen Erue edde huse stahn / unde mit einem schyne des Rechtens an uns bringen / etc. Sunder em datsulue tho beholdene / vörderlick unde denstlyck syn.
- Dat Teinde Gebodt.
Du schalt nich begehren dynes Negesten Frouwen / Knecht / Maget / Vehe edder wat syn is.
- Wat ys dat?
Wy schölen Godt früchten unde leuen / dat wy unsem Negesten syn Frouwe / Gesinde edder Vehe nicht affspannen / affdringen edder affhendig maken / Sunder desuluen anholden unde thoreitzen / dat se blyen / unde dohn wat se schüldich synt.