De la gensor qu' om vey, al mieu semblan
De la gensor qu' om vey, al mieu semblan,
On nueg e jorn velh e pens e cossir,
Mi vuelh lunhar, si 'l cor mi vol seguir,
Ab tal acort que mais no 'l torn denan;
Quar longamen m'a tengut deziron
Ab belh semblan, mas tan dur me respon
Qu' anc jorn no m volc precx ni demans sofrir.
Jamais miey huelh ab los sieus no s veyran,
S' a lieys no platz que m man a se venir:
Cum plus la vey plus m'auci de dezir,
Et non mais l' am, mais y fatz de mon dan;
E 'l non vezer me languis e m cofon;
E pus no m plai ren als que sia 'l mon,
Ab pauc no m lays de vezer e d' auzir.
Ai! belha domna, ab belh cors benestan,
De belh semblan e de gent aculhir,
A penas sai de vos mon mielhs chauzir,
Si us vey o no, o si m torn, o si m' an:
Non ai saber ni sen que mi aon;
Tan suy intratz en vostr' amor prion,
Qu'ieu non conosc per on m'en puesc issir.
Pero, dona, si us vis cor ni talan
Que m denhessetz l' amor qu'ie us ai grazir,
So es us mals don no volgra guerir;
Mas, pus no us plai, al ver dieu me coman;
De vos mi tuelh, e non ab cor volon,
Quar res ses vos no m pot far jauzion:
Veiatz si m puesc ab gaug de vos partir!
Quar conoissetz que no us am ab engan,
E quar vos sui plus fis qu'ieu no sai dir,
E quar ab vos m'aven viur' e murir,
Vos afranquis merces vas me d'aitan,
Dona, qu' el cor que m falh e m fug e m fon
Me sostenguatz, quar ieu no sai vas on
Mi serc secor, si vos mi faitz falhir.
Senher Bernard, no ns partrem viu del mon,
Mas la belha que m destrenh e m cofon
Tem que m fassa per mort de vos partir.