Delagrange volerà!!
Delagrange volerà!!
Satira e Bosinada de rid de Ambrosian
l'è a sora l'om che vola su l'Areoplan.
I.
Questa l'è bella e de rid col venter in man
l'è a sora 'sta gran novitaa ch'è vegnuu a Milan,
inventada d'on Frances con studi e sudor
ona sonada a machina bona a tutt i or,
in Italia inn propi gavee de bon,
creden che 'sto rob el passa anca el Mont Resegon,
inveci sann nò, o porco sciampin,
che l'è minga bon nanca de passà el Tesin.
II.
T'heet sentii, el mè car papà Gaetan
che è vegnuu a Milan 'sto gran Areoplan?
L'è ona machina e minga on ballon,
l'è on alter mezo de rompes el coll propi de bon!
Alter che el ballon dirigibil e quell frenaa:
quest chì el te manda in Paradis anca coi pecaa!
L'è propi ona novitaa, e ghe n'è minga tant:
ghe disen de soranom "l'om volant".
III.
Ma el pussee bell l'è quand el volarà, el mè car calendari!
Vedè tutta 'sta gent in Piazza d'Armi col nas per ari...
gh'è quei che creden che 'l sarà come andà sul Dom,
inveci la me par la ferrovia che de Milan la va a Com.
El corr, l'è vera, compagn d'on automobil,
ma de andà per ari l'è minga semper de comod;
se pœu tira on poo de vent, el mè car Gaetan,
adio Frances, novitaa e areoplan!
IV.
Chi dis che volarà sì, chi dis che volarà nò;
ma tanti, per andà a vedell, i biliett ghe j'hann gemò;
perchè l'è roba francesa, chi sa quanta gent... "El mè car Morett!
E pensà che nunch italian me toca andà a l'ester a tœu i brevett!
Quest l'è l'incoraggiament che gh'è in Italia", le dis anca el Luis;
"Vœuren domà roba Inglesa e moda de Paris;
alter che vegnì chì a damm d'intend!
Che con dò spatol de Paris se va a Roma come nient".
V.
A Roma, dove l'è vegnuu via adess
coi sò esperiment je fa restà de gess.
Ma el pussee bell l'è staa el prim dì.
El Delagrange l'ha dit: "O vola tì ballon senò voo via mì!".
Gh'era su el vent, el pareva on squanquass,
ma el pover Areoplan el voreva minga savegghen d'alzass,
e la gent, de dent, strillaven perchè voreven indree i sò ghei.
VI.
Ma fenissela on poo de parlà de 'sto areoplan,
parlem inveci di divertiment Portian!
T'heet vist a la Rena la Baraonda, che spuell!
Me par de vess in su la barca del Nonzi Gabriell:
chi corr de chì, chi vosa de là,
se spend di gran danee e se porta nient a cà;
se ved i Covert di Figin col Dom de carton,
el Circo Manetti coi sò baracon.
VII.
Quella l'è roba nœuva, el mè car Rigoli!
Consciamm la Rena come la fera del Tivoli?
Almen là se paga minga l'entrada, o porco sciampin!
Intanta che te vedet la donna cannone te porten via el borsin.
Te veet avanti on tochell, te sentet on gran odor,
L'è quell del zucher filaa che ne fa de tutti i color!
A sinistra te sentet: "Che 'l vegna qua moretin,
ghe farò el zogo de łe carte per un pałanchin!
VIII.
Ghe digo el pasà, el prexente e l'avenir,
ghe faxo spender ben i sò schei e ło faxo divertir!"
Questa l'è la sonambula, la conoss anca la lena,
la dis che 'l Signor l'è mort del fregg a ess padron de la le[??];
se pœu te veet al Kursaal baracon
te sentet a cantà e te fann andà giò el ballon;
gh'è la forza, la scherma e la lotta,
e se te vœutt on quai pugn in sul nas te 'l dann per nagotta.
IX.
Mì me par che i divertiment sien trop al dì d'incœu
e quest l'è ona rovina (specialment per i fiœu);
ferr de chì, divertiment de là,
e tutt i dì cala la vœuja de lavorà.
Dopo l'è el motiv, come dis l'Invernizz,
che in cà manca i danee e cress i pastizz;
alora, che cucagna andà in bolletta,
a podè minga bev on poo de Trani e de Barletta!
X.
Basta, sperem che 'sto om che 'l vola e faga furor,
come quell che ha inventaa el vapor;
e benchè Frances el sia 'sto Delagran,
nun come a Roma el festeggiarem anca a Milan:
così ghe farem vedè a la sorella latina
che in Italia l'ingegn el cascen minga in la latrina
e se ghe sarà per 'sto forestee ona bella dimostrazzion!
Compatim anca mì, pover poetta, che sont on ver milaneson.