Delicatezza

Speri Della Chiesa Jemoli (1865-1946)‎

Delicatezza

Senza scommett se, poeu, l'avriss pagada,
on spelabrocch in su ona cittadinna
l'aveva faa ona longa scarrocciada
finna foeura Porta Vigentinna
per visità on amis, e rivand là
el gh'ha ditt al brumista de speccià.
Spetta e spetta, quand lù l'è tornaa foeura
l'ha vist che el carroccee in sul sò scerpin
involtiaa dent in tabàr niscioeura,
el ghe schisciava, a cunt, on visorin.
Allora el forestee, in del contemplall,
l'ha pensaa: "Ma perchè hoo de dessedall?...
Ghe vorariss avegh on coeur ben gramm!..."
e inscì disend, l'è tornaa indree col tramm.