Despièyt
Despièyt
Guignoulet quitat per pauriéro
De sa Mestresso trufandiéro,
Foro de sen é de repaus,
Se counsouléc d'un tal prepaus.
Fi de l'Amour, yeu le despiti,
Aro qu'un Home de meriti
Es prezat tant que la Tintou
Quand se bol dire Serbitou
De la plus quito Doumaiselo,
Se n'a daurado l'escarcélo.
Toutos s'agradon à piafa,
É dan l'argen aco se fa.
Beléu qualque bon'Aujouleto
N'aura qu'uno simplo raubeto,
É sens estofo ni clincans,
Passara l'escay de sous ans
Baudomen; més aco's à l'atge
Que le tens rido le bisatge,
É quand per nous coyre d'amour,
La beutat nou fa plus al four.
Estérle, que de ta Mestresso
Nou podes tira que rudesso,
Apren qu'yeu beni de sabe
Que per facilomen abe
Ço que bos de tas amouretos,
La bourço te fara catetos.
Atal se tremudéc en or,
Jupitér per gagna le cor
É baysa la bouqueto lizo
De la bélo Filho d'Acrizo.
Bréf, per au dire d'amb'un mout,
L'or es l'aymant que tiro tout.
É tu, que de moun mal te rizes,
É que per trufos aro dizes:
Seignour Baldéu, que li bouléu
Al Courpoural que noun a créu,
Es aco trét de Filho sajo
De jura l'esclayre que rajo,
Que toun humou me pagario
Un jour que mens y pensario.
Oyda de mespréts é de minos
Fredos é foro de jouïnos,
Mounedo que jamay nou cour
Entre Gens que se fan l'amour.
Cértos à tas doussos eillados,
É parauletos ensucrados,
Jamay nou me foussi roungat,
Que tu me baillessos le gat.
Yeu que fazio per ta carriéro
La permenado dapassiéro,
Coumo ba per soun carrayrol,
Un escaragol bibarol,
Quan tray las cornos per son Payre,
É per le be de Térro Mayre,
Per paysse moun él afamat
Sur toun bisatge trop aymat:
Trop countent quand tu d'escapado
Me trametios qualque guignado;
Trop huroux quand sul paredou,
O cap é cap al courredou,
Yeu te disiô: Bello Mestresso,
Fay me léu sourti de tristesso,
Que toutjour estau pensatiu
Couro moun nas grate le tiu.
Alabets, en rizen de gauto,
Tu sabios capbira l'escauto,
É per encaro m'anima,
Me remetios al lendouma.
Yeu que sense cap ni centeno,
É gourrinat per la sereno
Toute la santo de la néyt,
Per te fa gratillous al liéyt
Dan qualque mout de cansouneto
Fayto per tu, ma Poutouneto.
Ay, be soun grep d'entendemen
De te parla ta doussomen.
Atal bibio dedins moun armo
Le foc d'un amourouse alarmo,
Quand les Traquanars del Soulel
En Mar se ban solbre le pel,
Mentre qu'ayci la néyt bruneto
Ten en desplego la clouqueto,
É quand per nous à nostre tour
Per las nazics bufon le jour.
É be be tu me quitos aro,
Noun pas per mon bici ni taro,
Més per ço qu'un pijoun noubél
S'es atrapat à toun cimbél.
Almens d'uno causo me fizi,
Que quand le Drolle que jou dizi
N'aura plus poudro d'oribus,
Tu li faras touca l'abus.
Aros en fugin toun serbici,
É le mél de toun artifici,
Yeu boli dire amay guigna
Que dan tu n'a res à gagna.
Pren doun un adiu per estrenos,
Mentre que de plus grandos penos
Sur mi le labassi nou plau.
Per açi passi quand m'en bau.